އިންޑިއާގެ ރައީސް ދްރައުޕަތީ މުރްމޫ ދެއްވި ޖާފަތުގައި ރައީސް ޑރ. މުހައްމަދު މުއިއްޒު ބައިވެރިވެވަޑައިގެންފި އެވެ.
އިންޑިއާގެ ރައީސްގެ ރަސްމީ ގެކޮޅުގައި ބޭއްވި މި ޖާފަތުގައި ތިންވަނަ ދައުރަކަށް އިންޑިއާގެ ބޮޑުވަޒީރު ކަމުގެ ހުވާ އިއްޔެ ކުރެއްވި ނަރެންދްރަ މޯދީ އާއި ހުވާ ކުރެއްވުމުގެ ރަސްމިއްޔާތަށް ބޭރު ގައުމުތަކުން ވަޑައިގެންނެވި އިއްޒަތްތެރިން ބައިވެރިވެވަޑައިގެންނެވި އެވެ.
މޯދީގެ ހުވާ ކުރެއްވުމުގެ ރަސްމިއްޔާތަށް އިންޑިޔާއާ އަވަށްޓެރި ގައުމުތައް ކަމަށްވާ ރާއްޖެ އާއި ސްރީ ލަންކާ އާއި ބަންގްލަދޭޝް އާއި ބޫޓާން އާއި ނޭޕާލްގެ އިސްވެރިން އިންޑިއާ އަށް ވަޑައިގެންނެވި އެވެ.
ރައީސް މުއިއްޒު އިންޑިއާއަށް ކުރައްވަމުން ގެންދަވާ ދަތުރުފުކީ ވެރިކަމަށް ވަޑައިގެންނެވުމަށްފަހު އެގައުމަށް ކުރައްވަމުން ގެންދަވާ ފުރަތަމަ ދަތުރުފުޅެވެ.
ރައީސް މުއިއްޒު ވެރިކަމަށް ވަޑައިގެންނެވުމާއެކު ދެގައުމުގެ ގުޅުމަށް ވަނީ ނޭދެވޭ އަސަރުތަކެއް ކޮށްފައެވެ. އަދި އެއަށްފަހު އިންޑިއާއަށް ނިސްބަތްކޮށް ރައީސް މުއިއްޒު ދެއްކެވު ވާހަކަފުޅާއި، މިސަރުކާރުގެ 3 ޑެޕިއުޓީ މިނިސްޓަރަކު އިންޑިއާގެ ބޮޑުވަޒީރަށާއި އަދި އިންޑިއާއަށް ނިސްބަތްކޮށް ދެއްކި ވާހަކަތަކާއި ގުޅިގެން ދެގައުމުގެ ގުޅުން އިތުރަށް ހީނަރުވެގެން ދިޔައެވެ.
އެހެންނަމަވެސް ޚާރިޖީ ވަޒީރު މޫސާ ޒަމީރު ދާދިދަހުން އިންޑިއާއަށް ކުރެއްވި ދަތުރުފުޅަށްފަހު ދެގައުމުގެ ގުޅުންތައް އަންނަނީ ބަދަހިވަމުންނެވެ.
ބަންގްލަދޭޝް، ސްރީލަންކާ، ބޫޓާން، ނޭޕާލް އަދިދިވެހިރާއްޖެ ފަދަ އަވަށްޓެރި ގައުމުތަކުގެ ލީޑަރުން ބައިވެރިވި ރަސްމިއްޔާތެއްގައި އިންޑިއާގެ ބޮޑިވަޒީރު ނަރެންދުރަ މޯދީ ތިން ވަނަ ދައުރަކަށް ބޮޑުވަޒީރުކަމުގެ ހުވާ ކުރެއްވީ އިއްޔެއެވެ.
އިންޑިއާގައި ބޭއްވުނު އާންމު އިންތިހާބުގައި މޯދީގެ ބާރަތިޔާ ޖަނަތާ ޕާޓީ (ބީޖޭޕީ) އިން ހީކުރި ވަރަށް ވުރެ ދަށް ނަތީޖާއެއް ލިބިގެން ދިއުމާއި ގުޅިގެން ގާނޫނުހަދާ މަޖިލިހުގެ އަށުލަބިއްޔަތު ކަށަވަރު ކުރުމަށް ނޭޝަނަލް ޑިމޮކްރެޓިކް އިއްތިހާދު (އެންޑީއޭ) ގެ އެހެން ބައިވެރިންނާއެކު ވެރިކަމުގެ ބާރުތައް ހިއްސާކުރުމަށް މޯދީއަށްވަނީ މަޖިބޫރު ވެފައެވެ.
މޯދީއަކީ އިންޑިއާގެ މިނިވަންކަމުގެ ބާނީ އަދި ފުރަތަމަ ބޮޑުވަޒީރު ޖަވާހަރުލާލް ނެހްރޫއަށް ފަހު ތިންވަނަ ދައުރަކަށް ވެރިކަމުގެ ހުވާ ކުރެއްވި ހަމައެކަނި ލީޑަރެވެ.
ެިއިންޑިއާގެ ރައީސްގެ ރަސްމީ ގެކޮޅުގައި ބޭއްވި ރަސްމިއްޔާތެއްގައި ގާނޫނު އަސާސީގައިވާ ހުވާ މޯޑީއަށް ލައި ދެއްވީ އިންޑިއާގެ ރައީސް ޑްރޫޕަދީ މުރުމު އެވެ.
