ފުވައްމުލަކު ހޮސްޕިޓަލުގައި އުމުރުން ފަސް އަހަރުގެ ސަދާ ސައުދުﷲ އަށް ފަރުވާ ދިނުމުގައި އިހުމާލުވި މައްސަލައިގައި ފުވައްމުލަކު ހޮސްޕިޓަލާ ދެކޮޅަށް މަދަނީ ބަދަލު ހޯދުމަށް ސިވިލް ކޯޓަށް ހުށަހެޅި މައްސަލަ ކޯޓުން ބޭރުގައި ހައްލު ކުރުމަށް ދެ ދުވަހުގެ ފުރުސަތެއް ސިވިލް ކޯޓުން ދީފިއެވެ.
ސިވިލް ކޯޓުގައި މިއަދު އޮތް އަޑުއެހުމުގައި ސަދާގެ އާއިލާ ތަމްސީލުކުރައްވާ ވަކީލު، މަރިޔަމް ޝުނާނާ ވިދާޅުވެފައިވަނީ ދައުލަތުން އިންކާރު ނުކުރާނަމަ، ކޯޓުން ބޭރުގައި ވެސް ގެއްލުމުގެ ބަދަލު ހޯދުމުގެ މަޝްވަރާ ކުރަން އެންމެ ރަނގަޅު ކަމަށެވެ.
ދައުލަތުގެ ވަކީލް ވިދާޅުވީ ކޯޓުން ބޭރުން މައްސަލަ ހައްލު ކުރެވިދާނެތޯ ބެލުމަށް އެޓާނީ ޖެނެރަލް އޮފީހުގެ އިސްވެރިންނާ މަޝްވަރާކުރުމަށްފަހު ގޮތެއް ނިންމަން ފުރުސަތު ދެއްވުމަށެވެ. މައްސަލަ ބައްލަވާ ގާޒީ މަރިޔަމް ވަހީދު ވަނީ އެކަމަށް ދެ ދުވަހުގެ މުއްދަތެއް ދެއްވައިފައެވެ.
ފުވައްމުލަކު ފުނާޑު، ނޫރިފެހި ގޭގެ އުމުރުން ހަ އަހަރުގެ ސަދާ ނިޔާވީ އޮކްޓޯބަރު، 2021 ގައެވެ. މޯލްޑިވްސް މެޑިކަލް އެންޑް ޑެންޓަލް ކައުންސިލުން އެ މައްސަލަ ބެލުމަށް ފަހު، ދެ ޑޮކްޓަރެއްގެ ލައިސަންސް ސަސްޕެންޑްކޮށްފައިވެއެވެ.
ސަދާ ބަނޑުގައި ރިއްސައި، ވަރަށް ގަދަ އަށް ހޮޑުލާތީ އެންމެ ފުރަތަމަ ދިޔައީ ފުވައްމުލަކުގެ ފްލޫ ކުލިނިކަށެވެ. ކޮވިޑްގެ އަލާމާތެއް ކަމަށް ބަލައި، އެ ކުލިނިކަށް ދިޔަ ފަހުން ވެސް ދަރިފުޅުގެ ހާލަތު މާ ގޯސްވާތީ އެ ތަނުން ހޮސްޕިޓަލަށް ފޮނުވައިލީ އެވެ. ސަދާ މަރުވީ ޑޮކްޓަރަށް ދެއްކުމުން ޖެހި އިންޖެކްޝަނެއްގެ ސަބަބުން ކަމަށް އާއިލާ އިން ތުހުމަތުކުރެއެވެ.
