ފުވައްމުލަކު ހޮސްޕިޓަލުގައި އުމުރުން ފަސް އަހަރުގެ ސަދާ ސައުދުﷲ އަށް ފަރުވާ ދިނުމުގައި އިހުމާލުވި މައްސަލައިގައި ފުވައްމުލަކު ހޮސްޕިޓަލާ ދެކޮޅަށް ކުރާ ދައުވާގެ ފުރަތަމަ އަޑު އެހުން މާދަމާ ސިވިލް ކޯޓުގައި ބޭއްވުމަށް ތާވަލްކޮށްފިއެވެ.
ސަދާގެ ބައްޕަ އަދި ނެޝަނަލް ހޮޓެލްސް އަދި ގެސްޓްހައުސް އެސޯސިއޭޝަންގެ އެސްކޯ މެމްބަރު ސައުދުﷲ އަހުމަދު ހަސަން ފޭސްބުކްގައި ކުރެއްވި ޕޯސްޓެއްގައި ވިދާޅުވީ ސަދާނިޔާވި ހާދިސާގައި ފުވައްމުލައް ހޮސްޕިޓަލާ ދެކޮޅަށް ކުރާ ދައުވާގެ އަޑުއެހުން އޮންނާނީ މާދަމާ ހެނދުނު 11:00 ގައި ކަމަށެވެ.
ދިވެހި ދައުލަތުގެ ހޮސްޕިޓަލް ތަކުން ފަރުވާ ކުޑަވުމުގެ ސަބަބުން އަދި އިހުމާލު ތަކުން ލިބޭ އަނިޔާ ތަކަށް ހައްލެއް ލިބޭނޭ ކަމުގެ ފުރިހަމަ އުއްމީދުގައި މި މަސައްކަތް ފައްޓަވާފައިވާ ކަމަށް ސައުދުﷲ ވިދާޅުވިއެވެ.
ފުވައްމުލަކު ފުނާޑު، ނޫރިފެހި ގޭގެ އުމުރުން ހަ އަހަރުގެ ސަދާ ނިޔާވީ އޮކްޓޯބަރު، 2021 ގައެވެ. މޯލްޑިވްސް މެޑިކަލް އެންޑް ޑެންޓަލް ކައުންސިލުން އެ މައްސަލަ ބެލުމަށް ފަހު، ދެ ޑޮކްޓަރެއްގެ ލައިސަންސް ސަސްޕެންޑްކޮށްފައިވެއެވެ.
ސަދާ ބަނޑުގައި ރިއްސައި، ވަރަށް ގަދަ އަށް ހޮޑުލާތީ އެންމެ ފުރަތަމަ ދިޔައީ ފުވައްމުލަކުގެ ފްލޫ ކުލިނިކަށެވެ. ކޮވިޑްގެ އަލާމާތެއް ކަމަށް ބަލައި، އެ ކުލިނިކަށް ދިޔަ ފަހުން ވެސް ދަރިފުޅުގެ ހާލަތު މާ ގޯސްވާތީ އެ ތަނުން ހޮސްޕިޓަލަށް ފޮނުވައިލީ އެވެ. ސަދާ މަރުވީ ޑޮކްޓަރަށް ދެއްކުމުން ޖެހި އިންޖެކްޝަނެއްގެ ސަބަބުން ކަމަށް އާއިލާ އިން ތުހުމަތުކުރެއެވެ.
