އައްޑޫ ސިޓީއަށް މެދުނުކެނޑި ފެން ލިބޭނެ ގޮތް ހެދުމުގެ މަސައްކަތް ފެނަކަ ކޯޕަރޭޝަންއިން ކުރިޔަށް ގެންގޮސްފިއެވެ.
އައްޑޫ ސިޓީގެ ގުޅިފައިވާ ރަށްތަކަށް ދިމާވެފައިވާ ފެނުގެ މައްސަލައަށް ހައްލެއް ގެނައުމަށްޓަކައި ފެނަކައިން ވަނީ އައްޑޫ ސިޓީއަށް ބޯހޯލް ޕަމްޕެއް ފޮނުވާފައެވެ. މި ޕަމްޕު ފޮނުވުމާއި އެކު ވަނީ އިންސްޓޯލްކޮށް ޚިދުމަތް ދޭން ފަށާފައެވެ.
ފެނަކައިން ބުނެފައިވަނީ އައްޑޫ ސިޓީއަށް ދިމާވެފައިވާ ފެނުގެ މައްސަލަ ހައްލު ކުރުމަށް ހޯދުނު ބޯހޯލް ޕަމްޕް މިހާރު ވަނީ ގެންދެވިފައި ކަމަށާއި، ޕަމްޕް އިންސްޓޯލް ކުރުމުގެ މަސައްކަތް ދަނީ ކުރެވެމުން ކަމުގައެވެ. މި ޕަމްޕް އިންސްޓޯލް ކުރުމުން އައްޑޫ ސިޓީގެ ފެނުގެ ނިޒާމަށް ބޮޑު ލުއެއް ލިބިގެން ދާނެ ކަމަށްވެސް ފެނަކައިން ބުނެފައެވެ.
މިކަމާގުޅިގެން ފެނަކައިން ވަނީ އައްޑޫ ސިޓީގެ ގުޅިފައިވާ ރަށްތަކަށް ދިމާވެފައިވާ ފެނުގެ މައްސަލައަށް ލުޔެއް ގެނެވިފައިވާ ކަމަށް ބުނެފައެވެ. އަދި މި ޕަމްޕުން ހިދުމަތްދޭން ފެށުމާއެކު މެދުނުކެނޑި ފެން ފޯރުކޮށްދެވޭނެކަމަށް ފެނަކައިން މައުލޫމާތު ދެއެވެ.
އައްޑޫ ސިޓީގެ ފެނުގެ މައްސަލަ ހައްލުކުރުމަށް ސަރުކާރުން ވަނީ 256 މިލިއަން ރުފިޔާގެ މަޝްރޫއެއް އެމް.ޑަބްލިޔު.އެސް.ސީ އާއި ހަވާލުކޮށްފައެވެ. މިޝްރޫއު ނިމުމުން އައްޑޫގެ ފެނުގެ ނިޒާމް ޒަމާނީވެ އަޕްގްރޭޑް ވާނެއެވެ.
ކޮމެންޓު ފޮނުވާ