އިއްޒުއްދީން ސްކޫލުގެ ބައެއް ހިސާބުތަކުގައި ރެނދު ލުމާއި ގުޅިގެން އެ ސްކޫލުގައި ދަރިވަރުންނަށް ކިޔަވައި ދިނުމަކީ ރައްކާތެރިކަމެއްތޯ ޔަގީން ކުރުމަށް އެސެސްމަންޓް ހެދުމަށް އެޑިއުކޭޝަން މިނިސްޓްރީން ނިންމައިފިއެވެ.
އެ ސްކޫލުގައި ރެނދުލާފައިވަނިކޮށް ފެނިފައިވަނީ ސްކޫލުގެ 3 ވަނަ ފަންގިފިލާގެ ބައެއްގައެވެ. އެޑިއުކޭޝަން މިނިސްޓްރީން ބުނެފައިވަނި މި ސާވޭ ހެދުމަށް ހަމަޖައްސާފައިވަނީ ކޮންސްޓްރަކްޝަން މިނިސްޓްރީއާއި ގުޅިގެން ކަމުގައެވެ.
އަދި ކުރިޔަށް އޮތް ތަނުގައި ސްކޫލު މަރާމާތު ކުރުމާއި ގުޅޭގޮތުން ގޮތެއް ނިންމާނީ މި ސާވޭއަށްފަހު ކަމަށްވެސް މިނިސްޓްރީން ބުނެފައި ވެއެވެ.
މިނިސްޓްރީން މިހާރުވަނީ އެކަން ސްކޫލުގެ ބެލެނެވެރިންނާވެސް ހިއްސާ ކޮށްފައެވެ. އިއްޒުއްދީން ސްކޫލަކީ މާލޭގައި އެންމެ ފުރަތަމަ އެއް ދަންފަޅިއަށް ކިޔަވާދޭން ފެށި ސްކޫލެވެ. އެންމެ ފުރަތަމަ އެ ސްކޫލްގައި ކިޔަވާ ދޭން ފެށީ ގްރޭޑް 1 އިން 6 އަށެވެ. އަދި މިއަހަރުވަނީ އެ ސްކޫލުގައި ގްރޭޑް 10އަށް ކިޔަވާދޭން ފަށާފައެވެ.
އިސްޒުއްދީން ސްްކޫލަކީ މީގެ 25 އަހަރު ކުރިން އިމާރާތްކުރި ސްކޫލެކެވެ. އެ އިމާރާތުގައި އެންމެ ފުރަތަމަ ހިންގީ މާލޭ އިންގްލިޝް ސްކޫލެވެ. އެއަށްފަހު މަންދު ކޮލެޖްވެސް އެ އިމާރާތުގައި ހިންގާފައި ވެއެވެ.
