ދުނިޔޭގެ އެކި ގައުމުތަކުގެ ޑިފެންސް މިނިސްޓަރުންނާއި މިލިޓަރީގެ ޗީފުންނަށް ހާއްސަކޮށް ކޮންމެ އަހަރަކު ވެސް ސިންގަޕޫރުގައި ބާއްވާ ޝަންގްރިއްލާ ޑައިލޮގްގެ މިއަހަރުގެ ބައްދަލުވުމުގެ ތެރެއިން މެލޭޝިޔާގެ ޑިފެންސް މިނިސްޓަރު، މޮހައްމަދު ޚާލިދް ބިން ނޫރައްދީންއާ ރާއްޖޭގެ ޑިފެންސް މިނިސްޓަރު، ގައްސާން މައުމޫން ބައްދަލު ކުރައްވައިފި އެވެ.
ޑިފެންސް މިނިސްޓަރީން އެކްސްގައި ކުރި ޕޯސްޓެއްގައި ބުނީ އެ ބައްދަލުވުމުގައި ދެގައުމުގެ ދެމެދުގައި އޮންނަ ޒަމާންވީ ހާރިޖީ ގުޅުމުގެ އިތުރުން ދެގައުމުގެ ދިފާއީ ގުޅުންތައް އިތުރަށް ވަރުގަދަ ކުރަން މަޝްވަރާ ކުރެވުނު ކަމަށެވެ.
އިންޓަނޭޝަނަލް އިންސްޓިޓިއުޓް ފޯ ސްޓްރެޓެޖިކް ސްޓަޑީސް (އައިއައިއެސް) އިން އިންތިޒާމު ކޮށްގެން ބާއްވާ ޝަންގްރިއްލާ ޑައިލޮގްއަކީ އޭޝިއާ ޕެސިފިކް ސަރަހައްދުގެ ކުރިއަރަމުން އަންނަ ގައުމުތަކަށް ހާއްސަކޮށް ބާއްވާ ބައްދަލުވުމެކެވެ.
އެ ބައްދަލުވުމަކީ ސަރަހައްދީ ލެވެލްގައި ސެކިއުރިޓީ ބެލަހައްޓާ ޕޮލިސީމޭކަރުން އެއްތަނަކަށް އެއްވެ މަޝްވަރާ ކުރުމެވެ.
