ގިރާވަރު ފަޅުން ގުޅިފަޅަށް ގޯތި ބަދަލުކުރާ މީހުންގެ މެދުގައި އަންނަ އަންގާރަ ދުވަހު ގުރުނަގަން ނިންމައިފި އެވެ.
އެ ފުރުސަތުގައި ޖުމްލަ 2،210 މީހުން ގޯތި ބަދަލުކުރުމަށް އެދި ހުށަހެޅި އެވެ. ގުރުނެގުމަށް ތާވަލުކޮށްފައިވަނީ އަންނަ އަންގާރަ ދުވަހުގެ މެންދުރު 12 ޖަހާއިރު، ދަރުބާރުގޭ ރަންނަބަނޑޭރި މާލަމުގަ އެވެ.
ހައުސިން މިނިސްޓްރީން ބުނިގޮތުގައި ގުރުނަގާ ފޮއްޓަށް އަމިއްލައަށް ނަން ލާން ބޭނުންވާ މީހުން އެ ދުވަހުގެ ހެނދުނު 9 – 10އާ ދެމެދުގެ ވަގުތެއްގައި ހާޒިރުވާން ޖެހޭނެއެވެ. ލިސްޓުގައި ހިމެނޭ މީހަކަށް ހާޒިރު ނުވެވޭ ނަމަ ނުވަތަ ބަދަލުގައި މީހަކު ފޮނުވަން ބޭނުންވާ ނަމަ އެ މީހެއްގެ މައުލޫމާތު ހިޔާވަހި ޕޯޓަލްމެދުވެރިކޮށް ހުށަހަޅަންވާނެ؛ މައުލޫމާތު ހުށަހަޅަން ހުޅުވާލާނީ މާދަމާ ހެނދުނު 10އިން ހޯމަ ދުވަހުގެ މެންދުރު 12އަށެވެ.
ގޯތި ބަދަލުކުރާ މީހުންގެ މެދުގައި ގުރުއަތު ނަގަން ޖެހުނީ އެކަމަށް ހުޅުވާލި ފުރުސަތުގައި ބައެއް ކެޓަގަރީތަކުން އެދުނު މީހުންގެ އަދަދު، ބަދަލުކުރާ ގޯތީގެ އަދަދަށް ވުރެ އިތުރުވުމުންނެވެ. އެގޮތަށް އިތުރުވީ 1،250 އާއި 1،650 އަކަ ފޫޓުގެ ގޯތި ބަދަލުކުރުމަށް ހުށަހަޅާފައިވާ މީހުންގެ އަދަދެވެ.
ނަމަވެސް 2،450 އަކަ ފޫޓާއި 2،050 އަކަ ފޫޓުގެ ގޯއްޗަށް އެދި ހުށަހަޅާފައިވަނީ ކަނޑައަޅާފައިވާ އަދަދަށް ވުރެ މަދުން ކަމަށްވާތީ އެ ކެޓަގަރީތަކުން ގުރުއަތުލުމެއް ނޯންނާނެ އެވެ.
