އެމްޑީޕީއާއި ޑިމޮކްރެޓްސްއިން ސިޔާސީ ހަރަކާތް ހިންގި ހަރުގެ ޕީއެންސީން ކުއްޔަށް ހިފައިފިއެވެ. އެނގިފައިވާ ގޮތުގައި ޕީއެންސީން މި ހަރުގެ ކުއްޔަށް ހިފާފައިވަނީ 5 އަހަރު ދުވަހަށެވެ.
ދަ ޑިމޮކްރެެޓްސްގެ ހަރުގެ މިހާރު ހުރި ތަނުގައި ކުރިން ހިންގަމުން އައީ މައި އިދިކޮޅުޕާޓީ އެމްޑީޕީގެ ހަރުގެ އެވެ. އެ ބިމުގެ ވެރިފަރަތަކީ އެ ޕާޓީގެ ކުރީގެ އެކްޓިވިސްޓް ޝަފީޢާ ޒުބައިރެވެ. އެމްޑީޕީ ތެރޭގައި ދެ ފެކްޝަން އުފެދި, ކޯޅުން ބޮޑުވެފައި ވަނިކޮށް ޕާޓީގެ މައި ހަރުގެ ހުސްކުރަން އެންގީ މާޗް 31، 2023 ގަ އެވެ.
ޝަފީޢާ އޭރު ބުނީ މިހާރު އެ ބިން އޭނާ ކުއްޔަށް ދޫކުރީ ވިޔަފާރިވެރިޔަކަށް ކަމަށެވެ. އެއީ އެ ވިޔަފާރިވެރިޔާ އެހެން ބަޔަކަށް ވެސް ކުއްޔަށް ދެވޭ ގޮތަށެވެ. އެ އިމާރާތް ޑިމޮކްރެޓުންގެ ފަރާތުން ނެގީ އެ ވިޔަފާރިވެރިޔާއާ އެކު ހެދި ސަބް ލީސް އެއްބަސްވުމެއްގެ ދަށުން ކަން އެ ޕާޓީން އޭރު ބުންޏެވެ.
އެހެންނަމަވެސް ފަހުން އެ ތަނުގައި ޑިމޮކްރެޓްސްގެ ހަރުގެ ހިންގުމަށްފަހު، ފާއިތުވި މަޖިލިސް އިންތިޚާބަށް އެޕާޓީއަށް ކުރިމަތިވި ބޮޑު ބައްޔަށްފަހު އެ ހަރުގެ ވަނީ ރޫޅާލަން ފަށާފައެވެ.
ޖަގަހައެއް ހިންގުމަށް އެންމެ އެކަށީގެންވާ ތަނުގައި، ބޮޑުތަކުރުފާނުގައި މަގުގައި ހުންނަ، ގިނަ ދުވަސްތަކެއްވަންދެން އެމްޑީޕީގެ ޖަގަހަ ހިންގި މި ތަން ރޫޅާލަން ފެށިއިރު، ޑިމޮކްރެޓްސްގެ ބައެއް އިސް ފަރާތްތަކުން ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ ޖަގަހަ ހުސް ކުރަމުންދަނީ އެތަނުގައި އިމާރާތެއް އެޅުމަށް ގޭގެ ވެރިފަރާތުން ބޭނުންވެގެން ކަމުގައެވެ.
ޕީއެންސީގެ ހަރުގެ ހިންގުމަށް ހ. ވެޔޮވިލާ ކުއްޔަށް ދޫކޮށްފައިވާއިރު، އެ އިމާރާތުގެ ވެރިފަރާތް ކަމުގައިވާ ޝަފީޢާ މިހާރު ގެންދަވަނީ ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ. މުހައްމަދު މުއިއްޒަށް ތާއީދު ކުރައްވަމުންނެވެ.
މި ހަރުގެއަށް މިހާރުވަނީ ޕީއެންސީގެ ސިޔާސީ ހަރަކާތް ހިންމުމަށް ބޭނުންވާ ބަދަލުތައް ގެންނާން ފަށާފައެވެ.
