ސްރީލަންކާގެ ޓޫރިސްޓް ވިސާ ސްކީމަށް ދާދި ފަހުން ގެނައި ބަދަލުތައް ރާއްޖޭގެ ފޮރިން މިނިސްޓްރީން ސާފުކޮށްދީފިއެވެ.
ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، ސްރީލަންކާގައި އީ-ވިސާގެ އާ ނިޒާމެއް އިއުލާނު ކުރުމާ އެކު، ދިވެހި ދަތުރުވެރިންނަށް ލުއި ފަސޭހަ އިންތިޒާމްތަކެއް ހަމަޖެއްސުމަށް ޓަކައި އެ މިނިސްޓްރީން އަންނަނީ ސްރީލަންކާއާއެކު މަޝްވަރާކުރަމުން ކަމުގައެވެ.
އަދި މިހާރު އަމަލުކުރަމުން އަންނަ އުސޫލުގެ ދަށުން ސްރީލަންކާއަށް ދިއުމުން ދިވެހިންނަށް ހިލޭ 30 ދުވަހުގެ ޓޫރިސްޓް ވިސާ ލިބޭނެ ކަމަށާއި، އަދި 30 ދުވަހަށްވުރެ ދިގު މުއްދަތަކަށް ތިބޭ ނަމަ https://www.srilankaevisa.lk/ ލިންކު މެދުވެރިކޮށް އޮންލައިންކޮށް ހިލޭ 6 މަސް ދުވަހުގެ ވިސާއަށް އެދި ހުށަހެޅޭނެ ކަމަށެވެ. އަދި މި ވިސާގެ ސަބަބުން އިދާރީ ފީއެއް ނަގާނެކަމަށްވެސް ފޮރިން މިނިސްޓްރީން ބުނެފައި ވެއެވެ.
އަދި މިހާރުވެސް ސްރީލަންކާގައި ތިބި އަދި ވިސާގެ މުއްދަތު އިތުރުކުރަން ޖެހިފައިވާ ދިވެހިންނަށް ކޮލަމްބޯގައި ހުންނަ ދިވެހިރާއްޖޭގެ ހައިކޮމިޝަނަށް ގުޅުއްވައި މައުލޫމާތު ހިއްސާ ކުރުމަށާއި، ރާއްޖެއާއި ސްރީލަންކާއާ ދެމެދު މިހާރު ވެފައިވާ ވިސާ އެއްބަސްވުމާއި އެއްގޮތަށް އަދި ދިވެހި ދަތުރުވެރިންނަށް ހަމަހަމަކަން ކަށަވަރުކޮށްދޭ ގޮތަށް ވިސާގެ މައްސަލަ ހައްލުކުރުމަށް މިނިސްޓްރީން މަސައްކަތް ކުރަމުންދާކަމަށްވެސް ބުނެފައި ވެއެވެ.
އަދި ބާކީ ހުރި ކަންބޮޑުވުންތަކަށް ހައްލެއް ހޯދުމަށް ސްރީލަންކާގެ ކަމާބެހޭ ފަރާތްތަކާ އެކު މަޝްވަރާ ކުރަމުން އަންނަ ކަމަށާއި، ސްރީލަންކާއަށް ޒިޔާރަތްކުރަން ބޭނުންވާ ދިވެހިން އިތުރު އެހީތެރިކަމަށް ބޭނުންވާނަމަ މިނިސްޓްރީއަށް ގުޅައި މައުލޫމާތު ހިއްސާކުރެއްވުމަށްވެސް މިނިސްޓްރީން އެދިފައި ވެއެވެ.
