ދުނިޔޭގެ ގައުމުތަކުގައި ކޯވިޑް19ގެ އާ ސްޓްރެއިންއެއް (ކޮރޯނާ ވައިރަސް މިއުޓޭޓްވެގެން އުފެދޭ ވައިރަހުގެ ތަފާތު ނަކަލެއް) ފެތުރެމުންދާތީ އަޅާ ފިޔަވަޅެއްގެ ގޮތުން، ސައުދީއަށް އޮޕަރޭޓްކުރާ ހުރިހާ ފްލައިޓެއް އެގައުމަށް ޖެއްސުމުގެ ހުއްދަ ދިނުން ސައުދީ ސަރުކާރުން ވަގުތީ ގޮތުން ހުއްޓާލާފިއެވެ.

ސައުދީ އަރަބިއާގެ މިނިސްޓްރީ އޮފް އިންޓީރިއަރގެ އޮފިޝަލުން މައުލޫމާތު ދޭގޮތުގައި، ދުނިޔޭގެ ގައުމުތަކުގައި މިހާރު ކޮރޯނާ ވައިރަހުގެ އާސްޓެރެއިންއެއް ފެތުރެމުންދާ ކަމަށް އެގައުމުގެ ހެލްތު މިނިސްޓްރީން އަންގާފައިވާތީ، މިހާރު ފެތުރެމުންދާ ސްޓްރެއިންގެ ހަގީގަތް މުޅިން ސާފުވަންދެން، އަޅާ ރައްކާތެރިކަމުގެ ފިޔަވަޅެއްގެ ގޮތުން، އެގައުމުގެ ބޯޑަރު މިހާރުވަނީ އެއް ހަފްތާގެ މުއްދަތައް ބަންދު ކޮށްފައެވެ.

މިގޮތުން އަޅާ ފުރަތަމަ ފިޔަވަޅެއްގެ ގޮތުން އަޅަން ނިންމާފައިވާ ފިޔަވަޅަކީ، އެގައުމަށް ވައިގެ މަގުން ކުރަމުންދާ ހުރިހާ ދަތުރުތައް ހުއްޓާލުމެވެ. މިފިޔަވަޅު އަޅާފައިވަނީ، ސައުދީ ސަރުކާރުން ހުއްދަދޭ ޚާއްސަ ފަރާތްތަކަށް މެނުވީ ސައުދީއަށް އެތެރެ ނުވެވޭ ގޮތަށް އެއް ހަފްތާގެ މުއްދަތަކަށެވެ. އެހެންނަމަވެސް، މިއަދު މިފިޔަވަޅު އެޅިއިރު، އެގައުމަށް އެތެރެވެފައިވާ ފްލައިޓްތަކަށް އެގައުމުން ފުރައިގެން ދިއުމުގެ ހުއްދަ ދޫކުރެވިފައިވާ ކަމަށްވެސް ސައުދީގެ އިންޓީރިއަރ މިނިސްޓްރީން ހާމަ ކޮށްފައި ވެއެވެ.

ސައުދީއަށް ވައިގެން މަގުން ކުރާ ހުރިހާ ދަތުރުތަކެއް ހުއްޓާލުމަށް އެގައުމުން މިވަގުތަށް ނިންމާފައިވަނީ އެއްހަފްތާގެ މުއްދަތަކަށް ކަމުގައި ވިނަމަވެސް، މި ފިޔަވަޅު އިތުރު އެއްހަފްތާގެ މުއްދަތަށް އިތުރުކުރުމަކީ އެކަށީގެންވާ ކަމެއް ކަމަށްވެސް ރަސްމީ ފަރާތްތަކުން މައުލޫމާތު ދެއެވެ.

ވައިގެ މަގުން ކުރާ ހުރިހާ ދަތުރުތައް ވަގުތީ ގޮތުން ސަސްޕެންޑް ކުރުމަށް ނިންމާފައިވާއިރު، އެއްގަމު މަގުންނާއި އަދި ޕޯޓުތައް މެދުވެރިކޮށް ކަނޑުމަގުންވެސް، ގައުމުން ބޭރުގެ ރައްޔިތުން އެގައުމަށް އެތެރެވުމުގެ ހުއްދަ ދޫކުރުން ވަނީ އެއް ހަފްތާއަށް މެދުކަޑާލެވިފައެވެ.

މީގެއިތުރުން، ޔޫރަޕްގެ ހުރިހާ ގައުމަކުންނާއި، އަދި އެނޫނަސް ކޮރޯނާ ވައިރަހުގެ އާ ސްޓްރެއިން ފެނިފައިވާ އެއްވެސް ގައުމަކުން، މިހިގާ ޑިސެމްބަރު މަހުގެ 8 ވަނަ ދުވަހުގެ ފަހުން އެގައުމަށް ދަތުރު ކޮށްފައި ވާނަމަ، ތިރީގައި މިވާ ފިޔަވަޅުތަކަށް ތަބާވުމަށްވެސް ސައުދީގެ ހެލްތު މިނިސްޓްރީން ވަނީ އަންގާފައެވެ.

މިގޮތުން އެޅުމަށް ނިންމާފައިވާ ފިޔަވަޅުތަކަކީ:

• ސައުދީއަށް އެތެރެވެފައިވާ ދުވަހުން ފެށިގެން ދެ ހަފްތާއަށް ހޯމް ކަރަންޓީނަށް ދިއުން
• ހޯމް ކަރަންޓީނަށް ދާދުވަހުން ފެށިގެން ކޯވިޑް19 އަށް ޓެސްޓު ކުރުމާއެކު، ހޯމް ކަރަންޓީނުގައި ހުންނަ ދުވަސްތަކުގައި ކޮންމެ 5 ދުވަހަކުން ކޯވިޑް19 އަށް ޓެސްޓު ކުރަމުން ގެންދިއުން

އަދި މީގެއިތުރުން، ފާއިތުވެދިޔަ 3 މަސްދުވަހުގެ ތެރޭގައި ޔޫރަޕްގެ ގައުމުތަކާއި އަދި މީގެ އިތުރުން ކޮރޯނާ ވައިރަހުގެ އާ ސްޓްރެއިން ފެނިފައިވާ ގައުމަކަށްވެސް ދަތުރު ކޮށްފައިވާ ފަރާތްތައް ނުވަތަ، ޔޫރަޕްގެ ގައުމެއްގައި ޓްރާންސިޓް ކޮށްފައިވާ ފަރާތެއް ނަމަވެސް، އަލުން ކޯވިޑް ޓެސްޓް ހަަދަން ޖެހޭގޮތަށްވެސް ސައުދީގެ ކަމާބެހޭ މުވައްސަސާތަކުން ވަނީ ނިންމާފައެވެ.

ސައުދީ އަރަބިއާގެ ހެލްތު މިނިސްޓްރީންނާއި އަދި ޓްރާންސްޕޯޓު މިނިސްޓްރީގެ ކަމާބެހޭ އޮފިޝަލުން ބައެއް މީޑިއާތަކަށް މައުލޫމާތު ދީފައިވާގޮތުގައި، ކޮރޯނާ ވައިރަހުގެ އާ ސްޓެރެއިން ފެތުރެމުން ނުދާ ގައުމުތަކުން އެގައުމަށް މުދާ އެރެތެރެ ކުރުމާއި، މުދާ ބޭރުކުރުމުގައި އެއްވެސް ހުރަހެއް ނެތެވެ.

ސައުދީ އިންޓީރިއަރ މިނިސްޓްރީން ހާމަކޮށްފައިވާ ގޮތުގައި، ކޯވިޑް19އާއި ގުޅިގެން އެގައުމުން އަލަށް މިއެޅި ފިޔަވަޅުތައް، ހެލްތު މިނިސްޓްރީން ދޭ މައުލޫމާތުގެ މައްޗަށް އަލުން މުރާޖައާ ކުރަމުން ދާނެއެވެ.

ފާއިތުވެދިޔަ ހަފްތާގައި ސައުދީ އަރަބިއާއިން ވަނީ އެގައުމުގައި ކޯވިޑް19 ވެކްސިން ދޭން ފަށާފައެވެ.

ސަައުދީ ހެލްތު މިނިސްޓްރީން ބުނެފައިވަނީ، ވަކްސިން ޖެހުމުގެ ކެމްޕޭންގެ ފުރަތަމަ ފޭސް މިމަހުގަ ފެށިގެންދާ ގޮތަށް އަންނަ އަހަރުގެ މާޗްމަހާ ހަމައަށް އެގައުމުގައި ކުރިޔަށް ދާނެއެވެ. އަދި ވެކްސިން ޖެހުމުގައި އެންމެ އިސްކަން ދެވޭނީ، އުމުރުން 65 އަހަރުން މަތީގެ މީހުންނަށާ، ސިއްޙީ އެހީތެރިންނާއި، އަދި ބޮޑެތި ބަލިތަކަށް ފަރުވާ ހޯދަމުންދާ މީހުންނަށް ކަމަށްވެސް އެމިނިސްޓްރީން ހާމަ ކޮށްފައިވެއެވެ.

ވެކްސިން ޖެހުމުގެ ދެވަނަ ފޭސް ސައުދީގައި ކުރިޔަށް ގެންދިއުމަށް ހަމަޖެހިފައިވަނީ، މާރޗް މަހުން ފެށިގެން ޖޫން މަހުގެ ނިޔަލަށެވެ. މި ފޭސްގައި އިސްކަން ދިނުމަށް ހަމަޖެހިފައިވަނީ، އުމުރުން 50 އަހަރުން މަތީގެ މީހުންގެ އިތުރުން، ނޭވާ ހިއްލުމުގެ ބަލި ހުންނަ މީހުންނާ، ހަކުރު ބަލީގެ މީހުންނާ، ހިތުގެ ބައްޔަށް ފަރުވާ ހޯދަމުންދާ މީހުންގެ އިތުރުން، ކެންސަރު ބައްޔަށް ފަރުވާ ހޯދަމުންދާ މީހުންނެވެ.

ސައުދީ ސަރުކާރުން ހަމަޖައްސާފައިވާ ގޮތުގައި، ތައުލީމީ ދާއިރާގައި މަސައްކަތް ކުރާ ފަރާތްތަކަށް ވެކްސިން ދޭން ފެށިގެންދާނީ، އަންނަ އަހަރުގެ ޖުލައި މަހުން ފެށިގެންނެވެ. އަދި އަމިއްލަ ކުންފުނިތަކުގައާއި އަދި ސަރުކާރުގައި މަސައްކަތް ކުރާ އާންމު މުވައްޒަފުންނަށް ވެކްސިން ދޭން ފެށޭނީ އަންނަ އަހަރުގެ ސެޕްޓެމްބަރު މަހުން ފެށިގެންނެވެ.

ސައުދީ އަރަބިއާގައި މިހާތަނަށް މުޅި ޖުމްލަ 361،000 މީހުން ކޯވިޑް19 އަށް ޕޮޒިޓިވް ވެފައިވާއިރު، ޖުމްލަ 6122 މީހުން ވަނީ އެގައުމުގައި މިބަލީގައި މަރުވެފައެވެ.