"ޖަމިއްޔާތަކުގެ މަހާސިންތާ 2024″ މި މަހު ގއ. ވިލިނގިލީގައި ބޭއްވުމަށް ނިންމައި ތައްޔާރީތައް ފަށައިފިއެވެ.
ޔޫތު މިނިސްޓްރީން ބުނި ގޮތުގައި މި މަހާސިންތާ ކުރިއަށް ދާނީ އަންނަ ހޮނިހިރު ދުވަހުން ފެށިގެން ހޯމަ ދުވަހުގެ ނިޔަލަށް ކަމަށެވެ. އެ މަހާސިންތާގަައި ޖުމްލަ 60 ފަރާތަކުން ބައިވެރިވާނެ ކަމަށް ވެސް ޔޫތު މިނިސްޓްރީން ވަނީ ބުނެފައެވެ.
އެ މަހާސިންތާއަކީ މަދަނީ ޖަމިއްޔާތައް ހިންގުމުގައި ހުރި ގޮންޖެހުންތައް ދެނެގަނެ، ހަރުދަނާ މަދަނީ މުޖުތަމައެއް ބިނާކޮށް ޖަމިއްޔާތަކަށް ފަހި ވެއްޓެއް ގާއިމު ކުރުމަށް ބޭނުންވާ ކަންކަން ދެނެގަތުމާއި ގައުމީ ތަރައްގީ އަށް ވާސިލުވުމަށް ވަކިވަކި ރަށްރަށާއި، އަތޮޅު ފެންވަރުގައި ހުރި އިޖުތިމާއީ ތަފާތު މައްސަލަތަކުން އަރައިގަތުމަށް ކުރެވޭ މަސައްކަތްތަކުގައި އަމިއްލަ ޖަމިއްޔާތަކުން އަދާކުރާ ދައުރާ ގުޅޭ ގޮތުން ހޭލުންތެރިކަން އިތުރުކޮށް، ޖަމިއްޔާތައް ގުޅިގެން މަސައްކަތް ކުރުމަށް ބާރު އެޅުމުގެ ގޮތުން ރޭވިގެން ކުރިއަށްގެންދާ މަހާސިންތާއެކެވެ.
މި ފަހަރުގެ މަހާސިންތާގައި ބައިވެރިވަނީ އަތޮޅަށް ނިސްބަތްވާ ޖަމިއްޔާތަކާއި ރަށްރަށުގެ ރަށު ކައުންސިލްތަކާއި، އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކާއި މިނިސްޓްރީ އޮފް ފެމިލީ އެންޑް ސޯޝަލް ޑިވެލޮޕްމެންޓް އަދި މޯލްޑިވްސް ޕޮލިސް ސާވިސްގެ ގއ. އަތޮޅުގައި ހަރަކާތްތެރިވާ މުއައްޒަފުންނެވެ.
އެ މަހާސިންތާގެ މަގްސަދުގެ ތެރޭގައި ގއ. އަތޮޅުގައި ހަރަކާތްތެރިވާ ޖަމިއްޔާތަކުގެ ހިންގުން ހަރުދަނާ ކުރުމާއި ޖަމްއިއްޔާތަކުގެ މަސައްކަތާއި ގުޅުން ހުރި ސެކްޓާތަކާއި ދެމެދު ގުޅުން ބަދަހިކުރުމާއި އަމާން ވެއްޓެއް ގާއިމް ކުރުމަށް ކުރެވޭ މަސައްކަތުގައި ޖަމިއްޔާތަކުގެ ދައުރު އިތުރު ކުރުމާއި މުޖުތަމައު ބާރުވެރިކުރުވުމަށް ކަމާއި ގުޅޭ މުއައްސަސާތަކުން ކުރާ މަސައްކަތުގައި މަދަނީ ޖަމިއްޔާތަކުގެ ބައިވެރިވުން އިތުރު ކުރުން ހިމެނެއެވެ.
އެ މަހާސިންތާގައި ޖުމްލަ ހަ ފަރާތަކުން ތަފާތު އެކި މައުލޫއުތަކަށް ސެޝަންތައް ނަގައިދިނުމަށް ވަނީ ހަމަޖެހިފައެވެ.
