ރައްޔިތުންގެ މަޖިލީހުގެ ކުރެންދޫ ދާއިރާގެ އިންތިޚާބީ މެމްބަރު ޝާމިން ޙަބީބު މިއަދު ޕީއެންސީއާ ގުޅިވަޑައިގެންފިއެވެ. އޭނާ ޕީއެންސީއަށް ސޮއި ކުރެއްވީ މިއަދު މުލިއާގޭގައި އޮތް ހަފްލާއެއްގައެވެ. އޭނާ ޕީއެންސީއަށް ސޮއި ކުރެއްވުމަށްފަހު ފޯމު ހަވާލުކުރެއްވީ ރައީސް މުއިއްޒުއާއެވެ.
އޭނާ މިއަދު ޕީއެންސީއަށް ސޮއި ކުރައްވާފައިވާއިރު، ފާއިތުވި އިންތިޚާބުގެ ތެރޭގައި އޭނާ ވިދާޅުވެފައިވަނީ މިނިވަން މެމްބަރެއްގެ ގޮތުގައި ހޮވިއްޖަމަ ދެމިހުންނާނީ މިނިވަން މެމްބަރެއްގެ ގޮތުގައި ކަމުގައެވެ.
ފާއިތުވި ރައްޔިތުންގެ މަޖިލިހުގެ އިންތިޚާބުގެ ސުޕަރ މެޖޯރިޓީ ޕީއެންސީން ހޯދާފައިވާއިރި، މިނިވަން މެމްބަރުންގެ ގޮތުގައި މަޖިލީހަށް އިންތިޚާބުވި ގިނަ މެމްމަރުންވެސް މިހާރުވަނީ ޕީއެންސީއަށް ސޮއި ކޮށްފައެވެ. އެގޮތުން ޕީއެންސީގެ މަޖިލިސް މެމްބަރުންގެ އަދަދު މިހާރުވަނީ 80 އަށްވުރެ މައްޗަށް ގޮސްފައެވެ.
މަޖިލިހުގައި ޕާޓީތަކަށް ނިސްބަތްވާ މެމްބަރުންގެ ގޮތުގައި މިހާރު ތިއްބެވީ އެމްޑީޕީގެ 12 މެމްބަރުންނާއި، އެމްޑީއޭގެ 2 މެމްބަރުންނާއި، ޖުމުހޫރީ ޕާޓީގެ އެއް މެމްބަރަކާ އަދި އެމްއެންޕީގެ 1 މެމްބަރެކެވެ.
އާމަޖިލިސް ހުވާކުރުމަށް ހަމަޖެހިފައިވަނީ މިމަހުގެ 28 ވަނަ ދުވަހުއެވެ.
