2017 ގައި މާފަންނު އައިޓަމްސް ފިހާރަ ކައިރީ މޫސާ އަހުމަދު ގަޔަށް ވަޅި ހަރައި މަރާލި މައްސަލާގައި ދައުވާކޮށްފައިވާ އިބްރާހިމް ސައްމާހު އަހުމަދު ފަތުހީގެ ބަންދާ މެދު ހައި ކޯޓުން ގޮތެއް ނިންމަން ސުޕްރީމް ކޯޓުން ދިން ވަގުތު ހަމަވިއިރުވެސް ގޮތެއް ނުނިންމުމުން ސުޕްރީމް ކޯޓަށް ޕްރޮސެކިއުޓަރ ޖެނެރަލްގެ އޮފީހުން ސިޓީއެއް ފޮނުވައިފިއެވެ.
އެނގިފައިވާ ގޮތުގައި ސުޕްރީމް ކޯޓުގެ އެންގުމާ އެއްގޮތަށް ހައިކޯޓުން އަމަލުކޮށްފައިނުވާ މައްސަލަ ޖުޑީޝަލް ސާވިސް ކޮމިޝަން (ޖޭއެސްސީ) އަށް ހުށަހަޅަންވެސް ޕީޖީ އޮފީހުން އަންނަނީ ވިސްނަމުންނެވެ.
ވ. ކެޔޮދޫ، ދޭލިޔާގޭ 19 އަހަރުގެ މޫސާ އަހްމަދަށް ޒުވާނަކަށް ވަޅިން ހަމަލާދީ މަރާލި ކަމަށް ތުހުމަތު ކުރެވޭ އިބްރާހިމް ސައްމާހުގެ ބަންދާ ގުޅޭގޮތުން ހައިކޯޓުން ގޮތެއް ކަނޑަނޭޅުމުން އޭނާ ވަނީ ބަންދުން މިނިވަން ވެފައެވެ.
ސަމާހުގެ މައްޗަށް ދައުލަތުން ދައުވާ ކޮށްފައިވަނީ ތޫނު އެއްޗެއްގެ ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެއްވެ. އެ ދައުވާ ދަށުކޯޓުން ސާބިތުވެފައެއް ނުވެއެވެ. އެހެންނަމަވެސް ދައުލަތުން ވަނީ އެ ދައުވާ ހައި ކޯޓުގައި އިސްތިއުނާފް ކޮށްފައެވެ. ދައުލަތުން ހައުކޯޓުގައި އެދިފައިވަނީ ޝަރީއަތް ނިމެންދެން އެ މައްސަލާގައި އޭނާ ބަންދު ކޮށްދިނުމަށެވެ.
އެހެންނަމަވެސް ހައިކޯޓުންވެސް އޭނާ ބަންދުކުރުމަށް ހައުކޯޓު ހުކުމް ނުކުރި މައްސަލަ ދައުލަތުން ސުޕްރިމްކޯޓުގައި އިސްތިއުނާފް ކުރުމުން އެ ކޯޓުން ހުކުމް ކޮށްފައިވަނީ އޭނާ ހަތްދުވަހަށް ބަންދުކޮށް، އޭނާގެ ބަންދާމެދު ހައި ކޯޓުން ގޮތެއް ނިންމުމަށެވެ.
ފާއިތުވި ހަފްތާގައި ސުޕްރިމް ކޯޓުން ކުރި ހުކުމާއެކުވެސް، ހައިކޯޓުން އޭނާގެ ބަންދާމެދު ގޮތެއް ނިންމާފައި ނުވާތީ، ސުޕްރިމް ކޯޓުން ކަނޑައެޅި ބަންދުގެ މުއްދަތުހަމަވެ، އޭނާވަނީ ބަންދުން މިނިވަން ވެފައެވެ.
މޫސާ އަހްމަދުގެ މަރުގެ މައްސަލާގައި ދައުލަތުން 3 މީހެއްގެ މައްޗަށް ހުކުމް ކުރިނަމަވެސް ކުށް ސާބިތުވެފައިވަނީ ސ. ހިތަދޫ, މުޑުދާސްގެ، އަލީ ހަސަންގެ މައްޗަށް އެކަންޏެވެ. އޭނާގެ މައްޗަށް އިއްވާފައިވަނީ 15 އަހަރުގެ ޖަލު ހުކުމެކެވެ.
