ރާއްޖޭގެ އެކި ހިސާބުތަކަށް ކުރަމުންދާ ވިއްސާރައިގައި އައްޑޫ ސިޓީ ފޭދޫއަށް ބޯކޮށް ވާރޭވެހި ބައެއް މަގުތަކުގައި ފެން ބޮޑުވުމުން، ފެން ހިންދުމުގައި އެމްއެންޑީއެފް ސަދަން އޭރިއާ ކޮމާންޑް، ސ.ހިތަދޫ ފަޔަރ ސްޓޭޝަނުން ހަރަކާތްތެރިވެއްޖެއެވެ.
އައްޑޫ ސިޓީ ފޭދޫގެ މަގުތަކުން ފެން ހިންދުމުގެ މަސައްކަތް އެމްއެންޑީއެފް ސަދަން އޭރިއާ ކޮމާންޑް، ސ.ހިތަދޫ ފަޔަރ ސްޓޭޝަނުން ފަށާފައިވަނީ ރޭ 22:45 ހާއިރުއެވެ. ޕަމްޕު ބޭނުންކޮށްގެން ފެންހިއްކުމުގެ މަސައްކަތުގައި އެމްއެންޑީއެފް ސަދަން އޭރިއާ ކޮމާންޑް، ސ.ހިތަދޫ ފަޔަރ ސްޓޭޝަނުގެ ފަޔަރ ފައިޓަރުން ވަނީ 23:50 ހާއިރު ވަންދެން ހަރަކާތްތެރިވެފައެވެ. އެގޮތުން މަގުތަކުގައި ބޮޑުވެފައިހުރި ފެންގަނޑު ހިއްކައި، މިހާރު ވަނީ އާންމު ހާލަތަކަށް ގެނެވިފައެވެ.
ރާއްޖޭގެ ބޮޑުބަޔަކަށް ވިއްސާކުރަމުންދާއިރު، މެޓް އޮފީހުންވަނީ މިއަދު ހެނދުނު ރީނދޫ އެލާޓް ނެރެފައެވެ. އަދި ކޮންމެހެން ކުރާންޖެހޭ ކަނޑު ދަތުރުތައްމެނުވީ ނުކުރުމަށް އެމްއެންޑީއެފްއިންވަނީ އިލްތިމާސް ކޮށްފައެވެ.
މިހާރު ކުރަމުންދާ ވިއްސާރާގައި ރާއްޖެ އެކި ހިސާބުތަކުގައި ދަނީ އެކި ހާދިސާތައް ހިނގަމުންނެވެ.
