ތ. ކަނޑޫދޫގެ އުމުރުން 10 އަހަރުގެ ކުޑަ ކުއްޖެއްގެ ގައި މައްޗަށް ފާރެއް ވެއްޓި ބޮޑެތި އަނިޔާތަކެއް ވެއްޖެއެވެ.
އެރަށުގެ ކައުންސިލް ރައީސް ބައެއް މީޑިއާތަކަށް މައުލޫމާތު ދެއްވަމުން ވިދާޅުވީ ކުޑަކުއްޖާގެ ގައިމައްޗަށް ފާރު ވެެއްޓުނީ ކުޅެން އުޅުމަށްފަހު ހިނގާފައި ދަނިކޮށް ކަމުގައެވެ. މި ހާދިސާ ހިނގާފައިވަނީ މިއަދު ހަވީރު 5:30 ހާއިރުއެވެ.
ކައުންސިލް ރައީސް ވިދާޅުވެފައިވަނީ މި ހާދިސާގައި ބޮޑަށް އަނިޔާވެފައިވަނީ އުނަގަނޑުން ތިރިއަށްކަމަށް ބެލެވޭ ކަމަށާއި، އެކުއްޖާގެ ފަޔަށާއި އަތުގެ އިތުރުން މޫނަށްވެސް އަނިޔާވެފައިވާ ކަމުގައެވެ. އޭނާ ވިދާޅުވެފައިވަނީ އެ ކުއްޖާ އޮތީ މިވަގުތު ރަށުގެ ސިއްޙި މަރުކަޒުގައި އެޑްމިޓް ކޮށްފައި ކަމަށާއި، އެހެންނަމަވެސް އެތެރެހައްޓަށް ލިބިފައިވާ ގެއްލުންތައް އިގޭނީ ޓެސްޓު ހެދުމަށްފަހު ކަމަށެވެ.
އޭނާ ވިދާޅުވެފައިވަނީ މޫސުން ގޯސަކަމުން އިތުރުފަރުވާއަށް އެކުއްޖާ އެހެންރަށަކަށް ގެންދެވޭނެގޮތް ވެފައި ނުވިނަމަވެސް، އެކުއްޖާގެ ހާލު އެހާ ގޯސް ނޫންކަމުގައެވެ.
މިހާރު މުޅި ރާއްޖެއަށް ކުރަމުންދާ ވިއްސާރާގައި، ތަކެތި ވަރާ ވިއްސައިގެން ދިއުމާއި އަދި އުސް އިމާރާތްތަކުގައި ހަރުކޮށްފައި ހުންނަ ތަކެތި ވެއްޓުމުގެ ފުރުސަތު އޮތުމުން އެކަމަށް ސަމާލުވުމަށް ފުލުހުންވަނީ އިލްތިމާސް ކޮށްފައެވެ.
