ރާއްޖޭގައި ޒިކާ ވައިރަސް ފެތުރޭކަމަށް ފެތުރުނު ވާހަކައަކީ ރަނގަޅު ވާހަކައެއް ނޫންކަމުގައި ހެލްތު މިނިސްޓްރީން ބުނެފިއެވެ.
ރާއްޖޭގެ ބައެއް މީޑިއާތަކުގައި މިއަދު، ރާއްޖޭގައި ޒިކާ ވައިރަސް ފެތުރޭކަމަށް ރިޕޯޓުކޮށްފައިވަނީ މަދިރީގެ ޒަރީއާއިން ޖެހޭ ބަލިތަކަށް ހޭލުންތެރި ކުރުވުމަށް ރެޑް ކްކްރެސެންޓުން އާންމު ކުރި ވީޑިއޯއަކާއި ގުޅުވައެވެ.
އެ ވީޑިއޯގައި ކުޑަކުދިންގެ ހާއްސަ ޑޮކްޓަރ، ޑރ. އަހްމަދު ފައިސަލް ވިދާޅުވެފައިވަނީ މަދިރީގެ ޒަރިއްޔާއިން ފެތުރޭ ބަލިތައް ރާއްޖޭގައި އިތުރުވަމުން އަންނަކަމަށާއި އެގޮތުން ޑެންގީ ހުމާއި ޗިކުންގުންޔާ އަދި ޒިކާ ވައިރަސް ފެތުރޭކަމަށެވެ.
ނަމަވެސް އެ ވީޑިއޯ މިހާރު ވަނީ ރެޑް ކްރެސެންޓުން ޑިލީޓްކޮށްފައެވެ.
ޒިކާ ވައިރަސް އަކީ ޑެންގޫ ހުން ފަތުރާ އީޑީސް މަދިރިން ފެތުރޭ ބައްޔެކެވެ.
ޑެންގޫ އަދި ޗިކުންގުންޔާ ފަދަ ބަލިތައް ފަތުރާ އީޑީޒް މަދިރީގެ ޒަރިއްޔާއިން ފެތުރޭ ޒިކާ ވައިރަހަކީ، ދުނިޔޭގެ އާންމު ސިއްހަތަށް އޮތް ނުރައްކަލެއް ނޫންކަމަށް ދުނިޔޭގެ ސިއްހަތު ޖަމިއްޔާއިން ވަނީ 2016 ވަނަ އަހަރުގެ ނޮވެމްބަރު މަހުގެ ތެރޭގައި ކަނޑައަޅާފައެވެ.
