ހއ.ދިއްދޫއަށް ރޭ ކުރި ވިއްސާރައިގައި އެ ރަށުގެ ހަ ގެއެއްގެ ފުރާޅު އެއްލާލައިފިއެވެ.
އެރަށުން "ޚަބަރު އޮންލައިން" އާއި ވާހަކަ ދެއްކި މީހަކު ކުޔައިދިން ގޮތުގައި މި ހާދިސާގެ އެރަށު ސޯޝަލް ހައުސިން ފްލެޓްތައް ކައިރީގައި ހުރި ހަ ގެއެއްގެ ފުރާޅު އެއްލާލާފައިވާއިރު ކައިރީގައި ހުރި އެހެން އިމާރާތްތަކަށްވެސް ވަނީ އެކި ވަރުގެ ގެއްލުންތައް ލިބިފަ އެވެ.
މީގެ ކުރިން ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) ބުނެފައިވަނީ ގެއްލުން ލިބުނު ގެތަކުގެ ފުރާޅުތައް އަލަށް ހަރުކުރުމުގެ ކުރިން ކަމާބެހޭ އިދާރާތަކުން ހަލާކުވި ފުރާޅުތައް ނެގުމުގެ މަސައްކަތް ކުރަމުން އަންނަ ކަމަށާއި، އެގެތަކުގެ އާއިލާތަކަށް ވަގުތީ ބޯހިޔާވަހިކަން މިހާރު ފޯރުކޮށްދީފައިވާ ކަމަށެވެ. އަދި އޭގެ ތެރެއިން ބައެއް އާއިލާތަކުން ގާތްތިމާގެ މީހުންނާ އެކު ހިޔާވަހިކަން ހޯދާފައިވާ ކަމަށް އެންޑީއެމްއޭ ބުނެފައި ވެއެވެ. އަދި އަންގާރަ ދުވަހުގެ ރޭގެ ވަގުތެއްގައި އެ އާއިލާތައް ގެތަކަށް ދެވޭނެ ކަމަށް އުއްމީދު ކުރާކަމަށްވެސް އެންޑީއެމްއޭ ބުނެފައި ވެއެވެ.
ގެއްލުން ލިބުނު ކޮންމެ ގެއެއްގެ ފުރާޅުގެ ގެއްލުން ތައް މަރާމާތު ކުރުމަށް 150،000 ރުފިޔާ ޚަރަދުވާނެކަަމަށް ލަފާ ކުރެވޭކަމަށްވެސް އެންޑީއެމްއޭ އިން ބުނެފައި ވެއެވެ.
ހުޅަނގު މޫސުމުގެ ވިއްސާރައިގައި ރާއްޖެއަށް މިހާރު ދަނީ ބޯކޮށް ވާރޭވެހި ގުގުރުމާއެކު ކަނޑުތައް ގަދަވަމުންނެވެ. މޫސުމާއި ބެހޭ ގައުމީ އިދާރާ (މެޓް އޮފީހުން) ވައިޓް އެލާޓް ނެރެފައިވަނީ މިއަދު ހަވީރު 05:30 އިން ރޭގަނޑު 10:30 އަށެވެ.
