އިންޑިއާގެ އެހީގައި އެމްއެންޑީއެފް ކޯސްޓްގާޑުގެ ބަނދަރު ގާއިމުކުރާ އުތުރުތިލަފަޅުގައި އިންޑިއާގެ އަސްކަރިއްޔާގެ މީހެއް ނެތް ކަމަށް ދިވެހި ސަރުކާރުން ބުނެފިއެވެ.
އުތުރުތިލަފަޅުގައި އެމްއެންޑީއެފްގެ ޑޮކްޔާޑަކާއި ބަނދަރެއް ތަރައްގީ ކުރުމަށް އިންޑިއާއާއެކު އެއްބަސްވުމުގައި ސޮއި ކުރީ ފެބްރުއަރީ 21، 2022 ގައެވެ. އެ މަޝްރޫއުގައި ސޮއިކުރުމާ އެކުގައި އެއީ އިންޑިއާގެ އަސްކަރިއްޔާގެ ސިފައިން ތިބުމަށް ހަދާ އަސްކަރީ މަރުކަޒެއް ކަމަށް ބުނެ ތަފާތު ވާހަކަތައް ދެއްކިއެވެ. އެ މަޝްރޫއު 186 މިލިއަން ޑޮލަރު (2.9 ބިލިއަން ރުފިޔާ) އަށް ހަވާލުކޮށްފައި ވަނީ އިންޑިއާގެ ރެއިލްވޭ ކުންފުންޏެއް ކަމަށްވާ ރެއިލް ވިކާސް ނިގާމްއާއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އުތުރުތިލަފަޅާ ގުޅޭ ގޮތުން ސުވާލުކުރުން ޑިފެންސް މިނިސްޓަރު ޣައްސާން މައުމޫން ވިދާޅުވީ އެތަނުގައި އެއްވެސް އަސްކަރީ މީހަކު ނެތް ކަމަށެވެ.
"އަޅުގަނޑުމެންގެ މައުލޫމާތުތަކުން ދައްކާ ގޮތުން އުތުރުތިލަފަޅުގައި އަސްކަރީ މީހަކު ނެތް،" ޣައްސާން ވިދާޅުވިއެވެ.
ރާއްޖޭގައި ތިބި ޖުމްލަ 76 އިންޑިއާ ސިފައިން މިދިޔަ ބުރާސްފަތި ދުވަހުގެ ނިޔަލަށް ވަނީ ފޮނުވާލައިފައެވެ. އިންޑިއާގެ ހެލިކޮޕްޓަރުތައް އޮޕަރޭޓް ކުރަން ފޮނުވާލި ކޮންމެ ސިފައިނަކަށް ސިވިލިއަނަކު މިހާރު ވަނީ ރާއްޖެ ގެނެސްފައެވެ. އިންޑިއާ ސަރުކާރުން ރާއްޖެ އަށް ހަދިޔާ ކޮށްފައިވާ ވައިގެ އުޅަނދުތައް އޮޕަރޭޓުކުރަން ރާއްޖޭގެ ގާއިމުވެ ތިބި އިންޑިއާގެ ސިފައިންގެ ބަދަލުގައި ރާއްޖެ އަށް އައިސްފައި ވަނީ ހެލިކޮޕްޓަރުތައް އުފެއްދި ކުންފުނީގެ މަދަނީ މުވައްޒަފުންނެވެ.
