ސައުދީ ސަރުކާރުގެ އެހީގައި ހެދި ސަލްމާން މިސްކިތް ރަސްމީކޮށް ހުޅުވަން ސަރުކާރުން ނިންމައިފިއެވެ.
ގާތްގަނޑަކަށް 24 މިލިއަން ޑޮލަރު (370 މިލިއަން ރުފިޔާ) ހަރަދު ކޮށްގެން އިމާރާތް ކުރި ސަލްމާން މިސްކިތް ދަނީ 2022 ވަނަ އަހަރުގެ ފެބްރުއަރީމަހުން ފެށިގެން ބޭނުން ކުރަމުންނެވެ. އެހެންނަމަވެސް އެމިސްކިތް ކިހާތަނަށް އަދި ރަސްމީކޮށް ހުޅުވާފައެއް ނުވެއެވެ.
އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ސައުދި އަރަބިއްޔާއަށް ކުރެއްވި ދަތުރުފުޅަށް ފަހު ދައުލަތުގެ މިޑިއާއަށް މައުލޫމާތު ދެއްވަމުން ވިދާޅުވީ މިއަހަރުގެ ހައްޖުގެ ފަހުން އެ މިސްކިތް ރަސްމީކޮށް ހުޅުވުމާއި ގުޅޭގޮތުން މަޝްވަރާ ކޮށްފައިވާ ކަމަށެވެ.
"އަޅުގަނޑުމެން މަސައްކަތް ކުރަމުން މިދަނީ އިރާދަކުރެއްވިއްޔާމުން މި އަހަރުގެ ހައްޖުގެ ފަހުން ކިންގ ސަލްމާން ސެންޓަރު ރަސްމީކޮށް ހުޅުވުމުގެ ކަންތައްތައް ކުރިއަށް ގެންދެވޭތޯ، އަދި ކިންގ ސަލްމާން ސެންޓަރު ހުޅުވުމަށްޓަކައި ހަރަމްފުޅުގެ ކޮންމެވެސް އިމާމެއް ރާއްޖެ ވަޑައިގަންނަވާނެތޯ އަޅުގަނޑުމެން ވާނެ މަޝްވަރާކޮށްފައި، އިރާދަކުރެއްވިއްޔާ އެކަން އެގޮތަށް ވާނެ ކަމަށް އަޅުގަނޑުމެން އުއްމީދު ކުރަމުން މި ދަނީ.
ޝަހީމް ވިދާޅުވިއެވެ.
މިސްކިތުގެ އިމާރާތުގައި، ނަމާދުކުރާ ތަނުގެ އިތުރުން ކުއްޔަށް ދޭ ހޯލުތަކާއި މީޓިން ރޫމުތަކެއް ހަދާފައި ވެ އެވެ. މިސްކިތުގެ 3 ވަނަ ފަންގިފިލާގައި 4 ކްލާސްރޫމާއި، 5 ސެމިނަރ ރޫމެއްގެ އިތުރުން އިސްލާމިކް ލައިބްރަރީއަކާއި އިދާރީ މަސައްކަތްތަކަށް ޚާއްސަ ތަނެއްވަނީ ހަދާފައެވެ. 4ވަނަ ފަންގިފިލާ ޚާއްސަކޮށްފައިވަނީ އެކިއެކި ސެމިނަރތަކާއި ކޮންފަރެންސްތައް ބޭއްވުމަށް ޚާއްސަ އޮޑިޓޯރިއަމަކަށެވެ. މިއީ 350 މީހުންގެ ޖާގައިގެ އޮޑިޓޯރިއަމެކެވެ. މީގެ އިތުރުން މިސްކިތުގެ 5ވަނަ ބުރި ތަރައްޤީކޮށްފައިވަނީ ދީނީ ދަރުސް ދިނުމަށާއި، ނަމާދުކުރުމަށްވެސް ބޭނުންކުރެވޭނެހެން މަލްޓި-ޕަރޕަސް ހޯލެއްގެ ގޮތުގައެވެ.
