ކުރީގެ ރައީސް ނަޝީދު އިސްވެ ހުންނާ އުފެއްދެވި ދަ ޑިމޮކްރެޓްސް ޕާޓީގެ މައި ޖަގަހަ ރޫޅާލަން ފަށައިފިއެވެ.
ޖަގަހައެއް ހިންގުމަށް އެންމެ އެކަށީގެންވާ ތަނުގައި، ބޮޑުތަކުރުފާނުގައި މަގުގައި ހުންނަ، ގިނަ ދުވަސްތަކެއްވަންދެން އެމްޑީޕީގެ ޖަގަހަ ހިންގި މި ތަން ރޫޅާލަން ފަށާފައިވާއިރު، އެޕާޓީގެ ބައެއް އިސް ފަރާތްތަކުން ބުނެފައިވަނީ ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ ޖަގަހަ ހުސް ކުރަމުންދަނީ އެތަނުގައި އިމާރާތެއް އެޅުމަށް ގޭގެ ވެރިފަރާތުން ބޭނުންވެގެން ކަމުގައެވެ.
އަދި އެ ޕާޓީގެ ޖަގަހަ ހިންގުމަށް އާ އިމާރާތެއް ހޯދަމުންދާކަމަށްވެސް ބުނެފައި ވެއެވެ.
ޑިމޮކްރެޓްސްގެ ޖަގަހަ ރޫޅާލަން ފަށާފައިވާއިރު، ފާއިތުވި ރައްޔިތުންގެ މަޖިލިހުގެ އިންތިޚާބުގެ ދާއިމީ ނަތީޖާ އިއުލާންކުރިއިރު، އެ ޕާޓީއަށްވަނީ %2 ގެ ބޮޑު ނާކާމިޔާބީއަކާ ކުރިމަތިލާން ޖެހިފައެވެ. އެއީ ޖުމްލަ 4،634 ވޯޓެވެ. އެޕާޓީން ވާދަކުރި 39 ކެނޑިޑޭޓުންނަށްވެސް ވަނީ ނާކާމިޔާބީއާ ކުރިމަތިލައްވަން ޖެހިވަޑައިގެންފައެވެ.
ޑިމޮކްރެޓްސްގެ ކެނޑިޑޭޓުންނަށް ކެމްޕޭން ކުރުމަށް ރައީސް ނަޝީދުވެސް ވަނީ މާލެ ވަޑައިގެން އެޕާޓީގެ ކެނޑިޑޭޓުންނަށް ކެމްޕޭންވެސް ކޮށްދީފައެވެ. ޑިމޮކްރެޓްސްއަށް އެންމެ ގޮނޑިއެއްވެސް ކާމިޔާބު ނުވިއިރު، އެ ޕާޓީގެ މެމްބަރުންގެ ގޮތުގައި ރައްޔިތުންގެ މަޖިލިހުގައި ދިގުމުއްދަތެއް ހޭދަ ކުރެއްވި މެމްބަރުންވެސް ހިމެނެއެވެ.
އޭގެ ތެރޭގައި ގަލޮޅު އުތުރު ދާއިރާގެ މެންބަރު އީވާއާއި މެދު ހެންވޭރު ދާއިރާގެ މެންބަރު އަލީ އާޒިމް އާއި މާފަންނު އުތުރު ދާއިރާގެ މެންބަރު އިމްތިޔާޒް ފަހުމީވެސް ހިމެނެއެވެ.
މި އިންތިޚާބުގައި ގިނަ ގިނަ ގޮނޑިތައް ކާމިޔާބުކޮށް ވެރިކަން ކުރާ ޕީއެންސީން ވަނީ މަޖިލިހުގެ ސުޕަރ މެޖޯރިޓީ ކަށަވަރު ކޮށްފައެވެ. އެގޮތުން މުޅި ފުވައްމުލަށް ސިޓީއާއި ކުޅުދުއްފުށީ ސިޓީއާއި މާލޭ ސިޓީގެ 3 ގޮނޑި ފިޔަވާ އެހެން ހުރިހާ ގޮނޑިތަކެއްވެސް ކާމިޔާބު ކުރީ ޕީއެންސީންނެވެ.
ޑިމޮކްރެޓްސްއަށް ކެމްޕޭން ކޮށްދިނުމަށް މާލެ ވަޑައިގެން ބޭއްވި ކެމްޕޭން އިވެންޓުތަކުގައި ނަޝީދު ބޮޑަށް އިސްކަން ދެއްވާފައިވަނީ އެމްޑީޕީއާއި ދެކޮޅަށް ކެމްޕޭން ކުރުމަށެވެ.
ފާއިތުވި ރިޔާސީ އިންތިޚާބުގައިވެސް ޑިމޮކްރެޓްސް ޕާޓީންވަނީ ރިޔާސީ ކެނޑިޑޭޓަކު ނެރެފައެވެ. އެހެންނަމަވެސް ރިޔާސީ އިންތިޚާބުގައި އެޕާޓީއަށް ލިބުނީ ފަނަރަހާހެއްހާ ވޯޓެވެ.
ދަ ޑިމޮކްރެެޓްސްގެ ހަރުގެ މިހާރު ހުރި ތަނުގައި ކުރިން ހިންގަމުން އައީ މައި އިދިކޮޅުޕާޓީ އެމްޑީޕީގެ ހަރުގެ އެވެ. އެ ބިމުގެ ވެރިފަރަތަކީ އެ ޕާޓީގެ ކުރީގެ އެކްޓިވިސްޓް ޝަފިއްޔާ ޒުބައިރެވެ. އެމްޑީޕީ ތެރޭގައި ދެ ފެކްޝަން އުފެދި, ކޯޅުން ބޮޑުވެފައި ވަނިކޮށް ޕާޓީގެ މައި ހަރުގެ ހުސްކުރަން އެންގީ މާޗް 31، 2023 ގަ އެވެ.
ޝަފިއްޔާ އޭރު ބުނީ މިހާރު އެ ބިން އޭނާ ކުއްޔަށް ދޫކުރީ ވިޔަފާރިވެރިޔަކަށް ކަމަށެވެ. އެއީ އެ ވިޔަފާރިވެރިޔާ އެހެން ބަޔަކަށް ވެސް ކުއްޔަށް ދެވޭ ގޮތަށެވެ. އެ އިމާރާތް ޑިމޮކްރެޓުންގެ ފަރާތުން ނެގީ އެ ވިޔަފާރިވެރިޔާއާ އެކު ހެދި ސަބް ލީސް އެއްބަސްވުމެއްގެ ދަށުން ކަން އެ ޕާޓީން އޭރު ބުންޏެވެ.
