އެމްއެންޔޫގައި މެޑިސިން ކިޔަވަމުން އަންނަ ދަރިވަރުންނަށް ކްލާސްތައް ނަގަމުން އަންނަ ދަރުމަވަންތަ ހޮސްޕިޓަލުން ނިކުންނަން ޖެހިދާނެ ކަމާމެދު އުފެދިފައިވާ ކަންބޮޑުވުންތަކާ ގުޅިގެން ރައީސް އޮފީހުގެ ކަމާބެހޭ ބޭފުޅުންނާއި ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފަރާތުން ބައްދަލު ކުރުމަށްފަހ،ު އެ ޔޫނިއަންއިން އުއްމީދުކުރަނީ ދަރިވަރުން މިހާރުވެސް ކިޔަވަމުންދާ އިމާރާތުގައި ދަރިވަރުންގެ ކިޔެވުން ކުރިއެކޭވެސް އެއްފަދައިން ކުރިޔަށް ގެންދެވޭނެ އިންތިޒާމް ހަމަޖައްސަވާދެއްވުމަށް ކަމަށް ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބުނެފައި ވެއެވެ.
އެމް.އެން.ޔޫ.އެސް.ޔޫ އިން ނެރުނު ނޫސް ބަޔާނެއްގައި ބުނެފައިވަނީ 26 އެޕްރިލް ވީ ހުކުރުދުވަހުގެ ރޭ 20:30 ރައީސް އޮފީހުގައި ބޭއްވުނު މި ބައްދަލުވުމުގައި އައިޖީއެމްއެޗްއާއި ގައުމީ ޔުނިވަރސިޓީގެ އިސް ބޭފުޅުން ބައިވެރިވެވަޑައިގެންނެވި ކަމުގައެވެ.
އަދި މި ބައްދަލުވުމުގައި އެ މައްސަލައާއި ގުޅޭގޮތުން ހުރި ދަރުވަރުންގެ ގިނަ ކަންބޮޑުވުންތައް ކަމާބެހޭ ބޭފުޅުންނާއި ހިއްސާ ކޮށްފައިވާކަމުގައިވެސް ނޫސް ބަޔާނުގައި ބުނެފައި ވެއެވެ. އެމް.އެން.ޔޫ.އެސް.ޔޫގެ ބަޔާނުގައި ބުނެފައިވަނީ މި ބައްދަލުވުމުގައި މެޑިސިން ކިޔަވާކުދިންގެ ކިޔެވުމަށް ހުރަސްއެޅޭފަދަ އެއްވެސްކަމެއް ނުކުރާނެކަމުގެ ޔަގީންކަން ކަމާބެހޭ ފަރާތްތަކުން އަރުވާފައިވާ ކަމުގައެވެ.
އޭގެ އިތުރުން ދަރިވަރުންގެ ތައުލީމީ ހައްގުތައް ރައްކައިތެރިކުރުމަށް ރައީސުލްޖުމްހޫރިއްޔާ ވަރަށްބޮޑު އިސްކަމެއް ދެއްވާކަމަށާއި، މިހާރަށްވުރެ ފުރިހަމަ ފެސިލިޓީތައް ގާއިމް ކޮށްދެއްވާނެކަމުގެ ޔަގީންކަންވެސް ބައްދަލުވުމުގެ ބައިވެރިން އަރުވާފައިވާކަމަށްވެސް ބަޔާނުގައި ބުނެފައި ވެއެވެ.
އެމް.އެން.ޔޫ.އެސް.ޔޫގެ ބަޔާނުގައި ބުނެފައިވަނީ މެޑިސިން ކިޔަވަމުންދާ 200 އެތަކެއް ދަރިވަރުންނަށް ދާއިމީ ހިޔާވަހިކަމެއް ލިބެންދެން ދަރުމަވަންތަ ހޮސްޕިޓަލުގެ 8 އަދި 14 ފަންގިފިލާގައި ތިބެވޭނެކަމުގެ އުއްމީދު އާވެފައިވާ ކަމުގައެވެ. އަދި މިމައްސަލައަށް ދާއިމީ ހައްލަކާހަމައަށް ދިއުމަށް ގިނަ ދުވަސްތަކެއް ހޭދަވެދާނެތީ މިހާރު ދަރިވަރުން ކިޔަވަމުންދާ އިމާރާތުގައި ދަރިވަރުންގެ ކިޔެވުން ކުރިއެކޭވެސް އެއްފަދައިން ކުރިޔަށް ގެންދެވޭނެ އިންތިޒާމް ހަމަޖައްސަވާދެއްވުމަށް އެދޭކަމަށްވެސް ޔޫނިއަންއިން ބުނެފައި ވެއެވެ.
