އިންޑިއާގެ އެވަރެސްޓް އަދި އެމްޑީއެޗް ބްރޭންޑު ހަވާދު ބޭނުން ނުކުރުމަށް އަންގައިފިއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭއިން) ނެރުނު ބަޔާނެއްގައި ވަނީ ރާއްޖޭގައި "އެވަރެސްޓް" އާއި "އެމްޑީއެޗް" ބްރޭންޑުގެ ހަވާދު ބޭނުން ނުކުރުމަށް އަންގާފައެވެ.
މި ދެ ބްރޭންޑްގެ ހަވާދުގެ ބައެއް ބާވަތްތަކުގައި އެތިލިން އޮކްސައިޑް ހުރި ކަމަށް ސިންގަޕޫރްގެ ފުޑް އެޖެންސީ އާއި ހޮންކޮންގުގެ ސެންޓަ ފޮ ފުޑް ސޭފްޓީން ވެސް ބުނެފައިވާތީ ރާއްޖޭގެ ބާޒާރުން ވެސް އެ ބްރޭންޑްތައް ނެގުމަށް އެފްޑީއޭއިން ވަނީ އަންގާފައެވެ.
އެތަލިން އޮކްސައިޑަކީ އޭގައި ފޮނި ވަހެއް ހުންނަ، އަލިފާން ހިފާ ޒާތުގެ ގޭހެކެވެ. އަދި އެތިލިން އޮކްސައިޑަކީ ދަނޑުވެރިކަމުގެ އުފެއްދުންތައް ފިއުމިގޭޓްކުރަން ބޭނުން ކުރާ ކެމިކަލެއް ކަމަށްވެސް އެމްއެފްޑީއޭއިން ނެރުނު ބަޔާނުގައި ބުނެފައި ވެއެވެ.
އެހެންވެ މިބާވަތުގެ ހަވާދުން ސިއްހަތަށް ކޮށްފާނެ ނޭދެވޭ އަސަރަކަށްޓަކައި އެ ކެމިކަލް ކާބޯތަކެތީގެ އުފެއްދުންތަކުގައި ބޭނުން ނުކުރުމަށް އެމްއެފްޑީއޭ އިން ބުނެފައި ވެއެވެ.
އެމްއެފްޑީއޭއިން ބުނެފައިވަނީ ރާއްޖެއަށް އެތެރެކުރާ މި ބާވްތަތަކުގެ ހަވާދުގެ ހިރާސްތައް ދެނެގަތުމުގެ މަސައްކަތް ކުރަމުން އަންނަކަމަށެވެ.
އެހެންވެ ރައްކާތެރިކަމުގެ ފިޔަވަޅެއްގެ ގޮތުން މި ބްރޭންޑްތަކުގެ ހަވާދު ރާއްޖެއަށް އެތެރެ ނުކުރުމަށާއި، ނުވިއްކުމަށް އަދި ބޭނުން ވެސް ނުކުރުމަށް އެމްއެފްޑީއޭއިން ވަނީ އަންގާފައެވެ.
