މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ)ގެ މެޑިސިން ސްކޫލުގެ ކްލާސްތައް މައި ކެމްޕަހަށް ބަދަލުކުރަން ނިންމިނަމަވެސް، މި ބަދަލުގެ ސަބަބުން ދަރިވަރުންނަށް އެއްވެސް ގޮންޖެހުމެއް ކުރިމަތި ނުވާނެ ކަމުގެ ޔަގީންކަން އެ ޔުނިވާސިޓީން ދީފި އެވެ.
ދަރުމަވަންތަ ހޮސްޕިޓަލްގެ 8 ވަނަ ފަންގިފިލާ އާއި 14 ވަނަ ފަންގިފިލާ 10 އަހަރަށް ހިންގުމަށް ކުއްޔަށް ދިނުމަށް އެމްއެންޔޫ އާއި އައިޖީއެމްއެޗުން އެއްބަސްވުމުގައި ސޮއިކުރީ 2018 ވަނަ އަހަރު އެވެ. ނަމަވެސް ފަހުން އައިޖީއެމްއެޗުން ވަނީ އެ ހޮސްޕިޓަލުގެ ހިދުމަތްތައް ފުޅާކޮށްފައިވާ ކަމަށް ބުނެ އެއްބަސްވުން އުވާލާފަ އެވެ.
އޭގެ ފަހުން އެމްއެންޔޫއިން ވަނީ ދަރުމަވަންތަ ހޮސްޕިޓަލުގެ ކެމްޕަސް ވަސީލަތްތައް އެމްއެންޔޫގެ މައި ކެމްޕަހަށް ބަދަލުކުރުމުގެ މަސައްކަތް ފަށައިފަ އެވެ.
އެމްއެންޔޫއިން އިއްޔެ ނެރުނު ނޫސްބަޔާނެއްގައި ބުނީ، އެ ތަން ބަދަލުކުރުމުގެ މަސައްކަތް ކުރިއަށްދާއިރު، އެ ޔުނިވާސިޓީން އަބަދުވެސް ސަމާލުކަން ދޭނީ ދަރިވަރުންގެ އުނގެނުމުގެ ތަޖުރިބާއަށް ބުރޫނާރާނެ ގޮތަކަށް ކަމަށެވެ.
އެމްއެންޔޫގެ ބަޔާނުގައި ބުނެފައިވަނީ، މެޑިކަލް ސްކޫލުގެ ދަރިވަރުންގެ ކްލާސްތަކަށް ނުވަތަ ޕްރެކްޓިކަލް ލެބްގެ ހިދުމަތަށް ބުރޫނާރާ ގޮތަށް ޔުނިވާސިޓީގެ މައި ކެމްޕަހުގައި ފެސިލިޓީ ގާއިމުކުރުމުގެ މަސައްކަތް ކުރަމުން ދާކަމަށާއި، އަދި ދަރުމަވަންތަ ހޮސްޕިޓަލުން ދަރިވަރުންނަށް އަމަލީ އެހީތެރިކަން ލިބެމުންދާނެ ކަމަށެވެ.
ހަމައެއާއެކު ހުޅުމާލޭގައި މެޑިކަލް ސްކޫލް ކެމްޕަސް އެޅުމުގެ މަސައްކަތް އަވަސްކުރުމަށް ސަރުކާރުން އެމްއެންޔޫއާ ގުޅިގެން މަސައްކަތް ކުރަމުންދާކަމަށްވެސް އެމްއެންޔޫއިން ބުނެފައި ވެއެވެެ.
އެޔުނިވާސިޓީން ބުނީ މެޑިސިން ސްކޫލުގެ ވަސީލަތްތައް މައި ކެމްޕަހަށް ބަދަލުކުރަން ނިންމީ އެކަމުގެ ފައިދާ ރައްޔިތުންނަށް ކުރާނެތީ ކަމަށެވެ.
