މި މަހުގެ 21 ވަނަ ދުވަހު ބޭއްވި ރައްޔިތުންގެ މަޖިލިސް އިންތިހާބުގައި އަމިއްލަ ގޮތުން ވާދަކުރައްވައި ގޮނޑި ކާމިޔާބު ކުރެއްވި ހަ މެމްބަރަކު އިއްޔެ ޕީއެންސީއަށް ސޮއި ކުރައްވާ އަދި އޭގެ ފަހުން، ނޮޅިވަރަމް ދާއިރާއަށް އިންތިޚާބުވި މުހައްމަދު ރަޝީދު ވެސް ޕީއެންސީއަށް ސޮއި ކުރެއްވުމާއެކު، މަޖިލިހަށް އިންތިޚާބުވި މިނިވަން މެމްބަރުންގތެރެެއިން ވެރިކަންކުރާ ޕީއެންސީއާއި ގުޅިވަޑައިނުގެން މިހާރު ތިއްވެ މިނިވަން އެންމެ 4 މެމްބަރުންނެވެ.
20 ވަނަ ރައްޔިތުންގެ މަޖިލީހަށް މިނިވަން މެމްބަރުންގެ ގޮތުގައި 11 މެމްބަރަކު އިންތިޚާބުވެވަޑައިގަތެވެ. އޭގެ ތެރެއިން މެމްބަރަކު މިހާރުވަނީ ޕީއެންސީއަށް ސޮއި ކުރައްވާފައެވެ.
ޕީއެންސީއަށް ސޮއި ކުރެއްވީ:
- ހުރާ ދާއިރާގެ އިންތިހާބީ މެންބަރު ޑރ. އަނާރާ ނައީމް
- މަތިވެރި ދާއިރާގެ އިންތިހާބީ މެންބަރު ހަސަން ޒަރީރު
- މައްޗަންގޮޅި މެދު ދާއިރާގެ އިންތިހާބީ މެންބަރު އަހުމަދު ޒަމީރު
- ތިމަރަފުށި ދާއިރާގެ އިންތިހާބީ މެންބަރު އަހުމަދު ރިޔާޒް
- ނައިފަރު ދާއިރާގެ އިންތިހާބީ މެންބަރު ޔާސީން އަބްދުﷲ
- ވިލިނގިލި ދާއިރާގެ އިންތިހާބީ މެންބަރު އާޒިމް އަބްދުލް އަޒީޒް
- ނޮޅިވަރަމް ދާއިރާއަށް އިންތިޚާބުވި މުހައްމަދު ރަޝީދު
މި ހަ ބޭފުޅުންގެ ތެރެއިން ނައިފަރު ދާއިރާ އަދި ވިލިނގިލީ އަދި ނޮޅިވަރަމް ދާއިރާއިން ހޮވިވަޑައިގެންނެވި ދެ ބޭފުޅުން ފިޔަވާ ދެން ތިއްބެވި ބޭފުޅުންނަކީ އަމިއްލަ ގޮތުން ވާދަ ކުރެއްވި ނަމަވެސް ސަރުކާރުގެ ސީދާ ތާއީދާ އެކު ނުކުންނެވި މެންބަރުންނެވެ.
ޕީއެންސީއަށް ސޮއި ނުކޮށް ބާކީތިބި 4 މެމްބަރުން:
- އަބުދުލް ހަންނާން އަބޫބަކުރު، ތުޅާދޫ ދާއިރާ
- މުހައްމަދު ޝާބިން ހަބީބު، ކުރެންދޫ ދާއިރާ
-
މުޙައްމަދު އަލްސަން އަޙްމަދުު، ތިނަދޫ ދެކުނު ދާއިރާ
- އަބުދުއްރަހުމާން އައްޑޫ މީދޫ ދާއިރާ
ޕީއެންސީއާއި ގުޅިވަޑައިގެންނެވި ގިނަ މެމްބަރުންނަކީ ފާއިތުވި މަޖިލިސް އިންތިޚާބުގައި ރައީސް މުއިއްޒުގެ ރުހުން އޮވެގެން އިންތިޚާބުގައި ވާދަކުރެއްވި މެމްބަރުންނެވެ. އެހެންނަމަވެސް މިމެމްބަރުންނަކީ މިނިވަން މެމްބަރުންގެ ގޮތުގައި އިންތިޚާބުގައި ވާދަކޮށް ކާމިބު ހޯއްދެވި މެމްބަރުންނަށް ވުމާއެކު، އެ މެމްބަރުންގެ ގޮނޑި ގެއްލޭނެކަމަށް ބައެއް ފަރާތްތަކުން އައީ ވަހަކަ ދައްކަވަމުންނެވެ.
އެހެންނަަމަވެސް މިމެމްބަރުން ގޮނޑިއާއި ގުޅޭގޮތުން އަރާފައިވާ އޮޅުންތައް އިލެކްޝަންސް ކޮމިޝަނުންވަނީ ބައެއް މީޑިއާތަކަށް މައުލޫމާތު ދެއްވަމުން ސާފުކޮށްދީފައެވެ.
އެގޮތުން އިލެކްޝަންސް ކޮމިޝަނުން ބުނެފައިވަނީ، އެންޓި ޑިފެކްޝަން ގާނޫނު އޮތްގޮތުން މެމްބަރެއްގެ ގޮޑިއާމެދު ސުވާލު އުފެދޭނީ ދައުރުގެ ތެރޭގައި މެމްބަރަކު ޕާޓީ ބަދަލުކޮށްފި ނަމައެވެ. މެމްބަރެއްގެ ގާނޫނީ ދައުރު ފެށިގެން ދާނީ މެމްބަރުކަމުގެ ހުވާ ކުރެއްވުމަށްފަހުއެވެ. 20 ވަނަ މަޖިލީހަށް އިންތިޚާބުވި މެމްބަރުން ހުވާ ކުރުމަށް ހަމަޖެހިފައިވަނީ އަންނަ މޭމަހުގެ 18 ވަނަ ދުވަހުއެވެ.
ރައްޔިތުންގެ މަޖިލީހުން ފާސްކޮށްފައިވާ އެންޓިޑިފެކްޝަން ގާނޫނު ބުނާގޮތުން، މަޖިލިސް މެންބަރުން ހޮވޭ ޕާޓީ ބަދަލުކޮށްފިނަމަ، މެންބަރުގެ ގޮނޑި ދޫކޮށް މަގާމުން އިސްތިއުވާ ދޭން ޖެހޭނެއެވެ. މިގާނޫނޫގައި މެމްބަރަކު ޕާޓީ ބަދަލުކުރުމުން ގޮނޑި ގެއްލޭކަމަށް ސީދާ ބުނެފައި ނުވަނީ، މެމްބަރުންގެ މެމްބަރުކަމުގެ ޝަރުތުތައް ގާނޫނު އަސާސީގައި ބަޔާން ކޮށްފައިވާތީކަމަށް ގާނޫނީ މާހިރުން ވިދާޅުވެފައި ވެއެވެ.
އަދި އޭގެ ނަތީޖާއެއްގެ ގޮތުން މި ގާނޫނު ގާނޫނު އަސާސީއާއި ޚިލާފްކަމަށްވެސް ބައެއް ގާނޫނީ ބޭފުޅުން ވިދާޅުވަމުން ގެންދަވައެވެ. އޭގެ ސަބަބެއްކަމުގައި ގާނޫނީ ބޭފުޅުން ވިދާޅުވަނީ، މެމްބަރުންގެ މެމްބަރުކަމުގެ ހައިސިއްޔަތު ގެއްލޭނެ އުސޫލުތައް ގާނޫނު އަސާސީގައި ބަޔާން ކޮށްފައިވަނިކޮށް، އެހައިސިއްޔަތު ގެއްލޭނެ ހަމަތަކެއް ގާނޫނަކުން ކަނޑަނޭޅޭނެކަމަށް ބުނެއެވެ.
