މާތްވެގެންވާ ގެފުޅުގެ ދޮރޮކޮޅު ޑިޒައިން ކުރި، މުނީރު އަލް ޖުންދި މި ހަފްތާގެ އަންގާރަ ދުވަހު، ޖަރުމަނުވިލާތުގެ ސްޓަޓްގާޓްގައި ނިޔާ ވެއްޖެއެވެ.
ސައުދީގެ އަސްކަރިއްޔާގައި އޭރު މަސައްކަތް ކުރަމުންދިޔަ، މުނީރު ގެފުޅުގެ ދޮރުކޮޅު ޑިޒައިން ކޮށްފައިވަނީ، މީގެ 43 އަހަރު ކުރިން، ހިޖްރީ ގޮތުން، 1399 ވަނަ އަހަރު، ސައުދީގެ އޭރުގެ ރަސްގެފާނު، ކިންގ ޚާލިދު ބިން އަބުދުލް އަޒީޒްގެ އަމުރު ފުޅަށެވެ.
ގެފުޅުގެ ދޮރުކޮޅު ހެދުމުގެ މަސައްކަތް އޭރު ކުރިޔަށް ގެންދެވިފައިވަނީ، ރަނުގެ މައްސައްކަތްތަކުގައި ސައުދީގައި އޭރު އެންމެ މަޝްހޫރު ޝެއިޚުން ކަމުގައިވާ، ޝެއިޚް އަލް-ސަގާއާއި ޝެއިޚް މުހައްމަދު ބަދުރުއާއި ދެބޭފުޅުންގެ ފެކްޓަރީގައެވެ.
ރަސްގެފާނު ޚާލިދު އޭރު، ގެފުޅުގެ ދޮރުކޮޅު އަލުން ޑިޒައިން ކުރުމަށް އަމުރު ކުރެއްވީ ރަސްގެފާނުގެ ކުރިން ސައުދީ ރަސްކަން ކުރެއްވި، ކިންގ އަބުދުލް އަޒީޒުގެ ރަސްކަމުގައި ހެދުނު ދޮރުކޮޅު ވަރަށް ބޮޑަށް ބާވެފައިވާކަން ފާހަގަ ކުރެވިގެންނެވެ. ކިންގ އަބުދުލް އަޒީޒުވެސް ވަނީ، އޭރު ހުރި ދޮރުކޮޅު ބާވުމުގެ ސަބަބުން ގެފުޅުގެ އެތެރޭގައި އިތުރު ދޮރުކޮޅެއް ހަދާ، އެދޮރުކޮޅުން ގެފުޅުގެ ފުރާޅަށް އެރޭގޮތަށް ސިޑިބަރިއެއް ހަދާފައެވެ.
ގެފުޅުގެ ދޮރު ހެދުމަށް، އޭރުގެ ރަސްގެފާނު ހަމަޖެއްސެވީ ޝެއިޚް ބަދުރުގެ އާއިލާއެވެ. ޝެއިޚް ބަދުރުގެ އާއިލާގެ ފަރާތުން މިމަސައްކަތުގައި އެންމެ އިސްކޮށް އުޅުއްވީ، ޝެއިޚް މުހައްމަދު ބަދުރުއާއި އަދި އޭނާގެ ދަރިފުޅު މުހައްމަދު އެވެ. މިއާއިލާގެ ފެކްޓްރީގައި ދޮރުކޮޅުގެ ހެދުމުގެ މައްސައްކަތް ނިންމާލެވިފައިވަނީ ދޮޅު އަހަރުދުވަހުގެ ތެރޭގައެވެ. އަދި ރަސްގެފާނު ޚާލިދު ވަނީ، ހިޖުރައިން 1398 ވަނަ އަހަރުގެ ހައްޖު މޫސުމުގެ ކުރިން، ރަނުން ހަދާފައިވާ ދޮރުކުޅުގެ މަސައްކަތް ފެށުމަށް އޭރު އަމުރު ކުރައްވާފައެވެ.
ޝެއިޚް މުނީރު އަލް-ޖުންދީ ދޮރުކޮޅު ޑިޒައިން ކުރައްވާފައިވާއިރު، ދޮރުކޮޅުގައި ދަމާފައި ހުރި ރޮގުތައް ހަދާދީފައިވަނީ ޝެއިޚް އަބުދުއްރަހުމާން ބުޚާރީ ނަމަކަށް ކިޔާ ބޭފުޅެކެވެ. ދޮރުކޮޅުގެ އުސްމިނުގައި 3 މީޓަރު ހުންނައިރު، ފުޅާ މިނުގައި މަދުވެގެން 2 މީޓަރު ހުރެއެވެ. އަދި ބޯ މިނުގައި މީޓަރެއްގެ ދެބައި ކޮށްފަ އެބައިގެ މިން ހުރެއެވެ.
ދޮރުކޮޅު ހަދާފައިވަނީ، އެންމެ ތިރީގައި ހައިވަކަރުން ހަދާފައިވާ 10 ސެންޓީ މީޓަރު ބޯމިނުގެ ބުޑެއް އަޅާގައިގެންނެވެ. ހައިވަކަރަކީ ދުނިޔޭގައި އެންމެ އަގުބޮޑުކޮށް ވިއްކާ ބާވަތުގެ ވަކަރެވެ.
ސައުދީ ރަސްގެފާނު ދޮރުކޮޅު އަލުން ހެދުމަށް އޭރު އަމުރު ކުރެއްވީ، ހިޖުރައިން 1397 ވަނަހަރުގެ ޖުމާދަލް އައްވަލު މަހުގައި ގެފުޅުގެ އެތެރޭގައި ނަމާދު ކުރެއްވުމަށްފަހު ދޮރުކޮޅުތައް ބާވެފައިވާކަން ފާހަގަ ކުރެއްވިގެންނެވެ. ރަސްގެފާނު އަމުރު ކުރެއްވީ، ގެފުޅުގެ އެންމެ ބޭރުގެ ދޮރުކޮޅާއި އަދި އެތެރެއިން، ފުރާޅަށް އަރަން ހުންނަ ސިޑީގެ ދޮރުކޮޅުވެސް އާކުރުމަށެވެ. މި ދޮރުކޮޅުތައް އާކުރުމަށް، އޭރު ސައުދީ ސަރުކާރުން، ދޮރުކޮޅުތަކުގައި ހިމަނާފައިހުރި ރަނުގެ އަގުތައް ނުހިމަނާ، 13 މިލިއަން ރިޔާލް ޚަރަދު ކޮށްފައި ވެއެވެ.
ދޮރުކޮޅު ހެދުމަށްޓަކާ 280 ކިލޯ ގްރާމްގެ ކެރަޓް ރަން (%999.99) ހިމެނޭ ގޮތަށް، މުނީރުއާއި ހަވާލުކޮށްގެން ދޮރުކޮޅު ޑިޒައިން ކުރުމަށް އެއްބަސްވެވުނީ 300،000 ރިޔާލްއަށެވެ. ދޮރުކޮޅު ހެދުމަށްޓަކާ ޚާއްސަ ފެކްޓަރީއެއް ބިނާ ކުރެވުނެވެ. މި ފެކްޓަރީގައި ދޮރުކޮޅު ހެދުމުގެ މަސައްކަތް ފެށިގެން ދިޔައީ 1398 ވަނަ އަހަރުގެ ޒުލް ހިއްޖާ މަހުގެ ފުރަތަމަ ދުވަހުއެވެ. މުޅި ޕްރޮޖެކްޓް ނިންމާލެވުނީ އަހަރެއްހާ ދުވަސް ފަހުންނެވެ.
