އޭނާގެ ބައްޕާފުޅު ޝައިހް މޫސާ ޖަމީލްގެ ޖަނާޒާގެ ކަންކަން ފުރިހަމަ ކަމާއެކުގައި ކުރިއަށް ގެންދިއުމާ ގުޅިގެން އެމްޑީޕީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު، ރައީސް ޑރ. މުހައްމަދު މުއިއްޒަށް ޝުކުރު ދަންނަވައިފިއެވެ.
ޝާހިދު "އެކްސް" ގައި ކުރެއްވި ޕޯސްޓެއްގައި ވިދާޅުވީ ރައީސް ޑރ. މުއިއްޒުގެ ތައުޒިޔާ މެސެޖްގައި ފާޅު ކުރައްވާފައިވާ ހިތްޕުޅު ހެޔޮ ޝުއޫރުތަކަށް އޭނާ އާއި އާއިލާގެ ފަރާތުން އިހްލާސްތެރިކަމާ އެކުގައި ޝުކުރު ދަންނަވާ ކަމަށެވެ.
މަނިކުފާނުގެ ތަޢުޒިޔާގެ މެސެޖްގައި ފާޅުކުރައްވާފައިވާ ހިތްޕުޅުހެޔޮ ޝުޢޫރުތަކަށް އަޅުގަނޑާއި ޢާއިލާގެ ފަރާތުން އިޚްލާޞްތެރިކަމާއެކު ޝުކުރު ދަންނަވަން.
ޢާއިލާއަށް ދިމާވި ނުހަނު ހިތްދަތި މިދަނޑިވަޅުގައި މަނިކުފާނުގެ އިރްޝާދުގެ މަތިން ބައްޕަގެ ޖަނާޒާގެ ކަންކަން ފުރިހަމަ ކުރުމުގައި… https://t.co/FAoDgkuhvK
— Abdulla Shahid (@abdulla_shahid) April 24, 2024
"އާއިލާއަށް ދިމާވި ނުހަނު ހިތްދަތި މިދަނޑިވަޅުގައި މަނިކުފާނުގެ އިރްޝާދުގެ މަތިން ބައްޕަގެ ޖަނާޒާގެ ކަންކަން ފުރިހަމަ ކުރުމުގައި ސަރުކާރުގެ އިދާރާތަކުން ކުރެއްވި އިންތިޒާމުތަކަށްވެސް ޝުކުރު ދަންނަވަން." ޝާހިދު ވިދާޅުވިއެވެ.
ރައީސް ޑރ. މުއިއްޒު މިއަދު ކުރެއްވި ޓުވީޓެއްގައި ވިދާޅުވީ ޝާހިދުގެ ބައްޕާފުޅު ދެމިއޮތުމުގެ އާލަމަށް ދަތުރު ކުރެއްވި ހަބަރު އެހީ ނުހަނު ފުން ހިތާމައާ އެކުގައި ކަމަށެވެ. އަދި މާތް ﷲ މައްޔިތާގެ ފާފަ ފުއްސަވައި ސުވަރުގޭގެ މަތިވެރި ނިއުމަތް މިިންވަރު ކުރެއްވުން އެދި ދުއާ ދަންނަވާފައިވެއެވެ.
ޝާހިދުގެ ބައްޕާފުޅު ޝައިހް މޫސާ ޖަމީލަކީ ހުރަވީ ދަރިކޮޅުން ދުނިޔޭގައި ތިއްބެވި ބޭފުޅުންގެ ތެރެއިން އެންމެ ދޮށީ ބޭފުޅާއެވެ.
މޫސާ ޖަމީލުގެ ހަޔާތުގެ ބޮޑު ބައި ހޭދަ ކުރެއްވީ ކިޔަވައި ދެއްވުމުގައެވެ. މަދަރުސަތުއް ސަލާހިއްޔާގައި ކިޔަވާދެއްވި މޫސާ ޖަމީލަކީ ރާއްޖޭގައި އެންމެ ގިނަ އަދެއްގެ މުދިމުން ތަމްރީނުކޮށް ދެއްވި ހިދުމަތްތެރިޔާއެވެ. ކިޔަވާދެއްވުމުގެ އިތުރުން މޫސާ ޖަމީލު ވަނީ އިސް ފަނޑިޔާރެއްގެ ގޮތުގައި ގިނަގުނަ ހިދުމަތަކެއް ކޮށްދެއްވާފައެވެ.
މޫސާ ޖަމީލަށް ލިބިވަޑައިގެންނެވި 5 ބޭފުޅުންގެ ތެރެއިން ދުނިޔޭގައި ތިއްބެވީ އެންމެ ދޮއްޓަށް ހުރި މުހައްމަދު ޝާހިދާއި ޖެހިގެން ހުންނެވި އަބްދުﷲ ޝާހިދާއި އަހުމަދު ޝާހިދެވެ. އެންމެ ހަގަށް ލިބިވަޑައިގަތީ ފާތުމަތު ޝާހިދާ އާއި އާމިނަތު ޝާހިދާއެވެ.
1980ގައި މުޅި ރާއްޖެ ސިއްސުވާލި ހިތާމަވެރި ހާދިސާއެއްގައި އެ ދެބެން އެކުގައި އަވަހާރިވިއިރު ފާތުމަތުގެ އުމުރަކީ 14 އަހަރެވެ. އާމިނަތުގެ އުމުރުން 12 އަހަރެވެ. އެ ހާދިސާ ހިނގީ ސްކޫލް ޗުއްޓީގައި ވ. އަތޮޅު ކެޔޮދޫއަށް ކުރި ދަތުރުގެއްގެ ތެރޭގައި މޫދަށް ގެނބިގެނެވެ.
ކުރީގެ އުއްތަމަފަނޑިޔާރު، އަދި މަޝްހޫރު އަދީބު ޝައިޚު މުހައްމަދު ޖަމީލް ދީދީ އަކީ، ޝެއިޚް މޫސާ ޖަމީލްގެ އެއްބަނޑު އެއްބަފާ ބޭބެ އެވެ. ޝައިޚު ޖަމީލު ދީދީ ފަނޑިޔާރު މަނިކުފާނަކަށް ހުންނެވިއިރު، މޫސާ ޖަމީލު ވެސް ފަނޑިޔާރުކަން ކުރެއްވި އެވެ. ނަމަވެސް، ހަޔާތުގެ ބޮޑުބައި ހޭދަކުރެއްވީ ޓީޗަރެއްގެ ގޮތުގަ އެވެ.
ދޮންބަންޑާރައިންނަކީ ޝައިހް މޫސާ ޖަމީލު ދީދީގެ ފަސް ވަނަ ކާފާފުޅެވެ.
ރައީސް މައުމޫންގެ ވެރިކަމުން ފެށިގެން ސަރުކާރުގެ އިސް މަގާމުތަކެއް ފުރުއްވި އަބްދުﷲ ޝާހިދު ބައްޕާފުޅު އަވަހާރަވުމާއި ގުޅިގެން ކުރެއްވި ޕޯސްޓްގައި ވިދާޅުވީ އެމަނިކުފާނު ހަޔާތްޕުގައި ދިމާވި ހުރިހާ ކަމެއްގައިވެސް އެންމެ ބޮޑު ހިއްސާއެއް އޮތް ފަރާތަކީ ބައްޕާފުޅު ކަމުގައެވެ.
މޫސާ ޖަމީލްގެ ޖަނާޒާ މިއަދު އޮތީ އިސްލާމީ މަރުކަޒުގައެވެ. ފަސްދާނުލާފައި ވަނީ ގަލޮޅު ސަހަރާގައެވެ.
