ފުވައްމުލަކު ދެކުނު ދާއިރާގެ ގޮނޑިއަށް އެމްޑީޕީގެ ޓިކެޓުގައި ވާދަކުރި ނަޒްރާ ނަސީމަށް ގޮނޑި ކާމިޔާބު ނުކުރެވުނީ އޭނާގެ ބޭބެ،، ފުވައްމުލަކަށް ނިސްބަތްވާ މިދިޔަ ސަރުކާރުގެ ނައިބް ރައީސް ފައިސަލް ނަސީމުގެ ސަބަބުން ކަމަށް އެ ދާއިރާއަށް ވާދަކުރެއްވި އެމްޑީޕީ ކެންޑިޑޭޓް ނަޒްރާ ނަސީމްގެ ފިރިކަލުން، ކުރީގެ ޔޫތް މިނިސްޓަރ އަހްމަދު މަހްލޫފް ތުހުމަތު ކޮށްފިއެވެ.
ނަޒޫއަށް ނާކާމިޔާބުވީ އެންމެ 48 ވޯޓުގެ ތަފާތުންނެވެ. އެގޮނޑި ކާމިޔާބު ކުރީ ޕީއެންސީގެ ޓިކެޓުގައި ވާދަކުރި ކެނޑިޑޭޓެވެ.
މިއަދު މަހުލޫފު ކުރެއްވި އެކްސް ޕޯސްޓެއްގައި ވިދާޅުވީ އިންތިޚާބުގެ ނަތީޖާ ގަބޫލު ކުރައްވާކަމަށާއި، އެހެންނަމަވެސް، ކަން ހިނގާދިޔަގޮތް ސާފުކޮށްދޭން ބޭނުންވާ ކަމުގައެވެ.
އެގޮތުން އޭނާ ވިދާޅުވީ ރިޔާސީ އިންތިޚާބުގައި ރައީސް ޞާލިހާއި ދެކޮޅަށް މަސައްކަތްކޮށް ވެެރިކަން ބަދަލުކުރިގޮތަށް މިފަހަރު ފައިސަލް ނަސީމު މިވަނީ 48 ވޯޓުގެ ފަރަގަކުން އެގޮނޑި އެމްޑީޕީއަށް ގެއްލުވާލާފައި ކަމުގައެވެ.
އަދި އޭނާ ވިދާޅުވީ މިކަމުގައި ނަޒޫގެ އާއިލާ އާއި ފުވައްމުލަކު ދެކުނު ދާއިރާގެ ޓީމު އޮތީ ދޫދޭ ގޮތަކަށް ނޫންކަމަށާއި އެމައްސަލަ ބަލާ އެމްޑީޕީގެ ފަރާތުން ފައިސަލް އަށް ފިޔަވަޅުއަޅަން ޖެހޭނެކަމުގައެވެ.
ނިމިދިޔަ މަޖިލިސް އިންތިޚާބުގައި ފައިސަލްވަނީ އެމްޑީޕީގެ ގިނަ ކެނޑިޑޭޓުންނަށް ކެމްޕޭން ކޮށްދިނުމަށް ދާއިރާތަކަށް ދަތުރު ކޮށްފައެވެ. އެހެންނަމަވެސް އޭނާ ފުވައްމުލަކަށް ދަތުރު ކޮށްފައެއް ނުވެއެވެ.
އެނގިފައިވާ ގޮތުގައި ނަޒޫގެ ކެމްޕޭނަށް ދިއުމަށް ބައެއް ފަރާތްތަކުން ފައިސަލް ނަސީމްގެ އަރިހުން އެދިފައިވެއެވެ. އެހެންނަމަވެސް ފައިސަލް ނަޒޫގެ ކެމްޕޭނަށް ގޮސްދިނުމަށް އިންކާރުކޮށްފައިވާކަމަށް އެފަރާތްތަކުން ބުނެފައި ވެއެވެ.
