މަޝްޢަރު ޓުއާސް ނަމަކަށް ކިޔާ ގުރޫޕެއްގެ ހަވާލުގައި އުމްރާއަށް ދިޔަ މީހުން ރާއްޖެ ގެނެސްފިއެވެ. އެމީހުން ރާއްޖެ ގެނައީ އެ އެޖެންސީގެ ހަރަދުގައެވެ.
އެނގިފައިވާ ގޮތުގައި މި ގުރޫޕްގެ އެހީގައި 50 މީހުން އުމްރާއަށް ގޮސްފައި ވެއެވެ. އެމީހުން އުމްރާގެ އަޅުކަމަށްފަހު ރާއްޖެ އައުމަށް ހަމަޖެހިފައި އޮތީ މިމަހުގެ 16 ވަނަ ދުވަހުއެވެ. އެހެންނަމަވެސް އެންމެ ފަހުވަގު އެ ގުރޫޕުން ހައްޖަށް ދިޔަ މީހުންނަށް އަންގާފައިވަނީ ޓިކެޓްތައް ކެންސަލްވެފައިވާ ކަމަށެވެ.
ނިމުނު ރޯދަ މަހުގެ އުމްރާ ޕެކޭޖަށް މަޝްއަރު ޓުއާސްއިން 21 ދުވަހުގެ އުމްރާގެ އަގަކަށް ކަނޑައަޅާފައި ވަނީ 38،500 ރުފިޔާ އެވެ. އޭގެ ތެރޭގައި ހިމެނިފައި ވަނީ މައްކާ އާއި މަދީނާގައި ތިބުމުގެ ހަރަދާއި ދެކޮޅު ޓިކެޓާއި ވިސާ އާއި ދަތުރުފަތުރުގެ އިތުުރުން ތިން އިރުގެ ކެއުމުގެ ހަރަދެވެ.
މި ގުރޫޕުގެ މީހުން ރާއްޖެ ގެނެސްފައިވަނީ މިދިޔަ ހޮނިހިރު ދުވަހުއެވެ. އެއެންމެން ރާއްޖެ ގެނެސްފައިވަނީ އެ އެޖެންސީގެ ހަރަދުގައެވެ.
އުމްރާއަށް މީހުން ގެންދިޔުމުގެ ހުއްދަ ނެތި މީސްމީހުންގެ އަތުން ފައިސާ ނަގަމުންދާތީ، މަޝްއަރު ގުރޫޕާއި އިތުރު ޖަމާއަތަކާ މެދު ސަމާލުވުމަށް މިދިޔަ ޖެނުއަރީ މަހު އިސްލާމިކް މިނިސްޓްރީން ވަނީ އިލްތިމާސް ކޮށްފައެވެ.
އިސްލާމިކް މިނިސްޓަރު މިމަހުގެ 17 ވަނަ ދުވަހު ކުރި އެކްސް ޕޯސްޓެއްގައި ވިދާޅުވެފައިވަނީ އުމްރާއަށް މީހުން ގެންދިއުމާ ބެހޭ ގޮތުން ރާއްޖޭގައި އަމަލުކުރަމުން އަންނަ ރަސްމީ އުޞޫލުތަކާ ޚިލާފަށް މީހުން އަތުން ލާރި ނަގައި އެއަށް އިހުމާލުވަމުންދާ ޖަމާޢަތެއްގެ މައްސަލަ ތަޙުޤީޤުކޮށް ފިޔަވަޅު އެޅުމަށް މިއަދު ޕޮލިހަށް ހުށަހަޅާނެ ކަމަށެވެ.
އައުމަށް ޓިކެޓް ކެންސަލްވުމުން އެގްރޫޕް ގޮވައިގެން ކޯޓަށް ދާން ޖެހިދާނެ ކަމުގެ އިންޒާރު ޓިކެޓް ވިއްކި ޓްރެވަލް އެޖެންސީން ދީފައިވެއެވެ.
މަޝްއަރު ހައްޖު އެންޑް އުމްރާ ގުރޫޕުގެ ހުއްދަ މިދިޔަ އަހަރު އިސްލާމިކް މިނިސްޓްރީން ވަނީ ބާތިލް ކޮށްފައެވެ. އެހެންނަމަވެސް މިފަހަރު އެގުރޫޕުން މީހުން އުމްރާއަށް ގެންގޮސްފައި ވަނީ އެ ޖަމާއަތުގެ ނަމަށް އެ ގްރޫޕްގެ ނަން ޓްރެވެލް އެޖެންސީއެއްގެ ނަމަށް ބަދަލު ކޮށްގެންނެވެ.
