ކުޑަކުދިންނަށް ކުރާ އަނިޔާއާއާމެދު ދައުލަތުން އިޙުމާލުވެފައިވާ މައްސަލަތަކެއް ރިޔާސީ ކޮމިޝަނުން ބަލަން ފަށައިފި

ކުޑަކުދިންނަށް ކުރާ އަނިޔާތަކުގެ މައްސަލާގައި ދައުތަލަތުން އިޙްމާލުވެފައިވާ މައްސަލަތަކުގެ ތަޙްޤީޤެއް ކުރަމުން އަންނަކަމަށް ކުޑަކުދިންނަށް ކުރާ އަނިޔާތަކުގެ މައްސަލަތައް ބަލާ ކޮމިޝަނުން ބުނެފިއެވެ.

އެކޮމިޝަނުން ކުރަމުން އަންނަ މަސައްކަތްތަކާއި ގުޅޭގޮތުން ނެރެފައިވާ ބަޔާނެއްގައި ބުނެފައިވަނީ ދައުލަތުގެ ބެލުމުގެ ދަށުގައި ކުޑަކުދިން ބަލަހައްޓާ ތަފާތު 5 މަރުކަޒެއް ހުރިއިރު، އެތަންތަނަށް ޒިޔާރަތްކޮށް އިޞްލާހުކުރަންޖެހޭ ކަންތައްތަކެއް ހުރިކަން އެކޮމިޝަނަށް ފާހަގަކުރެވިފައިވާކަމަށެވެ.

އެގޮތުން އެކޮމިޝަނުން އެކުލަވާލާފައިވާ ޕްރިލިމިނަރީ ރިޕޯޓުތަކުގައި ވަނީ ހުޅުމާލޭގައި ހުންނަ ކުޑަކުދިން ބަލަހައްޓާ ފިޔަވައްޗާއި ގުޅޭ 15 ރިކޮމެންޑޭޝަނާއި، ދޫނިދޫ ކަސްޓޯޑިއަލް އާއި އަތޮޅުވެހި ކަސްޓޯޑިއަލްގައި އިޞްލާހުކުރަންޖެހޭ 11 ރިކޮމެންޑޭޝަނަކާއި، އައްސޭރި ޖަލާ ގުޅޭ 13 ރިކޮމެންޑޭޝަނެއް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި ހިއްސާކުރައްވާފައިވާކަން ފާހަގަކުރައްވާފައެވެ. އެ ރިކޮންމެޑޭޝަންތައް ތަންފީޒުކުރުމަށް ޖެންޑާރ މިނިސްޓްރީން ޕްލޭނެއް އެކުލަވާލައި، އެ ޕްލޭންއާ އެއްގޮތަށް މަސައްކަތް ކުރަމުންދާކަމަށްވެސް ކޮމިޝަންގެ ބަޔާނުގައިވެއެވެ.

ކުޑަކުދިންގެ ހައްޤުތައް ރައްކާތެރިކޮށް، ކަށަވަރުކޮށްދިނުމާއި، އަވަސް، ނިޒާމީ އަދި ހަރުދަނާ މަސައްކަތްތަކެއް ކުރެއްވުމުގެ ބޭނުމުގައި، ކުޑަކުދިންނަށް ކުރާ އަނިޔާތަކާގުޅޭ މައްސަލަތައް ބަލާ ކޮމިޝަނެއް ރައީސުލްޖުމްހޫރިއްޔާ އުފައްދަވާފައިވަނީ މިއަހަރުގެ ފެބުރުއަރީ މަހުގެ 20ވަނަ ދުވަހުއެވެ.

މީގެ އިތުރުން ކުޑަކުދިންނަށް ކުރާ އަނިޔާގެ މައްސަލަތަކުގައި ކަމާބެހޭ މުއައްސަސާތަކުން އަމަލުކޮށްފައިވާ ގޮތް ދެނެގަތުމަށް، ޖެންޑަރ މިނިސްޓްރީއާއި ފުލުހުންނަށް ހުށަހެޅޭ މައްސަލަތަކުގެ ފައިލް އޮޑިޓެއްގެ މަސައްކަތް ކުރަމުން އަންނަކަމަށާއި، ގާނޫނީ ނިޒާމުގެ ތެރެއިން ކުޑަކުދިންގެ ޙައްޤުތައް އެންމެ ފުރިހަމައަށް ކަށަވަރުކުރެވޭކަން ވަޒަންކުރުމަށްޓަކައި ކަމާގުޅޭ ގާނޫނުތައް ރިވިއުކުރުމުގެ މަސައްކަތް ކުރަމުން އަންނަކަމަށް ކުޑަކުދިންނަށް ކުރާ އަނިޔާތަކުގެ މައްސަލަތައް ބަލާ ކޮމިޝަނުން ބުނެއެވެ. އަދި  ދައުލަތުގެ އިދާރާތަކުން އިހުމާލުވެފައިވާކަމަށް ފާހަގަކުރެވޭ މައްސަލަތަކާގުޅޭ ތަހުގީގުގެ މަސައްކަތްތައްވެސް ކުރަމުން އަންނަކަން އެކޮމިޝަނުގެ ބަޔާނުގައިވެއެވެ.

ފަސް މެމްބަރުން އެކުލެވޭ ޑަކުދިންނަށް ކުރާ އަނިޔާތަކުގެ މައްސަލަތައް ބަލާ ކޮމިޝަނުން އެމަރުކަޒުތަކަށް ޒިޔާރަތްކޮށްފައިވަނީ މިއަހަރުގެ މާރިޗް މަހުގެ 10 އިން އޭޕްރީލް މަހުގެ 14 ވަނަ ދުވަހާއި ދެމެދުއެވެ.

ކޯވިޑް19ގެ ބަލިމަޑުކަމުގެ ޙާލަތާ ގުޅިގެން އެކޮމިޝަންގެ މަސައްކަތް ހަލުވިކަމާއެކު ކުރިއަށްގެންދިޔުމަށް ހުރަސްތަކެއް ކުރިމަތިވިކަން ފަހަގަކޮށް ކޮމިޝަނުން ނެރެފައިވާ ބަޔާނުގައި ވަނީ އެންމެ ބޮޑު އަމާޒަކަށްވީ ވިހާވެސް އަވަހަށް އެކޮމިޝަނުގެ މަސައްކަތްތައް ފުރިހަމަކޮށް، ކުޑަކުދިންގެ ހައްގުތައް ކަށަވަރުކޮށްދިނުމަށްޓަކައި ނިޒާމީގޮތުން ގެންނަންޖެހޭ ބަދަލުތައް ގެނައުމަށާއި، ކުޑަކުދިންނަށް ޚިދުމަތްތައް ފޯރުކޮށްދޭ މުއައްސަސާތަކުގައި ރަނގަޅުކުރަން ޖެހޭ ކަންކަން ދެނެގަނެ އެކަންކަން އިޞްލާހުކުރެވޭނެ ގޮތްތައް ހުށަހަޅައި، ކޮމިޝަންގެ ހުށަހެޅުންތައް ތަންފީޒުކުރުމަށް ބާރުއެޅުންކަމަށްވެސް ބުނެފައިވެއެވެ.

ފަހަކަށް އައިސް ކުޑަކުދިންނަށް ކުރާ ޖިންސީ އަނިޔާގެ މައްސަލަތައް އިތުރުވެފައިވާއިރު، ކުޑަކުދިންނަށް ކުރާ އަނިޔާއާއި ގުޅޭގޮތުން މިސަރުކާރުން ގެންގުޅެނީ ޒީރޯ ޓޮލަރެންސްކަމަށް ސަރުކާރުން ވަނީ ހާމަކޮށްފައެވެ.