ސުޕަ މެޖޯރިޓީއާ އެކީގައި ބިރުދައްކާ ނަފުސާނީ ގޮތުން ގެއްލުންދީ ނުހަދާނަން، މައިނޯރިޓީއަށް އިހުތިރާމް ކުރާނަނެ ކަމަށް އޭދަފުށި ދާއިރާގެ މެމްބަރު އަހުމަދު ސަލީމް ވިދާޅުވެއްޖެއެވެ.
ސަލިމް މިހެން ވިދާޅުވީ މަޖިލީހުގެ އިންތިހާބުގެ ދުވަސްކޮޅެއް ކުރިން ފެށިގެން ޖަލްސާތައް މެދުކަނޑާލައިފައި އޮތުމަށް ފަހު މަޖިލީހުގައި މިއަދު ބޭއްވި ފުރަތަމަ ޖަލްސާގައި ވާހަކަ ދައްކަވަމުންނެވެ.
ސަލީމް ވިދާޅުވީ އާރާއިބާރު އަދި ތަނަވަސްކަމަކީ ހެއްދެވި ފަރާތުން ދެއްވާ އެއްޗެއް ކަމަށާއި، އެކަލާނގެ ބެނުން ވުމުން އެ ބާރު ގެންދަވާނެ ކަމަށެވެ.
ބާރު ހުރި ފަރާތްތަކުން މިކަންކަން ކުރާ ކަމަށް ވަންޏާ ދުވަހަކު ވެސް އަޅުގަނޑުމެންގެ މިގައުމު އިސްލާހުވެެގެން ނުދާނެ. އިރާދަކުރެއްވިއްޔާ މާތް ﷲގެ ރަހުމަތްފުޅާ އެކީގައި ، އަޅުގަނޑުމެންގެ ސުޕަ މެޖޯރިޓީއާ އެކީގައި އެއްވެސް ބަޔަކަށް ބިރުދައްކައި، އެއްވެސް ބަޔަކަށް ނަފުސާނީ ގޮތުން ގެއްލުންދީ ، އަދި މިތާ އޮތް މައިނޯރިޓީއަށް އިހުތިރާމްނުކޮށް އެމީހުން ނަފުސާނީ ގޮތުން ބަލިކޮށްލާކަށް އަަޅުގަނޑުމެން މަސައްކަތެއް ނުކުރާނަން.
ސަލީމް ވިދާޅުވި އެވެ.
ވިހިވަނަ ރަައްޔިތުންގެ މަޖިލީހަށް މެމްބަރުން ހޮވަން ބޭއްވި އިންތިހާބުގައި ޕީއެންސީން 66 ގޮނޑި ކާމިޔާބުކުރި އިރު އެޕާޓީގެ ތާއީދާ އެކު ހޮވުނު މެމްބަރުންނާ އެކު ޖުމްލަ 70 ގޮނޑި، އެޕާޓީއަށް ލިބުނެވެ. އިދިކޮޅު އެމްޑީޕީއަށް ލިބުނީ 12 ގޮނޑި އެވެ. ވިހި ވަނަ މަޖިލީހުގައި ޖުމްލަ 93 މެމްބަރުން ތިއްބަވާނެ އެވެ.
