އިއްޔެ ބޭއްވުނު މަޖިލިސް އިންތިޚާބުގައި ވެރިކަން ކުރާ ޕީއެންސީއަށް ލިބުނު ކާމިޔާބީ ފާހަގަ ކުރުމަށް މިރޭ އާރޓިފިޝަލް ބީޗަށް ގިނަ ބަޔަކު ޖަމާވެއްޖެއެވެ.
މިރޭގެ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ދެން އޮތީ މަސައްކަތުގެ ދުވެލި އަވަސްކުރުން ކަމަށާއި، ފާއިތުވި 5 މަސްދުވަހުގެ މަސައްކަތްތައް ދިޔައީ ވަރަށް ދަތި އުދަގުލުގައި ކަމުގައެވެ.
ރައީސް މުއިއްޒު ވިދާޅުވީ ފާއިތުވި 5 މަސްދުވަހަކީ އެއްވެސް އެއްޗެއް ނޫންކަމަށާއި، ކެބިނެޓް ވަޒީރުންނާއި ކުންފުނިތަކުގެ އެމްޑީން ދެން އުޅުއްވަންވާނީ 24 ގަޑިއިރު ހޭލާކަމުގައެވެ. ރައީސް މުއިއްޒު ވިދާޅުވީ ގެދޮރު ނެތުމުގެ ހިތްދަތިކަން މާޒީއާއެކު ވެގެން ދާނެކަމަށާއި، އެމަސައްކަތް ކާމިޔާބު ކުރައްވާނެ ކަމުގައެވެ.
ރައީސް މުއިއްޒު ވިދާޅުވީ މުޅި ގައުމު އެކައްޗެއް ކިޔާ ދިން މެސެޖަކީ ތިމްނަންމެން ބޭނުންވަނީ ހުސް ވާހަކަ ދެއްކުން ނޫންކަމަށާއި، ބޭނުންވަނީ އަމަލުން ކަންކަން ވާކަން ދެއްކުން ކަމުގައެވެ. އަދި ރައީސް ވިދާޅުވީ އަމަލީ ގޮތުން ކުރާ މަސައްކަތް ފެނިގެންދާނެ ކަމަށާއި، "މިޓީމް" ދެމި ތިބޭނީ މަސައްކަތުގައި ކަމުގައެވެ.
އަދި ރައީސް ވިދާޅުވީ ކަންކަން ބަލަން ތިއްބެވި ބޭރު ދުނިޔޭގެ ގައުމުތަކަށްވެސް ރައްޔިތުން ބޭނުންވާކަންކަން މިހާރު ސާފުވާން ވާނެ ކަމުގައެވެ. އަދި ދިވެހިން ބޭނުންވަނީ ދިވެހީންގެ ކަންކަން ދިވެހިން ނިންމަންކަން ބޭރުދުނިޔެއަށް ސާފުވާނެކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ އެހެންކަމުން ބޭނުންފުޅުވަނީ ޚިޔާލުތަފާތުވުން ދޫކޮށްލާ ހުރިހާ ސިޔާސީ ޕާޓީތަކަށްވެސް އެއްބައެއްގެ ގޮތުގައި ކުރިޔަށް ދިއުން ކަމުގައެވެ.
އަދި ރައީސް ވަނީ ހުރިހާ ސިޔާސީ ޕާޓީތަކަށާއި އެޕާޓީތަކުގެ ލީޑަރުންނަށާއި މެމްބަރުންނަށްވެސް އެންމެން އެކީގައި ކުރިޔަށް ދިއުމަށް ގޮވާލައްވާފައެވެ.
ރައީސް މުއިއްޒުގެ ވާހަކަފުޅަސްފަހު ދެން އޮތީ ބަޑިބޭހުގެ ކުޅިވަރުތަކެވެ. މިރޭގެ އުފާފާޅުކުރުމުގެ ޖަލްސާ ނިންމާލާފައިވަނީ ކުރެވުނު ޚާއްސަ ދުއާއަކުންނެވެ.
