އިއްޔެ ބޭއްވި ރައްޔިތުންގެ މަޖިލީހުގެ އިންތިހާބުން ސަރުކާރު ހިންގާ ޕާޓީ، ޕީއެންސީ އަށް ލިބުނު ބޮޑު ކާމިޔާބީ ފާހަގަކުރަން މިރޭ މާލޭގައި ހަވާ އަރުވަން ނިންމާފައިވާއިރު، އެ އިންތިޚާބުގައި ޕީއެންސީ ކާމިޔާބު ކުރި ދާއިރާތަކުގައިވެސް ހަވާ އަރުވަން ނިންމައިފިއެވެ.
މި ސަރުކާރުގެ ޓުއަރިޒަމް މިނިސްޓަރ އިބުރާހިމް ފައިސަލް ވިދާޅުވީ ލ. އަތޮޅުން ގޮނޑި ކާމިޔާބު ކުރެވުނު ތިން ދާއިރާކަމުގައިވާ އިސްދޫ, ގަން އަދި ފޮނަދޫ ދާއިރާގައި ހަވާ އެރުވުމަށް މިހާރު ނިންމާފައިވާ ކަމުގައެވެ. މި ދާއިރާތަކުގެ ތެރެއިން ފޮނަދޫ ދާއިރާއަކީ ރައީސް މުއިއްޒުގެ އިސް މުޝީރު އަބުދުއްރަހީމް ކާމިޔާބު ކުރެއްވި ދައިރާއެވެ.
ފައިސަލް ވިދާޅުވެފައިވަނީ ހަވާ އަރުވާނެ ތާރީޚު އަދި ނިންމާފައި ނުވިނަމަވެސް މި ހަފްތާ ބަންދުގައިވެސް އުފާ ފާޅުކުރުމުގެ ހަރަކާތްތަކެއް ކުރިޔަށް ގެންދިއުމަށް ނިންމާފައިވާ ކަމުގައެވެ.
އިއްޔެ ބޭއްވި ރައްޔިތުންގެ މަޖިލީހުގެ އިންތިހާބުން ސަރުކާރު ހިންގާ ޕާޓީ، ޕީއެންސީ އަށް ލިބުނު ބޮޑު ކާމިޔާބީ ފާހަގަކުރަން މިރޭ މާލޭގައި ހަވާ އެރުވުމާ އެކު، ހާއްސަ ޖަލްސާއެއް ބާއްވަން ވަނީ ނިންމާފައެވެ.
ޕީއެންސީން ބުނެފައިވަނީ 'ދިވެހީންގެ ރާއްޖެ މަޖިލީހަށް – މަރުހަބާ’ގެ ނަމުގައި ދިވެހިންނަށް މަރުހަބާ އާއި ޝުކުރު އަދާކުރުމަށް އެ ޕާޓީން މިރޭ ހާއްސަ ޖަލްސާއެއް ބާއްވާނެ ކަމަށެވެ. ޖަލްސާ ބާއްވާނީ މިރޭ 8:30 ގައި އާޓިފިޝަލް ބީޗުގައެވެ.
އެ ޖަލްސާ އަށް ހުރިހާ ދިވެހިންނަށް ދައުވަތު ދީފައިވާއިރު އެ ހަފުލާއަށް ފަހު ހަވާ އެރުވުން އޮންނާނެ ކަމަށް ޕީއެންސީން ބުންޏެވެ.
ވިހި ވަނަ ރައްޔިތުންގެ މަޖިލީހަށް މެންބަރުން ހޮވުމަށް އިއްޔެ ބޭއްވި އިންތިހާބުގައި ޕީއެންސީން ވަނީ މަޖިލީހުގެ ސުޕަ މެޖޯރިޓީ ހޯދައިފައެވެ. ވަގުތީ ނަތީޖާތައް ދައްކާ ގޮތުގައި ޕީއެންސީގެ ކެންޑިޑޭޓުންނާއި ސަރުކާރަށް ވާގިވެރިވާ ކެންޑިޑޭޓުންނާ އެކު މިހާތަނަށް ސަރުކާރަށް 71 ގޮނޑި ލިބެއެވެ.
