އިއްޔެ ކުރިއަށް ގެންދިޔަ ރައްޔިތުންގެ މަޖިލީހުގެ އިންތިހާބުގެ އެމްޑީޕީއަށް ލިބުނު ނަތީޖާއިން މާޔޫސްވެވެއްޖ ެކަމުގައި އެ ޕާޓީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.
މަޖިލިސް އިންތިހާބުގެ ވަގުތީ ނަތީޖާ އިން ދައްކާ ގޮތުގައި ޕީއެންސީއަށް 68 ގޮނޑިއާއެކު ވަނީ ސުޕަ މެޖޯރިޓީ ކަށަވަރުވެފައެވެ. އެމްޑީޕީއަށް ލިބިފައިވަނީ 10 ގޮނޑިއެވެ.
ފައްޔާޒު ރޭ އެކްސްގައި ކުރެއްވި ޕޯސްޓެއްގައި ވިދާޅުވީ އެމްޑީޕީގެ ޓިކެޓުގައި ވާދަކޮށް އިންތިހާބު ކާމިޔާބުކުރެއްވި ހުރިހާ ކެންޑިޑޭޓުންނަށް މަރުހަބާ ދަންނަވާ ކަމަށެވެ. އަދި ވަނީ އިންތިހާބު ކާމިޔާބު ކުރެއްވި ޕީއެންސީގެ ކެންޑިޑޭޓުންނަށް ވެސް މަރުހަބާ ދަންނަވައިފައެވެ.
"މިއަދުގެ ނަތީޖާއީން މަޔޫސްވެއްޖެ، މއީ އެމްޑީޕީން ރައްޔިތުންނާ ގާތުން މަސައްކަތްކޮށް، ޕާޓީގެ ސިޔާސަތުތައް ކިޔައިދޭންވި ވަގުތު،" ފައްޔާޒު ވިދާޅުވިއެވެ.
"އެމްޑީޕީ މެމްބަރުން ތިބޭނީ ސަރުކާރާ ގުޅިގެން ޑިމޮކްރަސީގެ ހަމަތައް ހިފެހެއްޓުމަށް ތައްޔާރަށް"
އެމްޑީޕީއަށް، މަޖިލިސް އިންތިހާބު ކާމިޔާބު ކޮށްދިނުމަށް މަސައްކަތް ކޮށްދިން ހުރިހާ ފަރާތްތަކަށް ޝުކުރު އަދާކުރައްވާ ކަމަށް ފައްޔާޒު ވިދާޅުވިއެވެ.
މަޖިލިސް އިންތިހާބުގައި އަމިއްލަ ގޮތުން ވާދަކުރެއްވި 11 މެމްބަރަކު ވަނީ ގޮނޑި ކަށަވަރުކޮށްފައެވެ. އެމްޑީއޭއިން ދެ ދާއިރާއެއްގެ ގޮނޑި ކާމިޔާބު ކުރެއްވި އިރު، ޖުމްހޫރީ ޕާޓީ އެއް ދާއިރާގެ ގޮނޑި އަދި އެމްއެންޕީން ވަނީ އެއް ދާއިރާގެ ގޮނޑި ކަށަވަރުކޮށްފައެވެ.
އިންތިހާބުގައި ދަ ޑިމޮކްރެޓްސް އަދި އަދާލަތު ޕާޓީން ވެސް ވާދަކުރިއެވެ. އެ ދެ ޕާޓީއަށް އެއްވެސް ގޮނޑިއެއް ކާމިޔާބު ކުރެވިފައެއް ނުވެއެވެ.
