މަޖިލިސް އިންތިހާބުގެ ކެމްޕެއިން މިއަދު އިރުއޮއްސި 6ގެ ފަހުން ނުކުރެވޭނެ ކަމުގައި އިލެކްޝަންސް ކޮމިޝަންއިން ބުނެވިއެވެ. އިލެކްޝަންސް ކޮމިޝަނުން ބުނެފައިވަނީ މިއަދު ހަވީރު 6:00 އިން ފެށިގެން ހޯމަ ދުވަހުގެ ހެނދުނު 6:00 އާއި ހަމައަށް ކެންޑިޑޭޓުންނަށް ތާއީދު ހޯދުމުގެ އެއްވެސް ހަރަކާތެއް ހިންގުމަކީ ގާނޫނީގޮތުން މަނާ ކަމެއް ކަމުގައެވެ.
އަދި އިލެކްޝަންސް ކޮމިޝަނުން ބުނެފައިވަނީ ކެމްޕޭން ކުރުން މަނާ ވަގުތުގައި ކެމްޕޭން ޖަގަހަތައް ހުޅުވައިގެންނާއި އަދި ކެމްޕޭން އޮފީސްތައް ހުޅުވައިގެންވެސް ކެމްޕޭނާ ގުޅުންހުރި އެއްވެސް މަސައްކަތެއް ކޮށްގެން ނުވާނެ ކަމުގައެވެ. އޭގެ އިތުރުން އެއްވުމެއްވެސް ރެލީއެއްވިޔަސް ބައްދަލުވުމެއް ވިޔަސް އަދި ދުއްވާ އެއްޗެއްގައި ޕޯސްޓަރެއް ހަރުކޮށްގެން ނަމަވެސް ތާއީދު ހޯދުމަށް އެއްވެސް ހަރަކާތެއް ނުހިންނޭގެ ކަމަށެވެ.
ހަމައެއެކު ވޯޓު ލާދުވަހުވެއް، ވޯޓުލާ މަރުކަޒުގެ ބޭރުގައި ގޮނޑި މޭޒު ބަހައްޓައިގެން ތާއީދު ހޯދުމަށްކަމަށް ބެލެވޭފަދަ އެއްވެސް އަމަލެއްވެސް ނުހިންގޭނަކަމަށްވެސް އިލެކްޝަންސް ކޮމިޝަނުން ބުނެފައި ވެއެވެ. އިލެކްޝަންސް ކޮމިޝަނުން ބުނެފައިވަނީ މިކަން ފުލުހުންނާއިވެސް އަދި ސިޔާސީ ޕާޓީތަކާވެސް ހިއްސާ ކޮށްފައިވާނެ ކަމަށެވެ.
އެގޮތުން، މިފަދަ އެއްވެސް މައުލޫމާތެއް ކޮމިޝަނަށް ލިބިއްޖެނަމަ ވަގުތު ފިޔަވަޅު އަޅާނެކަމަށްވެސް އިލެކްޝަންސް ކޮމިޝަނުން ބުނެފައިވެއެވެ. އިލެކްޝަންސް ކޮމިޝަނުން ވަނީ އަމާންކަމާ އޮމާންކަމާއެކު އިންތިޚާބުގެ ކަންކަން ކުރިޔަށް ގެންދިއުމަށް އާންމުންގެ އެހީތެރިކަމަށް އެދިފައެވެ.
