ކުރިޔަށް އޮތް ރައްޔިތުންގެ މަޖިލިހުގެ އިންތިޚާބުގައި ޑިމޮކްރެޓްސް ޕާޓީން އެ ޕާޓީގެ ދެ ކެނޑިޑޭޓަކަށް ކުރި ތާއީދު އަނބުރާ ގެންގޮސްފިއެވެ.
އެ ދެ ކެނޑިޑޭޓުންނަކީ އެ ޕާޓީގެ ޓިކެޓުގައި ގުރައިދޫ ދާއިރާއަށް ވާދަކުރާ ލީލާ އިބްރާހިމް މަނިކުއާއި ތިމަރަފުށީ ދާއިރާއަށް ވާދަކުރާ ފާތިމަތު ޒިލްމާއެވެ.
ޑިމޮކްރެޓްސްގެ ރައީސް ހަސަން ލަތީފު ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ އެ ދެ ކެނޑިޑޭޓުންނަަށް ކުރި ތާއީދު އަނބުރާ ގެންގޮސްފައިވަނީ އެ ކެނޑިޑޭޓުން އެ ދެ ދާއިރާގެ ޕީއެންސީގެ ކެނޑިޑޭޓުންނަށް ތާއީދުކުރަން ނިންމުމާއި ގުޅިގެން ކަމުގައެވެ.
ހަސަން ލަތީފު ވިދާޅުވީ މިކަމާ ގުޅިގެން ފިޔަވަޅު އެޅުމުގެ ޕްރޮސެސް ކުރިޔަށް ގެންދަން ޖެހޭކަމަށާއި، ފުރަތަމަ ކަމަކަށް ކުރިއަށް ގެންދަން ޖެހޭނެ ކަމަކީ އިންތިހާބާ ދޭތެރޭ މިއޮތް ފަސް ދުވަހުގައި އެޕާޓީގެ ތާއީދު އަނބުރާ ގެންގޮސްފައިވާކަން ޕަބްލިކަށް އެނގުން ކަމުގައެވެ.
މިހާތަނަށް އައިއިރު ޑިމޮކްރެޓްސް 2 ކެނޑިޑޭޓަކު ވަނީ ސަރުކާރު ކެނޑިޑޭޓަށް ތާއީދުކުރަން ނިންމާފައެވެ. ޑިމޮކްރެޓްސްގެ ކެނޑިޑޭޓުންނަށް ތާއީދު ހޯދުމަށް އެ ޕާޓީގެ ބާނީ ކުރީގެ ރައީސް މުހައްމަދު ނަޝީދު މާލެ ވަޑައިގެންނެވުމަށް ވަނީ ހަމަޖެހިފައެވެ.
