ކުރީގެ ރައީސް އަބްދުالله ޔާމީން އަބްދުލްގައްޔޫމް ގޭބަންދުގައި ބެހެއްޓުމުގެ ޝަރުތުތަކާ ތަކުރާރުކޮށް ހިލާފުވެފައިވާ ކަމަށް ބުނެ މޯލްޑިވްސް ކަރެކްޝަނަލް ސާވިސްއިން ފިޔަވަޅު އަޅާފައި ނުވާތީ ނޭޝަނަލް އިންޓެގްރިޓީ ކޮމިޝަން (އެންއައިސީ) އިން އެމައްސަލަ ބަލަން ފަށައިފި އެވެ.
އެންއައިސީގެ ރައީސް ޤާސިމް ޢަބްދުالله ކަރީމް ބައެއް މީޑިއާތަކަށް މައުލޫމާތު ދެއްވަމުން ވިދާޅުވީ އެ މައްސަލައާ ގުޅިގެން ކަރެކްޝަންސްއިން މައުލޫމާތު އެ ކޮމިޝަނުން މިހާރު ހޯދަމުން އަންނަ ކަމަށެވެ.
ނަމަވެސް ތަހުގީގާ ގުޅޭ އިތުރު މައުލޫމާތެއް އޭނާ ހާމައެއް ނުކުރައްވަ އެވެ.
ވ.އާރާ ވިއްކާލި މައްސަލާގައި ރިޝްވަތާއި މަނީ ލޯންޑަރިންގެ ކުށް ސާބިތުވެ ޔާމީން 11 އަހަރަށް ޔާމިން ޖަލަށް ލުމަށް ހުކުމްކުރީ 2022 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ. އެހެންނަމަވެސް ރައީސް ޔާމިން ގޭ ބަންދަށް ބަދަލުކުރީ 2023 ވަނަ އަހަރުގެ އޮކްޓޯބަރު މަހުގެ އެއްވަނަ ދުވަހުއެވެ. އެއީ ރިޔާސީ އިންތިހާބު ރައީސް ޑރ.މުހައްމަދު މުއިއްޒު ކާމިޔާބު ކުރެއްވިތާ އެއް ދުވަސް ފަހުންނެވެ.
އެމަނިކުފާނުގެ މައްޗަށް ކުށް ސާބިތުވުމާ ގުޅިގެން ސިޔާސީ މައިދާނުގައި ހަރަކާތްތެރިވުން ގާނޫނުން މަނާކޮށްފައިވީ ނަމަވެސް، ރައީސް ޔާމީން ދަނީ ޕީއެންއެފްގެ ހަރަކާތްތަކުގައި، ޕާޓީގެ ޖަލްސާތަކަށާއި ކެމްޕެއިން ހަފްލާތަކުގައި ވެސް ބައިވެރިވެވަޑައިގަންނަވަމުންނެވެ.
ކަރެކްޝަންސް އިން ތަކުރާރުކޮށް ރައީސް ޔާމިންއަށް އިންޒާރު ދެމުން ގެންގޮސްފައިވަނީ ސިޔާސީ ހަރަކާތްތެރިވަމުންދަނީ ގަވާއިދާ ހިލާފަށް ކަމަށް ބުނެ އެވެ.
ނަމަވެސް ރައީސް ނަޝީދުގެ މައްޗަށް މިހާތަނަށް އެއްވެސް ފިޔަވަޅެއް އަޅާފައެއް ނުވެއެވެ. ޔާމީންގެ މައްޗަށް އިއްވި ހުކުމް ހައިކޯޓުގައި ވަނީ އިސްތިއުނާފު ކޮށްފައެވެ. އިސްތިއުނާފު ކޯޓުން މީގެ މަހެއްހާ ދުވަސް ކުރިން އަޑުއެހުންތައް ނިންމާލި ނަމަވެސް އަދި ވެސް ހުކުމެއް އިއްވާފައެއް ނުވެ އެވެ.
