މި ސަރުކާރުން ރިޔާސީ ކޮމިޝަން ހަދައިގެން، ސިޔާސީ މީހުން ގެންގޮސް ހައްޔަރުކޮށް ޖަލަށް ނުލާނެ ކަމުގައި ރައީސް މުއިއްޒު ވިދާޅުވެއްޖެއެވެ.
އައްޑޫ ސިޓީ ހިތަދޫ ރައްޔިތުންނާ ބައްދަލުކުރުމަށް ރޭ ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ މި ސަރުކާރުގައި ބަދަލުހިފުމުގެ ރޫހު ނުފެންނާނެ ކަމަށާއި ސިޔާސީ ބޭފުޅުން ކިތަންމެ ގިނަ ވާހަކަތަކެއް ޕޯޑިއަމްތަކުގައި ދެއްކި ނަމަވެސް ހައްޔަރު ނުކުރާނެ ކަމަށެވެ.
ސިޔާސީ މީހަކަށް ވެގެން އަޅުގަނޑު ބިރެއް ނުގަނޭ އެއްވެސް މީހެއް ދެކެ. ކުރީގައި ހިނގިހެން ރިޔާސީ ކޮމިޝަން ހަދައިގެން، ނޫނީއްޔާ އެހެން ކޮމިޝަނެއް ހަދައިގެން ސިޔާސީ މީހުން ގެންގޮސް ހައްޔަރުކޮށް، ޖަލަށްލުމަކީ އަޅުގަނޑު ކުރާނެ ކަމެއް ނޫން.
ރައީސް ވިދާޅުވި އެވެ.
ރޭގެ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ބަދަލު ނުހިފާނެ ކަމަށް ރިޔާސީ އިންތިޚާބުގައި ވައުދުވި ކަމަށާއި ނަމަވެސް ބައެއް ފަރާތްތަކުގެ ކިބައިން ފެންނަނީ އަނެއްކާވެސް މަޖިލިސް ތެރެއިން ބާރު ހޯދައިގެން ރައްޔިތުންގެ މައްޗަށް ބަދަލު ހިފަން އުޅޭ މަންޒަރު ކަމަށެވެ.
އެ ފުރުސަތު ރައްޔިތުން ދީގެން ނުވާނެ ކަމަށާއި ރާއްޖެ އޮންނަން ޖެހޭނީ ދިވެހިންގެ އަތްމަތީގައި ކަމަށްވާއިރު މި މަހުގެ 21 ގައި ރައްޔިތުންލާ ވޯޓަކީ ތަރައްގީ އަށް ދޭ ވޯޓަކަށް ހެދުމަށް ރައީސް ގޮވާލެއްވި އެވެ.
ޔަގީންކަން މި ދެނީ އިރާދަކުރެވިއްޔާ ތަރައްގީ ގެނެސްދޭނީ ފުރިހަމަ އަށް.
ރައީސް މުއިއްޒު ވިދާޅުވި އެވެ.
