އައްޑޫގައި ސިމެންތި އަޅައިގެން ހަދާފައިވާ 60 ކިލޯ މީޓަރުގެ މަގުގައި ތާރު އެޅުމުގެ މަސައްކަތް ވަރަށް އަވަހަށް ފައްޓަވާނެ ކަމުގައި ރައީސް މުއިއްޒު ވިދާޅުވެއްޖެއެވެ.
އައްޑޫ ސިޓީ ހިތަދޫ ރައްޔިތުންނާ ބައްދަލުކުރުމަށް ރޭ ބޭއްވި ޖަލްސާގައި ވާހަކަފުޅުދައްކަވަމުން ރައީސް މުއިއްޒު ވިދާޅުވީ މި މަގުތަކުގައި ތާރަ އެޅުމުގެ މަސައްކަތް ކުރިޔަށް ގެންދަވާނީ އާރުޑީސީއާއި ހަވާލު ކޮށްގެން ކަމުގައެވެ.
މި ހަތަރު، ފަސް މަހު ތެރޭގައި ވެސް ބިޔަ ބޮޑެތި މަޝްރޫއުތަކެއް މި ފަށަނީ. އަދި މިވީ ހަތަރު، ފަސް މަސް ނޫންތޯ؟ ބްރިޖު މަސައްކަތް ފެށުނީ، ފެނުގެ ނިޒާމު އަޕްގްރޭޑް ކުރަން ހަވާލު މިކުރަނީ މި ހަފްތާގައި. ގޯސްކޮށް އަޅާފައި ހުރި މަގުތަކުގައި ތާރު އަޅަން ނިންމާ އެ މަސައްކަތް ހަވާލުކުރަނީ. ކެތް ލެބް ހިމެނޭ ގޮތަށް އެކި ކަހަލަ ތެރަޕީތައް ހިމެނޭ ގޮތަށް ހޮސްޕިޓަލް ފެންވަރު މަތީ ހޮސްޕިޓަލަކަށް ބަދަލުކުރުމުގެ މަސައްކަތް ހަވާލު މިކުރަނީ.
ރައީސް ވިދާޅުވި އެވެ.
ރޭގެ ޖަލްސާގައި ރައީސް މުއިއްޒު ވިދާޅުވީ އައްޑޫގެ 100 ކިލޯމީޓަރުގެ މަގު ހެދުމުގެ މަޝްރޫޢުގެ ތެރެއިން 60 ކިލޯމީޓަރު ހަދާފައިވަނީ އާދައިގެ ސިމަންތި ފަށަލައަކުންކަމުގައެވެ.
އެގޮތަށް ހުރި ހުރިހާ މަގުތައްވެސް ހިމެނޭހެން ތާރުއަޅައިގެން ޒަމާނީ ފެންވަރަށް އައްޑޫގެ މަގުތައް ތަރައްގީ ކުރުމަށް 18 މިލިއަން ޑޮލަރުގެ ހޭދަވާނެކަމަށް ރައީސް މުއިއްޒު ވިދާޅުވިއެވެ. އަދި އެ މަސައްކަތް، އަމަލީ ގޮތުން މިއަހަރު ފަށާނެކަމަށްވެސް ރައީސް ވިދާޅުވިއެވެ.
