ދެކުނުގެ ހަތަރު އަތޮޅު ތަރައްގީވެގެން އަންނައިރު އެ ސަރަހައްދުގެ މައި މަރުކަޒަކަށް ވާނީ އައްޑޫ ސިޓީކަމުގައި ރައީސް މުއިއްޒު ވިދާޅުވެއްޖެއެވެ.
އައްޑޫގައި އެ ސިޓީގެ ރައްޔިތުންނާ މިރޭ ބައްދަލުކުރައްވާ ރައީސް މުއިއްޒު ވިދާޅުވީ މާލެއާއި އެއް ފެންވަރުގައި ރާއްޖޭގެ ބައެއް ސަރަހައްދުތައް ތަރައްގީކުރުމަކީ އެމަނިކުފާނުގެ ސަރުކާރުގެ ވަރަށް މުހިއްމު ސިޔާސަތެއް ކަމަށެވެ.
އެގޮތުން ރައީސް ވިދާޅުވީ، އެންމެ ދެކުނުގެ ހަތަރު އަތޮޅު ތަރައްގީވެގެން އަންނައިރު އެ ސަރަހައްދުގެ މައި މަރުކަޒަކަށް ވާނީ އައްޑޫ ސިޓީ ކަމަށާއި، އައްޑޫ ސިޓީގެ ހުރިހާ ކަމެއް މާލެއާއި އެއް ފެންވަރެއްގައި ތަރައްގީކުރެއްވުމަށް ބޭނުންވާ ކަމަށެވެ.
މި ސަރަހައްދަށް ދެމެހެއްޓެނިވި ތަރައްގީ ގެނައުމަށްޓަކައި ދެކުނުގެ ހަތަރު އަތޮޅު އިންޓަގްރޭޓެޑް ޒޯނެއްގެ ގޮތުގަައި ތަރައްގީކުރަން ބޭނުންވަނީ. ހަމައެގޮތަށް ރާއްޖޭގެ އެންމެ އުތުރުންވެސް ހަތަރު އަތޮޅު އެފަދަ ޒޯނެއް ގޮތަށް ތަަރައްގީކުރުން އެއީ އަމާޒަކީ. އަދި މެދު ރާއްޖޭތެރޭގައި ހަތް އާބަން ސެންޓަރު ތަރައްގީކުރުން ދެން މިއޮތީ.
: ރައީސް ވިދާޅުވި އެވެ.
އެމަނިކުފާނު ވިދާޅުވީ މާލެ ގޮތަށް ރާއްޖޭގެ ސަރަހައްދުތަކެއް ތަރައްގީކޮށްގެން ނޫނީ މުޅި ރާއްޖެއަށް ދެމެހެއްޓެނިވި ތަރައްގީއެއް ނުލިބޭނެ ކަމަށެވެ. ސަރުކާރުގެ ސިޔާސަތާ އެއްގޮތަށް އައްޑޫ ތަރައްގީވެގެން އަންނައިރު އައްޑޫ ރައްޔިތުންގެ އުއްމީދުތަކުގައި ހަގީގީ ކުލަ ޖެހިގެންދާނެ ކަމުގައިވެސް ވިދާޅުވި އެވެ.
ރައީސް ވިދާޅުވީ ރާއްޖޭގައި މީގެކުރިން ވެރިކަން ކުރެއްވި ބޭފުޅުން ބޮޑެތި މަޝްރޫއުތައް ފަށަނީ ވެރިކަމުގެ ފަހު އަހަރުގައި ކަމަށެވެ. ނަމަވެސް ރާއްޖެއަށް ކުރިއެރުމާއި ތަރައްގީ ގެނައުމަކީ އެމަނިކުފާނު ބޭނުންވާ ގޮތް ކަމަށްވާތީ އެ މަސައްކަތުގައި އެންމެ ސިކުންތެއްވެސް ބޭކާރު ކުރަން ބޭނުން ނުވާތީ ބޮޑެތި މަޝްރޫއުތައްވެސް ވެރިކަމުގެ ކުރީކޮޅު ފަށަން ބޭނުންވީ ކަމަށްވެސް ވިދާޅުވި އެވެ.
އައްޑޫ ސިޓީގެ ހިތަދޫ އާއި ހުޅުމީދޫ ގުޅާލުމަށް ހެދުމަށް ހަމަޖެހިފައިވާ ބްރިޖު މަޝްރޫއު މިއަހަރު ތެރޭގައި ފަށާނެ ކަމަށާއި އަމާޒަކީ މިދައުރުގެ ތެރޭގައި އެ މަސައްކަތް ނިންމާލުން ކަމަށްވެސް ރައީސް ވިދާޅުވި އެވެ. ބްރިޖުގެ ސާވޭ ނިމި ޑިޒައިންގެ ތިންބައިކުޅަ އެއްބައި މިހާރު ނިމިފައިވާ ކަމަށްވެސް ވިދާޅުވި އެވެ. އައްޑޫ ބްރިޖަކީ 30 މީހުން ސައިކަލް ދުއްވާލަން ހަދާ ބްރިޖެއް ކަމަށް ވާދަވެރިން ބުނި ނަމަވެސް އެއީ އައްޑޫއަށް ތަރައްގީ ގެނައުމަށް މުހިއްމު ވަސީލަތަކަށް ވާނެ ކަމުގައިވެސް ވިދާޅުވި އެވެ.
