މި ސަރުކާރުން މިހާރު ކުރިޔަށް ގެންދާ އައްޑޫ ބުރިޖް މަޝްރޫއަށް އެމްޑީޕީން އެއްބާރުލުން ދޭނެ ކަމުގައި ކުރީގެ ރައީސް ސާލިހު ވިދާޅުވެއްޖެ އެވެ.
ރައީސް ސާލިހު މިހެން ވިދާޅުވީ މަޖިލިސް އިންތިޚާބުގެ ކެމްޕޭނަށް އައްޑުއަށް ވަޑައިގެން އެ ސިޓީގައި ރޭ ބޭއްވި ޖަލްސާގައި ވާހަކަ ދައްކަވަމުންނެވެ.
މި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ މި ސަރުކާރުންވެސް ވައުދުތަކެއް ވަމުންދާ ކަމަށާއި، އެހެންނަމަވެސް ތަރައްގީގެ ކަންކަމުގައި ތަރުތީބެއް އޮންނަންޖެހޭ ކަމުގައެވެ. އަދި ވިދާޅުވީ އެކަންކަމުގައި ރައްޔިތުންގެ މަޖިލިހުގެ ތެރެއިން އެއްބާރުލުން އެމްޑީޕީން ދޭނެ ކަމުގައެވެ.
މިއަދުގެ ސަރުކާރުން ވައުދުތަކެއް އެބަވޭ، އަޅުގަނޑު ހިތުން ހުޅުދޫ މީދޫ އާއި ހިތަދޫ ގުޅައިލުމުގެ ވާހަކަތަކެއް އެބަ ދެކެވޭ، ކުރައްވަންވީ އެހެން ނަމަވެސް ތަރުތީބެއް އޮންނަން ޖެހޭނެ ކަންތައްތަކުގައި. ކުރައްވަންވީ އަޅުގަނޑުމެންގެ ފުރިހަމަ ތާއީދު އެކަމަށް އޮންނާނެ. ރައްޔިތުންގެ މަޖިލީހުގެ ތެރެއިން އަޅުގަނޑުމެންގެ މެންބަރުންގެ ފަރާތުން ލިބެންޖެހޭ ހުރިހާ ތާއީދެއް އެކަމަށް އޮންނާނެ.
ސޯލިހު ވިދާޅުވިއެވެ.
ރައީސް ސާލިހު ވިދާޅުވީ ބުރިޖް އެޅުމުގެ ކުރިން ބުރިޖްމަތިން އައްޑޫ ރައްޔިތުން ދުއްވަންޖެހޭ ސަބަބެއް ދައްކަން ޖެހޭ ކަމުގައެވެ. އެގޮތުން މި މަޝްރޫއަށްވުރެ ވަޒީފާގެ ފުރުސަތު މާ މުހިންމުކަން ފާހަގަ ކުރައްވާ ރައީސް ސާލިހު ވިދާޅުވީ އެމްޑީޕީގެ ސަރުކާރުގައި ކުރި މަސައްކަތްތަކަކީ އެއީ ކަމުގައެވެ.
އަދި އެމްޑީޕީގެ ވިސްނުމަކީ ބުރިޖާއެކު ވަޒީފާގެ ފުރުސަތު ފަހިކުރުންކަމަށް ވިދާޅުވަމުން ރައީސް ސާލިހު ވިދާޅުވީ އެކަން ހަގީގަތަކަށް ވެގެންދަނީ އެމްޑީޕީއަށް މަޖިލިހުގެ މެޖޯރިޓީ ލިބިގެން ކަމުގައެވެ.
