ކޮވިޑް-19 އާ ގުޅިގެން ނަގާފައިވާ ލޯނުތަކަށް އަރާފައިވާ އިންޓަރެސްޓަކީ އެމްޑީޕީގެ ސަރުކާރުން މަޢާފްކޮށްފައިވާ އެއްޗެއްކަމަށް އެމްޑީޕީގެ ޗެއަރޕާސަން ފައްޔާޒު އިސްމާއީލު ވިދާޅުވެއްޖެއެވެ.
ފައްޔާޒު މިހެން ވިދާޅުވީ ކޮވިޑް-19 އާ ގުޅިގެން ވިޔަފާރިތަކަށް ކުރިމަތިވި ދަތިތަކަށް ހައްލު ހޯދައިދިނުމަށާއި ވިޔަފާރިތަކަށް ބޭނުންވާ ހިންގުމުގެ ހަރަދު ހަމަޖެއްސުމަށް އެސްއެމްއީ ޑިވެލޮޕްމަންޓު ފައިނޭންސް ކޯޕަރޭޝަން (އެސްޑީއެފްސީ) އަދި ހައުސިން ޑިވެލޮޕްމަންޓު ފައިނޭންސް ކޯޕަރޭޝަން (އެޗްޑީއެފްސީ) އިން ދޫކުރި ލޯނުގެ އިންޓްރެސްޓް މާފުކުރަން ސަރުކާރުން ނިންމިކަން މިރޭ އިއުލާން ކުރުމާއި ގުޅިގެންނެވެ.
އެކަން އިއުލާން ކުރައްވައި ލ. ފޮނަދޫގައި ބޭއްވި ޖަލްސާގައި ރައީސް ޑރ މުހައްމަދު މުއިއްޒު ވިދާޅުވީކޮވިޑްގެ ބަލިމަޑުކަމާއި ގުޅިގެން ގިނަ ބަޔަކު އެސްޑީއެފްސީ މެދުވެރިކޮށް ލޯނު ނަގާފައިވާ ކަމަށެވެ. އެ ލޯނުގެ އިންޓްރެސްޓް އިތުރުވަމުން ގޮސް ނުތަކާ ހިސާބަށް ގޮސްފައިިވާ ކަމަށް ވިދާޅުވިއެވެ.
ރައީސް ވިދާޅުވީ އެ އިންޓްރެސްޓް މާފުކުރާނެ ކަމަށް މިދިޔަ ސަރުކާރުން ބުނި ނަމަވެސް ވެރިކަން ނިމިގެން ދިޔައިރުވެސް އެ އޮތީ މާފުނުކުރެވި ކަމަށެވެ. އެހެންވެ މި ސަރުކާރުން މިދިޔަ ހަތަރު މަސްތެރޭގައި މަސައްކަތްކުރީ އިންޓްރެސްޓް މާފުކުރުމުގެ މަސައްކަތްކަމަށާއި އިންޓްރެސްޓް މާފުކުރައްވާނެ ކަމަށް ވިދާޅުވި އެވެ.
އެހެންވީމަ އިރާދަކުރެއްވިއްޔާ އީދު ބަންދަށް ފަހު ހުޅުވޭ ދުވަހުން ފެށިގެން އެޕްލައި ކުރުމުގެ ފުރުސަތު ދޭނަން، ކޮވިޑުގެ ލޯނު ނަގައިގެން އެރި އިންޓްރެސްޓް މާފުކުރަން މިހާރު ވަނީ ނިންމާފައި.
ރައީސް ވިދާޅުވިއެވެ.
ރައީސްގެ ވާހަކައަށް ރައްދު ދެއްވަމުން ފައްޔާޒު ވިދާޅުވީ މި ލޯނުތަކުގެ އިންޓަރެސްޓް ވަނީ 15 ނޮވެމްބަރ 2023 ގައި ރައީސުލްޖުމްހޫރިއްޔާ އޮފީހުން ފިނޭންސް މިނިސްޓްރީއަށް ފޮނުއްވާފައިވާ ސިޓީން މާފް ކޮށްފައި ކަމުގައެވެ.
އެގޮތުން ފައްޔާޒު ވިދާޅުވި ގޮތުގައި، އެ ސިޓީގައި ވާގޮތުން، ކޮވިޑް ރިލީފް ލޯންތަކުގެ އިންޓަރެސްޓަށްވާ 22 މިލިއަނަށްވުރެ ގިނަ ރުފިޔާ އެއީ ދައުލަތަށް އަނބުރާ ނުލިބޭނެ ފައިސާތަކެއްކަމަށް ކަނޑައެޅުމަށާއި ކުރިން ދައްކާފައިވާ 23 މިލިއަން ރުފިޔާ އެއީ ނެގި ލޯނުގެ އަދަދުކަމށް ބަދަލުކޮށް ބާކީ ނުދެއްކި އޮތް ލޯނުގެ އަދަދު ބަހާލަދިނުމަށް ފިނޭންސްގައި ދަންނަވާފައި ވާކަމަށެވެ.
އެހެންވީމާ ހަމަ ތެދުތެދަށް ދަންނަވަންޏާ 47 މިލިއަން ރުފިޔާ ކުދި ވިޔަފާރިތަކަށް އެ މާފްކޮށްދެއްވީ. އެހެންވީމަ އެކަމަށް ޝުކުރުވެރިވާންޖެހޭ. ނަމަވެސް މިސިޓީއަކީ 15 ނޮވެމްބަރަ 2023 ގައި އޭރުގެ ރައީސުލްޖުމްހޫރިއްޔާ މުހައްމަދު ޞާލިހު އޭރުގެ ފިނޭންސް މިނިސްޓަރ އިބްރާހީމް އަމީރަށް ފޮނުވާ މައާފްކޮށްދެއްވާފައިވާ އޮތް އެއްޗެއްގެ ވާހަކަ އަނެއްކާ މިދެއްކީ. ދެން ކީކެތޯ ބުނާނީ.
