ރައްޔިތުންގެ މަޖިލީހުގެ އިންތިހާބުގައި ތިމަރަފުށި ދާއިރާއަށް އަމިއްލަ ގޮތުން ވާދަ ކުރައްވާ އަހްމަދު ރިޔާޒަށް ކެމްޕޭނު ކޮށްދޭން ސަރުކާރުގެ ބައެއް ވަޒީރުން ތ. ތިމަރަފުއްޓަށް މިއަދު ވަޑައިގަތުމުން މުޒާހަރާކޮށްފި އެވެ.
ރައްޔިތުން މަޖލީހުގެ އިންތިހާބުގައި ތިމަރަފުށީ ދާއިރާގެ ޕިއެންސީ ޓިކެޓް ދީފައިވަނީ އިބްރާހިމް ސަނާހު (ސަންޓޯ) އަށެވެ. އޭނާއަކީ އެ ދާއިރާގެ ޕީއެންސީ ރައީސް ކަމަށްވާއިރު ޕީއެންސީގެ ޓިކެޓް ލިބުނުކަމުގެ ރަސްމީ ލިޔުންވެސް ސަނާހުއާ ވަނީ ހަވާލުކޮށްފަ އެވެ. ނަމަވެސް ސަރުކާރުން ފަހުން ވަނީ ސަންޓޯ ބާކީކޮށްދީ އެ ދާއިރާ އަށް އަމިއްލަ ގޮތުން ވާދަކުރާ ރިޔާޒަށް ތާއީދުކުރަން ނިންމާފަ އެވެ. ރިޔާޒަކީ އެ ދާއިރާގެ މިހާރުގެ މެމްބަރު އަބްދުﷲ ރިޔާޒުގެ ބޭބެ އެވެ.
ރިޔާޒަށް ކެމްޕޭނު ކޮށްދިނުމަށާއި އޭނާގެ ޖަގަހައެއް ހުޅުވައިދޭން ތިމަރަފުއްޓަށް ވަޑައިގެންނެވީ ހެލްތު މިނިސްޓަރު އަބްދުﷲ ހަލީލު އާއި ފިޝަރީޒް މިނިސްޓަރު އަހުމަދު ޝިޔާމެވެ.
ރިޔާޒުގެ ޖަގަހައިގައި ޕީއެންސީގެ ލޯގޯ އާއި ޕީއެންސީގެ ކުލަ ލާފައިވާއިރު، ސަންޓޯ އާއި އޭނާގެ ސަޕޯޓަރުން ވަނީ ޖަގަހަ ހުންނަ ސަރަހައްދަށް ގޮސް ރިޔާޒު ކުރަން އުޅެނީ "ބަޣާވާތެއް" ކަމަށް ބުނެ ނުރުހުން ފާޅުކޮށްފަ އެވެ. މުޒާހަރާގެ އެންމެ ކުރީގައި ހުރެގެން ސަންޓޯ ވަނީ މިނިސްޓަރު ޝިޔާމަށް އެކަން އެގޮތަށް ނުކުރުމަށް ތަކުރާރުކޮށް ގޮވާލާފަ އެވެ.
މުޒަހާރާ ކުރުމުން އެ ޖަގަހައިގައި ޖަލްސާ ނުބާއްވައި ފަހުން މިނިސްޓަރުންގެ ޓީމުން ޖަލްސާ ބާއްވާފައިވަނީ އެހެން ތަނެއްގަ އެވެ. މުޒާހަރާ ކުރަމުންދިޔަ ވަގުތު އެ ސަރަހައްދުގައި ފުލުހުން ވެސް ހަރަކާތްތެރިވި އެވެ.
މަޖިލިސް އިންތިހާބުގައި ބައެއް ދާއިރާތަކުގައި ޕީއެންސީގެ ޓިކެޓް ލިބިފައިވާ ކެންޑިޑޭޓުން ބާކީކޮށް ސަރުކާރުން އަންނަނީ އެ ދާއިރާތަކަށް އަމިއްލަ ގޮތުން ވާދަކުރާ ކެންޑިޑޭޓުންނަށް ތާއީދުކޮށް ކެމްޕޭނު ކޮށްދެމުންނެވެ.
ކޮމެންޓު ފޮނުވާ