ފުލުހުންގެ މުއައްސަސާއަށް ރައްޔިތުންގެ އިތުބާރު އަނބުރާ ގެންނަން ބޭނުންވާ ކަމަށާއި، އެއީ އެމަނިކުފާނުގެ ރިޔާސީ ވައުދެއްކަމުގައ ރައީސް މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ، ކުރީގެ ރައީސް ޔާމީން ޢަބްދުލްޤައްޔޫމް އަލަށް އުފައްދަވާ ޕާޓީ، ޕީޕަލްސް ނޭޝަނަލް ފްރޮންޓް (ޕީއެންއެފް) އުފެއްދުމަށް ބާއްވަންޖެހޭ ޖަލްސާ ބޭއްވުމަށް ޣިޔާސުއްދީން ސްކޫލްގައި ތައްޔާރީތައް ވެފައިވަނިކޮށް، ފުލުހުން ރޭ އެ ޖަލްސާ ހުއްޓުވަން އެސްއޯ ފުލުހުން ބޭނުންކޮށްގެން ބާރުގެ ބޭނުންކޮށްފައިވާތީ އެކަމާ ހިންހަމަނުޖެހުން ފާޅުކޮށް ވާހަކަ ދައްކަވަމުންނެވެ.
މިކަމާއި ގުޅޭގޮތުން މީޑިއާއާއި ވާހަކަފުޅު ދައްކަވަމުން ރައީސް ވިދާޅުވީ، ފުލުހުންނަކީ ރައްޔިތުންނަށް އަނިޔާކޮށް، ނުވަތަ ހިފާ ހައްޔަރުކުރާ ބައެއްގެގޮތުގައި އޮންނަން ބޭނުން ނުވާކަމަށާއި، ބޭނުންފުޅުވަނީ ފުލުހުންގެ މުއައްސަސާއަށް ކުރާ ތުހުމަތުތައް ނައްތާލާއި، ރައްޔިތުން އިތުބާރުކުރާ މުއައްސަސާއަކަށް ހެދުމަށްކަމަށެވެ.
އަޅުގަނޑު ފުލުހުންގެ މުއައްސަސާއަށް ރައްޔިތުންގެ އިތުބާރު އަނބުރާ ގެންނަން ބޭނުން. ސަރުކާރަށް ރައްޔިތުންގެ އިތުބާރު އޮންނަން ބޭނުން. އެއީ އަޅުގަނޑުގެ ވަޢުދު.
ރައީސް މުޢިއްޒު ވިދާޅުވިއެވެ.
ރައީސް އިތުރަށް ވިދާޅުވީ ޕީއެންއެފްގެ ޖަލްސާ ހުއްޓިވަން އެސްއޯ ފުލުހުން ރޭ ބޭނުން ކޮށްފައިވަނީ އެމަނިކުފާނުގެ އެންގުމާ ޚިލާފަށް ކަމަށާއި، އެކަން ހިގައިދިޔަ ގޮތް ތަހުގީގު ކުރުމަށް މިއަދު އިރުއޮއްސުމުގެ ކުރިން އެމަނިކުފާނަށް ރިޕޯޓު ފޮނުވަން އަންގަވާފައި ވާނެކަމަށެވެ.
މިކަމާއި ގުޅިގެން މިއަދު ރައީސް މުއިއްޒު ވިދާޅުވީ ރޭގެ ޖަލްސާ ހުއްޓުވަން އެސްއޯ ފުލުހުން ފޮނުވައިގެން ނުވާނެކަމަށް ވަރަށް "ކުލިއަރ އިންސްޓްރަކްޝަން" ދީފައި އޮންނާނެ ކަމުގައެވެ.
ފޮނުވަން ޖެހިއްޖެއްޔާ އަޅުގަޑަށް އިނގޭނެއޭ މިގައުމުގަ އެ ހިސާބަށް ދިޔައިމަ. އަޅުގަޑު ދަންނަވާނަމޭ އެވަރުގެ ކަމެއް ކުރަން ޖެހިއްޖެއްޔާ. އެއީ ބައެއްގެ މުދަލަށް ގެއްލުންދީ، ތަނެއްގަ ރޯކޮށް، މީހުންނަށް އަނިޔާކޮށް، ޖިސްމާނީ އަނިޔާކޮށް، މިކަހަލަ ކަންތައްތައް ނޫނިއްޔާމު މުގައްދަަސްތަނެއްގަ، މިސްކިތެއްކަހަލަ ތަނަކަށް ގެއްލުންދީ މިހެންގޮސް އިނގޭނެ އެންމެންނަށްވެސް، އެހިސާބަށް ނުދަންޏާ، ނުވެސްދާނެ އިރާދަކުރެއްވިއްޔާ.. އެހާ ކުލިއަޔ އިންސްޓްރަކްޝަނެއް ދީފަ އޮއްވާ.. އަޅުގަޑު ރޭގަ އުޅުނީ ދެ އިވެންޓެއްގަ.. އޭޒް ޔޫޝުއަލީ.. އިވެންޓު ނިމިގެން އަޅުގަޑަށް މައުލޫމާތު މިއަންނަނީ އަދި ނޫހުން އަޅުގަޑަށް ފޮޓޯ މި ފެންނަނީ އެސްއޯ ފުލުހުން ގޮއްސަ އެތަނުގެ ބެރިކޭޑް ޖަހާ ދެން އެކިކަންތައްތައް ހިނގިކަން، އެއީ ވަރަށް ހިތާމަ ކުރާކަމެއް.
ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނުގެ ސާފު އިންސްޓްރަކްޝަން ދީފަ އޮތް ކަމެއްގައި އެކަން ހިނގީމަ މިނިސްޓަރަށްވެސް އަދި ސީޕީއަށްވެސް ގުޅުއްވި ކަމަށެވެ.
އަދި ރައީސް ވިދާޅުވީ މިއަދު އިރު އޮއްސުމުގެ ކުރިން އެކަން ހިގައިދިޔަ ގޮތުގެ ތަހުގީގު ރިޕޯޓެއް ފޮނުވުމަށް އަންގާފައިވާނެ ކަމަށާއި، އެކަމަކީ ޓޮލެރޭޓް ކުރާނެ ކަމެއް ނޫންކަމުގައެވެ. އަދި ކުރީގަ ކަން ހިގައިދިޔަ ގޮތަށް، ކަންކަން ތަކުރާރުވާން ބޭނުން ނުވާކަމަށްވެސް ރައީސް މުއިއްޒު ވިދާޅުވިއެވެ.
ރޭގެ އެއްވުން ރޫޅާލުމާއިގުޅޭގޮތުން ފުލުހުން ބުނެފައިވަނީ އެއްވުން ރޫޅާލަންޖެހުނީ ސްކޫލާއި ޕީއެންއެފް އާއިދެމެދު ވެފައިވާ އެއްބަސްވުން ކެންސަލްކޮށްފައިވާތީ، އެފަރާތުގެ ކަންބޮޑުވުމާއިއެކު، މިނިސްޓްރީ އޮފް އެޑިއުކޭޝަންގެ އެދިލެއްވުމަކަށްކަމަށެވެ.
ނަމަވެސް ފުލުހުން ވިދާޅުވާފަދައިން އެއްބަސްވުން ބާޠީލްކުރެވިފައިނުވާކަމަށާއި، ފުލުހުން އެއްވުން ރުޅާލީ ބާރުގެ ނަަހަމަ ބޭނުންކޮށްގެންކަމަށް ޕީއެންއެފް އިން ބުނެފައި ވެއެވެ.
ޕީއެންއެފް އުފެއްދުމުގެ ޖަލްސާ ޢިޔާސުއްދީން ސްކޫލުގައި ބޭއްވުން މަނާކުރުމުން އެ ޕާޓީންވަނީ ޕާޓީ އުފައްދާ ޖަލްސާ ހެންވޭރު ރާޅުގަނޑު ސަރަހައްދުގައި ބާއްވާފައެވެ.
