ކުރިޔަށް އޮތް މަޖިލިސް ކެމްޕޭންގައި އެމްޑީޕީން ބޭނުން ކުރަމުންދާ ލޯގޯގައި އިންޑިއާގެ ދިދަ ބޭނުން ކޮށްގެން ހެދި ޕޯސްޓަށް ފާޑުކިއުން އަމާޒުވުމުން ޝިއުނާ މާފަށް އެދިއްޖެއެވެ.
ޝިއުނާ ވަނީ ކުރިޔަށް އޮތް މަޖިލިސް ކެމްޕޭންގައި އެމްޑީޕީން ބޭނުން ކުރަމުންދާ ލޯގޯއަށް ބަދަލު ގެނެސް އެލޯގޯގައި އިންޑިއާގެ ދިދައިގެން ނިޝާން ޖަހާ، އަދި އޭގެ އިތުރުން ބީޖޭޕީގެ ލޯގޯވެސް އެމްޑީޕީގެ ލޯގޯގައި ހިމަނާ "މިސްރާބު އަނގަވަތަށް" މި ޝިއާރާއެކީ ސޯޝަލް މީޑިއާގައޮ ޕޯސްޓް ކޮށްފައެވެ.
އެ ޕޯސްޓް ސޯޝަލް މީޑިއާގައި އާންމު ކުރުމާއެކު، އެއީ އިންޑިއާގެ ދިދައަށާއި އެގައުމަށް ގަނާކުރުން ކަމަށް ބުނެ، ގުނަ ބައެއްގެ ފާޑުކިއުން ވަނީ އޭނާއަށް އަމާޒު ވެފައެވެ. އަދި އިންޑިއާގެ ބައެއް ފަރާތްތަކުންވެސް މި ޕޯސްޓަށާއި ޝިއުނާއަށް ފާޑު ކިޔާފައި ވެއެވެ.
ފާޑުކިއުން އަމާޒުވުމާއެކު ޝިއުނާވަނީ އެކަމަށް މާފަށް އެދި އެއީ ގަސްތުގައި ކުރި ކަމެއް ނޫންކަމަށް ބުނެފައެވެ. އަދި އޭނާ ބުނެފައިވަނީ އެއީ އިންޑިއާއާއި ދިމާކުރުމުގެ ގޮތުން ކުރި ޕޯސްޓެއް ނޫންކަމަށާއި، އެއީ އޮޅުމަކުން ކުރެވުނު ޕޯސްޓެއް ކަމުގައެވެ. އަދި އޭނާ ބުނެފައިވަނީ އޭނާ ޕޯސްޓުކުރާ ކޮންޓެންޓު ކުރިޔަށް އޮތް ތަނުގައި އިތުރަށް ބަލާނެ ކަމުގައެވެ. އެއަށްފަހު ޝިއުނާވަނީ އޭނާ އެކްސް ހޭންޑްލްގް ޕްރޮފައިލްއިން "ޑެޕިއުޓީ މިނިސްޓަރ"ގެ މަގާމް އުނިވެސް ކޮށްފައެވެ.
މީގެ ކުރިންވެސް ޝިއުނާ އިންޑިއާގެ ވެރިންނަށާއި އެގައުމުގެ ބޮޑުވަޒީރަށް ފާޑިިއުން އަމާޒުކުރުމުން އޭނާ ވަނީ މަގާމުން ސަސްޕެންޑްވެސް ކޮށްފައެވެ.
