ކުރީގެ ފަތުރުވެރިކަމާބެހޭ ވަޒީރު، އަދި ކުރިޔަށް އޮތް ރައްޔިތުންގެ މަޖިލިހަށް ކުޅުދުއްފުށި ދެކުނު ދާއިރާއަށް އެމްޑީޕީގެ ޓިކެޓް ވާދަކުރަމުންދާ އަލީ ވަހީދުއާދެކޮޅަށް ކުޅުދުއްފުށި އަންހެން ކަނބަލުން މުޒާހިރާއަށް ނިކުތުމަށް މި ސަރުކާރުގެ ފަތުރުވެރިކަމާބެހޭ ވަޒީރު އިބްރާހިމް ފައިސަލް ގޮވާލައްވައިފިއެވެ.
އޭނާ މިކަމަށް ގޮވާލެއްވީ ރޭ މާލޭގައި ކުރިޔަށްދިޔަ، ޕީއެންސީގެ ޓިކެޓުގައި ފޮނަދޫ ދާއިރާއަށް ވާދަކުރައްވާ، މިސަރުކާރުގެ އެންމެ ނުފޫޒުގަދަ ވަޒީރު އަބުދުއްރަހީމްގެ ޖަގަހަ ހުޅުވުމަށް ރޭ ބޭއްވި ޖަލްސާގައި ފައިސަލް ވާހަކަ ދައްކަވަމުންނެވެ.
ރޭގެ ޖަލްސާގައި ވާހަކަ ދައްކަވަމުން ފައިސަލް ވިދާޅުވީ އަލީ ވަހީދު ފަދަ ބޭފުޅަކު ރައްޔިތުން ތަމްސީލުކުރަން މަޖިލިހުގައި އިނުމަށް ދިވެހި އަންހެން ކަނބަލުން ބޭނުން ނުވާނެ ކަމުގައެވެ.
ތިޔަބޭފުޅުންނަށް ނޫސްތައް ބަލާލީމާ އެނގޭނެ. އަދި ކޮވިޑް ތެރޭގައި ދިމާވި ކަންކަންވެސް އެނގޭނެ. އެއީ ދިވެހިރައްޔިތުން، ދިވެހި އަންހެންކުދިން ބޭނުންވާނެ ކަމެއްނޫން އެފަދަ ބޭފުޅުން ދިވެހިރާއްޖޭގެ ރައްޔިތުން ތަމްސީލުކުރާ ގޮނޑިތަކަށް ހޮވުމަކީ. އަޅުގަނޑަށް އެނގޭ އެކަން ވަރަށް ރަނގަޅަށް. އަޅުގަނޑު ބަލާލިން އެކަން ހިނގާފައޮތް ގޮތް. ކުުދުއްފުށީގެ އެކެނޑިޑޭޓަކު ވާދަކުރާ އެދާއިރާގެ ހުރިހާ އަންހެން ކަނބަލުން އެކަމާ އިދިކޮޅަށް އިހުތިޖާޖުކުރަން ޖެހޭ.
ފައިސަަލް ވިދާޅުވިއެވެ.
ކުރީގެ މިނިސްޓަރ އަލީ ވަހީދުގެ މައްޗަށް ވަނީ ޖިންސީ ފުރައްސާރައިގެ ތުހުމަތު ކުރެވުފައެވެ. އަދި އޭނާއާއި ދެކޮޅަަށް އަންހެން ކުދިންތަކެއް ޕޮލިހަށް ދިނަ ބަޔާންތަކެއް ވަނި ސޯޝަލް މީޑީއާގައި ލީކު ކޮށްލާފައެވެ.
