އެކި ކުށްތަކަށް އަރައިގަންނަ ކުދިން ދައުލަތުގެ ބެލުމުގެދަށަށް ގެނެސް، އެކުދިން ރިހިބިލިޓޭޓް ކުރުމަށް ޚާއްސަ ފެސިލިޓީއެއް ހެދުމަށް ނިންމާފައިވާކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
އއ. ރަސްދޫގައި ކުއްޖަކަށް ހަނގާކޮށް، އަނިޔާ ކުރި މައްސަލައާ ގުޅިގެން މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިހުސާން ވިދާޅުވީ މި ފެސިލިޓީގެ މަސްއޫލިއްޔަތަކަށް ވާނީ އާއިލާތަކުން ނުބެލެހެއްޓި، އަހުލާގީ ގޮތުން މުޖުތަމައު އިން އެކަހެރިވާ ކުދިންނާއި އަދި އެކި ކުށްތަކަށް އަރައިގަންނަ ފަރާތްތަކާ އެކީ އުޅެ، ކުށުގެ މާހައުލުން ތަކުރާރުކޮށް ފުލުހުންނާ ދިމާވާ ދައުލަތުގެ ބެލުމުގެދަށް ގެނެސް އެކުދިން ރިހިބިލިޓޭޓް ކުރުން ކަމުގައެވެ.
އޭނާ ވިދާޅުވީ މި ފެސިލިޓީ ގާއިމުކުރަން ވަކި ރަށެއް ކަނޑައަޅަން ނިންމާފައިވާކަމުގައެވެ. އަދި މި ފެސިލިޓީއަށް ކުދިން ނަގާނީ ގާނޫނުގައިވާ ގޮތުގެމަތިން، ކޯޓު މެދިވެރިކޮށް ކަމުގައިވެސް އޭނާ ވިދާޅިވިއެވެ.
އޭނާ އިތުރަށް ވިދާޅުވީ މި ފެސިލިޓީ އަށް ގެންދެވޭ ކުދިންނަށް އެތަނުގައި ދީނީ ގޮތުން ކުރަންޖެހޭ ކަންކަން ބަރާބަރަށް ކުރުވާނެ ކަމުގައެވެ. އަދި އޭގެ އިތުރުން ކުދިންގެ އުމުރާއި ގުޅޭގޮތުން ރަސްމީ ތައުލީމު ދިނުމާއި، އަހުލާގީ ގޮތުން ދޭންޖެހޭ ފަރުވާތައް ދިނުމުގެ އިތުރުން ކޮންމެ ކުއްޖަކަށް ދޭންޖެހޭ ވަކި ސައިކޯ ސޯޝަލް އިންޓެވެންޝަން ޕްރޮގްރާމެއް ހެދި އެކުދިންނަށް ކަސްޓަމައިޒްޑް އިންޓެވެންޝަން ޕްރޮގްރާމެއް މި ފެސިލިޓީގައި ކުރިޔަށް ގެންދެވޭނެކަމުގައެވެ.
އިހުސާން ވިދާޅުވީ މިފަދަ ފެސިލިޓީއަކުން ފަރުވާ ހޯދަންޖެހޭ 200 ވަރަކަށް ކުދިން ރާއްޖޭގެ އެކި ކަންކޮޅުތަކުގައި ތިބިކަމަށް ފާހަގަ ކުރެވިފައިވާ ކަމުގައެވެ.
