ރައްޔިތުންގެ މަޖިލިހުގެ އިންތިޚާބުގައި ވާދަކުރާ ޑިމޮކްރެޓްސްގެ ކެނޑިޑޭޓުންނަށް ކެމްޕޭން ކޮށްދިނުމަށް ނަޝީދު މާލެ ވަޑައިގެންނެވުމަށް ހަމަޖެހިފައިވާކަމަށް މައުލޫމާތު ލިބިއްޖެއެވެ.
"ޚަބަރު އޮންލައިން" އަށް މައުލޫމާތުދިން، ޑިމޮކްރެޓްސް ޕާޓީގެ އިސް ބޭފުޅަކު ވިދާޅުވި ގޮތުގައި މިހާރު ކުރިޔަށްދާ ރައްޔިތުންގެ މަޖިލިހުގެ އިންތިޚާބުގައި ވާދަކުރަމުންދާ ޑިމޮކްރެޓްސް ކެނޑިޑޭޓުންނަށް ކެމްޕޭން ކޮށްދިނުމަށް ނަޝީދު މާލެ ވަޑައިގަތުމަށް ހަމަޖެހިފައިވަނީ މިމަހުގެ 17 ވަނަ ދުވަހުއެވެ. އެހެންނަމަވެސް މިކަން އެއްވެސް ރަސްމީ ސިފައެއްގައި ޑިމޮކްރެޓްސް ޕާޓީންވެސް އަދި ނަޝީދުގެ ފަރާތުންވެސް ޔަގީން ކޮށްދީފައެއް ނުވެއެވެ.
ކުރިޔަށް އޮތް ރައްޔިތުންގެ މަޖިލިހުގެ އިންތިޚާބު ބޭއްވުމަށް ހަމަޖެހިފައިވަނީ މިމަހުގެ 21 ވަނަ ދުވަހުއެވެ.
ރައްޔިތުންގެ މަޖިލިހުގެ މެމްބަރެއްގެ ގޮތުގައި މިހާރުވެސް ހުންނެވި، ކުރީގެ ރައީސް ނަޝީދު ވަނީ ސިޔާސީ މަސްރަހުން ވަގުތީގޮތުން ދުރަށް ޖެހިވަޑައިގެން، ގާނާއަށް ދިރިއުޅުން ބަދަލު ކުރެއްވިތާ ދެމަސްފަހުން، މަޖިލިހުން ލިބެމުންދާ މުސާރަވެސް ދޫކޮށްލައްވާފައެވެ.
ނަޝީދު ރައްޔިތުންގެ މަޖިލިހުގެ ރައީސް މުހައްމަދު އަަސްލަމްއަށް އެޑްރެސް ކޮށް ފޮނުއްވި ސިޓީއެއްގައި ލިޔުއްވާފައިވަނީ، ކުލައިމެޓް ވަލްނަރަބުލް ފޯރަމް (ސީވީއެފް)ގެ ފުރަތަމަ ސެކެޓްރީޖެނެރަލްގެ ހައިސިއްޔަތުން ކުރަންޖެހޭ މަސައްކަތްތަކަށް މި މާރިޗްމަހު ގާނާގެ ޕާލަމެންޓުން ސީވީއެފް ސެކެޓްރިއޭޓާއި ބެހޭ ގަރާރު ފާސްކޮށްފައި ވާކަމުގައެވެ. އެހެންކަމުން އެޕްރިލްއިން ފެށިގެން މިދައުރުގެ ބާކީ އޮތް މުއްދަތަށް މަޖިލިހުން ލިބެންޖެހޭ އުނިކޮށްދެއްވުމަށް ނަޝީދު އެދިފައިވެއެވެ.
ސިޔާސީ މަސްރަހުން ވަގުތީގޮތުން ދުރަށް ޖެހިވަޑައިގެން ނަޝީދު ގާނާއަށް ދިރިއުޅުން ބަދަލު ކުރެއްވިކަން އިއުލާން ކުރެއްވީ ފާއިތުވި ޖެނުއަރީމަހުގެ 31 ވަނަ ދުވަހުއެވެ.
ގާނާއަށް ދިރިއުޅުން ބަދަލުކުރެއްވުމަށްފަހު ނަޝީދު ވިދާޅުވީ ކުރިޔަށް އޮތް އަހަރުތަކުގައި ދިރިއުޅުއްވާނީ ގާނާގެ ވެރިކަންކުރާ ރަށް އާކްރާގައި ކަމުގައެވެ. އަދި ނަޝީދު ވިދާޅުވީ އެ ގައުމަށް ދިރިއުޅުން ބަދަލު ކުރެއްވީ "ދަ ސީވީއެފް"ގެ ފުރަތަމަ ސެކެޓްރީ ޖެނެރަލްގެ ހައިސިއްޔަތުން މަގާމުގެ މަސްއޫލިއްޔާތާއި ހަވާލުވެވަޑައިގަންނަވައިގެން ކަމުގައެވެ.
"ދަ ސީވިއެފް"ގެ މިދައުރުގެ ރިޔާސަތު ބަލަހައްޓަވަނީ ގާނާއިންނެވެ.
"ދަ ކްލައިމެޓް ވަލްނަރަބްލް ފޯރަމް" (ދަ ސީވީއެފް) ޖަމިއްޔާއަކީ ތިމާވެށީގެ ގޮންޖެހުންތަކާއި ކުރިމަތިލާން ޖެހޭގައުމުތައް އެކުވެގެން އުފައްދާފައިވާ ޖަމިއްޔާއެކެވެ.
އެޖަމިއްޔާއަށް މިހާރު، އެފްރިކާ، އޭޝިއާ، ކެރީބިއަން، ކެޓިން އެމެރިކާ އަދި ފެސިފިކްއަށް ނިސްބަތްވާ 58 ގައުމެއް ނިސްބަތް ވެއެވެ. އަދި ދުނިޔޭގެ 1.4 ބިލިއަން މީހުން އެ ޖަމިއްޔާއިން ތަމްސީލު ކުރެއެވެ.
