އއ. ރަސްދޫ މިސްކިތެއްގެ ވުޟޫކުރާ ސަރަހައްދުގައި ކުޑަކުއްޖަކަށް ގަނާކޮށް، އަނިޔާ ކުރި މައްސަލަ ރައްޔިތުންގެ މަޖިލީހުގެ ހިއުމަން ރައިޓްސް ކޮމިޓީއަށް ހުށަހަޅައިފި އެވެ.
ކުޑަ ކުއްޖަކަށް ބުލީ ކުރާ ވީޑިއޯއެއް ރޭވަނީ ސޯޝަލް މީޑިއާގައި ދައުރުވަން ފަށާފައެވެ. އެވީޑިއޯ ދައުރުވާން ފެށުމާއެކު ފުލުހުން ސޯޝަލް މީޑިއާގައި ބުނެފައިވަނީ ވޯޑިއޯއިން ފެންނަ ހާދިސާ ހިނގާފައިވަނީ އއ. ރަސްދޫގައި ކަމަށާއި، ކުޑަ ކުއްޖާއަށް ބުލީކުރި ފަރާތްތައް ދެނަގަނެވިއްޖެ ކަމުގައެވެ. އަދި ފަހުން ފުލުހުން ބުނެފައިވަނީ ކުޑަކުއްޖާއަށް ގަނާ ކޮށްފައިވަނީވެސް ކުޑަކުދިންތަކެއް ކަމުގައެވެ.
އަދި ފުލުހުންވަނީ ބުލީކުރާތަން ފެންނަ ވީޑިއޯ ސޯޝަލް މީޑިއާގައި ދައުރު ނުކުރުމަށްވެސް އެދިފައެވެ.
މިޙާރު އާންމުވެސް ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަނީ ދެމީހަކުވެގެން މިސްކިތެއްގެ ތެރޭގައި، ކުޑަކުއްޖަކަށް، ތަރާވީސް ނަމާދު ކުރަމުންދަނިކޮށް، މިސްކިތުގެ ވުޟޫކުރާ ބައިގެ ތެރޭގައި ކުޑަކުއްޖާ ގަނާކޮށް، އިންޒާރުދީ އަނިޔާ ކުރަމުންދާ މަންޒަރެވެ. އަދި ވަރަށް ރަހުމު ކުޑަކޮށް ކުޑަކުއްޖާއާ ދޭތެރޭ އަމަލުކޮށްފައިވާތަންވެސް ވީޑިއޯއިން ފެންނަން ހުރެއެވެ. ފުލުހުން ވިދާޅުވެފައިވަނީ މައްސަލަ ވަރަށް ސީރިއަސް މައްސަލައެއްގެ ގޮތުގައި ތަހުގީގުކުރަން ފަށާފައިވާ ކަމުގައެވެ.
މަޖިލިސް ކޮމިޓީގެ މުގައްރިރު ޖީހާން ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ، މިމައްސަލަ މިހާރު މަޖިލިސް ކޮމިޓީއަށް ހުށަހަޅާފައިވާ ކަމުގައެވެ.
ފުލުހުން ބުނި ގޮތުގައި، ގަނާ ކުރުމުގައި ބައިވެރިވީ 13 އަހަރުގެ ކުއްޖަކާއި 14 އަހަރުގެ ކުއްޖެކެވެ.
