ރައީސް ޔާމިން މިނިވަން ކުރުމަށް ކުރެވެންހުރި ހުރިހާ މަސައްކަތެއް ކުރައްވާނެކަމަށް ރައްޔިތުންނަން ވައުދުވެވަޑައިގެންނެވި ކަމަށާއި، ވެރިކަން ބަދަލުވުމަށްފަހު ޖުޑިޝަރީގެ ތެރެއިން ރައީސް ޔާމިނަށް ދިން ލުޔާއެކު އެމަނިކުފާނު މިނިވަންވާނެކަމަށް އުއްމީދު ކުރެއްވިކަމަށް ރައީސް މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ މިއަދު ސަން މީޑިއާއަށް ދެއްވި އިންޓަރވިއުއެއްގައެވެ. މި އިންޓަވިއުގައި ރައީސް ވިދާޅުވީ އަދިވެސް ހުންނެވީ އެވައުދުގެ މަތީގައި ކަމަށާއި، އެހެންނަމަވެސް ރައީސް ޔާމިން މިނިވަން ކުރުމުގެ ބާރު އޮތީ ޖުޑީޝަރީގެ އަތް މަތީގައި ކަމުގައެވެ.
އަޅުގަނޑު އުއްމީދު ކުރީ އެ ދުވަހު އެ ނިންމުން އިއުލާން ކުރުމާއެކީގައި ޖުޑިޝިއަރީ އެ ބޭފުޅުން ހަމަ އެ ގޮތުގައި ކުރިއަށް ވަޑައިގަންނަވާ އެ މަނިކުފާނަށް އިންސާފު ގާއިމު ކޮށްދެއްވާނެ ކަމަށް. އެކަން އޮތީ ޖުޑިޝިއަރީގެ އަތްމަތީގައި.
ރައީސް ވިދާޅުވިއެވެ.
ރައީސް މުއިއްޒު ވިދާޅުވީ ރައީސް ޔާމިން މިނިވަން ކުރުމަށް ކުރެވެން ހުރި މަސައްކަތްތައް ކުރެވެން ހުރީ ގާނޫނީ އިމުގެ ތެރެއިން ކަމަށާއި، ޖުޑިޝަރީއަށް އަތް ނުބާނުއްވާނޭކަމަށް މުޅި ރާއްޖެއަށް އިއުލާން ކުރެއްވި ކަމަށާއި، އެދުވަހުވެސް ވިދާޅުވީ ޖުޑިޝަރީއަށް އަތް ބޭނުން ނިމުމަކަށް އައީ ކަމުގައެވެ.
އަޅުގަނޑު ދެންނެވިން ރައްޔިތުންގެ ގާތުގައި ގާނޫނީ އިމުގެ ތެރެއިން އެ މަނިކުފާނު މިނިވަން ކުރުމުގެ ހުރިހާ މަސައްކަތެއް ކުރައްވާނަމޭ. އަޅުގަނޑަށް ކުރެވޭނެ ކަމަކީ ގާނޫނީ އިމުގެ ތެރެއިން ކުރެވެން ހުރި ކަންކަން ވީމައި އަޅުގަނޑު ހުވާ ކުރި ދުވަހު އިއުލާން ކުރިން ޖުޑީޝިއަރީ ނިސްބަތްކޮށް މުޅި ރާއްޖޭގެ ރައްޔިތުންނަށް ދެންނެވިން މި ހިނދުން ފެށިގެން ސަރުކާރުން ޝަރުއީ ދާއިރާއަށް ނުފޫޒު ފޯރުވުން ނިމުނީއޭ.
ރައީސް ޔާމިން މިނިވަން ކުރުމުގެ ހުރިހާ ބާރެއް އޮތީ ޖުޑިޝަރީގައި ކަަމަށް މޭރުން ކުރައްވަމުން ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ އެމަނިކުފާނު ރައީސް ޔާމިނަށް ވަރަށް އިހުތިރާމް ކުރާކަމަށާއި، ހިތުގައި އަބަދުވެސް ރައީސް ޔާމިނަށް އޮންނާނީ ލޯތްބާއި ގަދަރު ކަމުގައެވެ.
ރައީސް ޔާމިން މިނިވަން ނުމުގެ ޒިންމާ ޕީއެންއެފްއިން މިހާރު އަޅުވަނީ ރައީސް މުއިއްޒުގެ އިސްތަށުފުޅުގައެވެ. އަދު ޚުދު ރައީސް ޔާމިންވެސް ވިދާޅުވެފައިވަނީ އެމަނިކުފާނު މިނިވަން ނުވެގެން އުޅެނީ ސަރުކާރުގެ އެންމެ މަތީފަންތިން މައްސަލައަށް އަތް ބޭނުމުގެ ސަބަބުން ކަމުގައެވެ.
