ފާއިތުވި 50 އަހަރުތެރޭ ވެސް އައްޑޫ ސިޓީގެ ތަރައްގީ އަށް މަސައްކަތެއް ކުރެވިފައި އޮތީ އެމްޑީޕީން ކަމުގައި އެމްޑީޕީގެ އެޑްވައިޒަރ އަދި ކުރީގެ ރައީސް އިބުރާހިމް މުހައްމަދު ސާލިހި ވިދާޅުވެއްޖެއެވެ.
ރައީސް ސާލިހު މިހެން ވިދާޅުވީ މިރޭ އޮތް އެމްޑީޕީގެ ކެމްޕޭން ޖަލްސާއެއްގައި ވާހަކަ ދައްކަވަމުންނެވެ. މި ކެމްޕޭން ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ ހަގީގަތުގައި ތަރައްގީގެ މަސައްކަތެއް ކުރެވިފައި އޮތީ އެމްޑީޕީގެ ވެރިކަމެއްގައި ކަމަށާއި އަދި ހާއްސަކޮށް މި ވޭތުވެދިޔަ ފަސް އަހަރު ކުރެވުނު މަސައްކަތްތައް އައްޑޫ ރައްޔިތުން ފާހަގަކުރާނެ ކަމަށެވެ.
އައްޑޫ ސިޓީގެ މަގުތައް ހެދުމާއި އެއާޕޯޓު ތަރައްގީ ކުރުމާއި ރިސޯޓުތައް އެޅުމަށްޓަކައި ބިން ހިއްކުމާއި، ރަށަށް ބޭނުންވާ ބިންތައް ހިއްކުމާއި ބަނދަރުތައް ހެދުމާއި މިފްކޯގެ ކޯލްޑް ސްޓޮރޭޖުތައް ބޮޑު ކުރުމަށް އަޅުގަނޑުމެން ފަށާފައި ހުރި މަސައްކަތްތައް ފެނުނީމާ އަޅުގަނޑު ހިތުން ހަމަގައިމު ވެސް ބަދަލުތަކެއް ގެންނަން މަސައްކަތްތަކެއް ކޮށްފައި ހުރިކަން ތިޔަ ބޭފުޅުންނަށް ފެނިވަޑައިގަންނަވާނެ.
ރައީސް ސޯލިހު ވިދާޅުވި އެވެ.
މިރޭގެ ޖަލްސާގައި ރައީސް ސާލިހު ވިދާޅުވީ އެމްޑީޕީން ރައްޔިތުންގެ މަޖިލިސް ބޭނުންވަނީ ރާއްޖެ ހަމަމަގަށް އެޅުވުމަށް ކަމަށާއި، އެގޮތުން ރައްޔިތުންގެ މަޖިލީހުގެ މެޖޯރިޓީ އަބަދުވެސް އޮންނަންވީ އެމްޑީޕީގެ އަތުގައި ކަމަށެވެ. އެމަނިކުފާނު ވިދާޅުވީ ރައްޔިތުން ސީދާ ފައިދާވާ ކަމެއް ކުރަނީ ހަމައެކަނި އެމްޑީޕީން ކަމަށާއި އެޕާޓީގެ ސިޔާސަތުތަށް ބަހައްޓަންކޮށްފައިވާ ހުރީ އެގޮތަށް ކަމަށެެވެ.
